新居屋訂價與市場脫鈎 兩類物業衝擊最大 | 林鄭月娥 | 娥六招 | 新房策 | 香港樓市2018
撰文：1%Anthony ｜圖片：新傳媒資料室
朋友Ａ： 「嘩！林鄭終於出招啦！」
筆者： 「好丫！之前我都成日講，希望居屋訂價同市場脫鈎！」
朋友Ａ： 「終於聽你講番次啦喎，哈哈！」
朋友Ｂ： 「仲有空置稅、增加資助房屋供應…睇落幾好丫。」
朋友Ｃ： 「有用咩？我身邊啲朋友個個都話冇用喎！」
朋友Ａ： 「點解呢？」
朋友Ｃ： 「佢哋話…9幅私樓地改劃資助房屋，私樓供應少咗！」
朋友Ａ： 「又好似係喎，咁樓價會唔會仲顛呢？」
朋友Ｃ： 「佢哋又話…好多人冇資格買資助房屋，幫助唔大！」
朋友Ｂ： 「又好似係喎，冇資格買嘅人咪要繼續買貴樓？」
朋友Ｃ： 「Anthony Sir你覺得呢？」
筆者： 「當樓市升到你迷信，講乜市場都覺冇效架啦！」
朋友Ｃ： 「咁又係，我身邊啲朋友乜都話冇效，哈哈！」
朋友Ａ： 「咁你覺得呢？」
筆者： 「要即時令樓價下跌確實唔易，不過有助降溫。」
新房策下 未補地價資助房屋最受影響
首先，直接受影響的，可能是未補地價資助房屋市場。
之前有朋友入飛抽居屋：「哎呀！早知唔抽住啦！」
難怪！難怪！近年的居屋，多以市價7折訂價，但隨着樓價不斷上升，無論是啟德項目，還是長沙灣項目，部份單位呎價過萬，市場為之震驚。至於未補地價的二手居屋，同樣貴到瘋顛，很多靚地點的二手未補地價居屋，呎價早已經過萬！
現在資助房屋訂價與市價脫鈎，市場估計居屋低屋5.2折，綠置居更低屋4.2折，即係點？…粗略計算，同樣的單位，原本700萬平售520萬！原本350萬的單位殺價至260萬！如果你手上有張綠表，準備買二手居屋，會唔會都停一停，諗一諗呢？
新房策下 私樓上車盤亦受影響
其次，私樓…尤其貴到失去理智的上車盤，亦有機會受影響。
林鄭新政策其實想告訴你…盲目追價是非常不智的！
之前筆者已經在專欄寫過，建議資助房屋訂價與市場脫鈎！
因為如果跟市價打折，主導的就是市場，或者是新樓發展商，只要發展商一直將新樓的樓價推上去，周邊二手業主跟隨，所謂市價就會不斷創新高，折扣價亦會水漲船高，政府被牽着走！
延伸閱讀：珠海橫琴樓價炒到癲 大灣區置業 仲有更好選擇
政府搶回新居屋訂價權
如果訂價與市場脫鈎，政府就搶回訂價權！
這個訂價權很重要，政府將由幫凶，變做英雄！
舉例，同一個地區，有兩塊地，一塊是私樓，旁邊是居屋。
以往…你賣2萬 / 呎，政府要賣1.4萬 / 呎，市場有何反應？
「嘩！居屋都過萬！唔買呢世都買唔到啦！」政府幫手做勢！
今天…你賣2萬 / 呎，政府賣6千 / 呎，市場有何反應？
「嘩！隔離咋喎！有乜理由貴咁多？」政府潑你一盆冷水！
延伸閱讀：新界樓貴過市區盤 自住定投資 揀樓大不同
新房策下 冷靜啲未？清醒啲未？
試想想…以一些熱炒的上車屋苑為例，樓齡接近40年，都要賣到呎價1.8萬，如果旁邊的未補地價居屋，市價約7折，呎價1.3萬，你會說：「這是私樓，那是居屋，居屋都賣1.3萬啦，佢賣1.8萬都唔係特別貴啫。」於是就照高追，心安理得大覺瞓。
但是如果旁邊的全新居屋，呎價是6千呢？或者你會覺得：「嘩！行過對面馬路，價錢爭幾倍喎！我咁貴買，仲要幾十年樓，會唔會好傻呢？」就算買咗，可能你都會幾晚瞓唔着。
政府其中幾幅計劃改做資助房屋的用地，在啟德！
絕！旁邊私樓賣3萬，政府居屋賣6千！
停一停，諗一諗
你會唔會停一停，諗一諗呢？
現時市場亢奮，要即時令樓市轉勢是不可能的。
正如之前筆者所說，只要政策不變，尤其是15% 印花稅不撤，業主們仍然唔願賣樓，在全城冇鎖匙的情況下，樓價仍然易升難跌，不過今次幾招，最少可以令到合資格申請居屋的人士，不會再盲目高追上車盤，令亢奮、盲目追價的心態降溫，升勢或會放緩。
短trip遊台北叉叉電，即訂平、靚、正住宿出發！
去旅遊想搵住宿？識睇一定睇呢到！
延伸閱讀:
海外買樓做民宿 做業主兼老闆前 4大考慮
太古城上月最新放盤叫價是多少？
太古城上月最新放盤叫價大約…各區樓市買賣詳情請看。
九龍區有哪些大型屋苑放盤呎價最低？
九龍區不少受歡迎的大型屋苑呎價對比上月都有回落…各區樓市買賣詳情請看。
