【愛海頌實地拍片視察】平均呎價、位置、配套、性價比 新盤一文睇晒

撰文：Smart ED編輯部｜ 圖片：愛海頌Facebook

愛海頌早前已開放示範單位予公眾參觀。項目首張價單推出180伙，折實平均呎價18,688元。項目2號價單推出88伙，折實平均實呎18,345元。為了向各位讀者呈現更全面的分析，《經濟一週》邀請專欄作家1%Anthony 就愛海頌各方面進行評級如下：

愛海頌平均呎價約1.87萬

老友在深水埗長大發跡，想趁樓市調整買番新樓，一家人住好啲，之前的匯璽呎價兩萬幾，超出預算，之前代理話愛海頌會超平價低開，老友滿懷期待，結果甚為失望…

代理： 愛海頌開售啦，平到顛咗！
老友： 有睇新聞，上水都買唔起嘛。
代理： 係呀，呎價1.4萬，市區邊度搵？

老友： 收到價單啦，1.4萬起丫嘛，均價要近1.9萬喎！
代理： 咁可以揀啲平嘅，西九龍嘛，梗係值錢啦。
老友： 嗰度應該係深水埗喎，我响呢區大，好熟架。
代理： 咁你應該知佢平過同區近兩成啦。
老友： 你一定係同匯璽比啦…

推薦閱讀：【新樓盤追蹤】愛海頌、珺瓏灣、One Eighty、尚珒溋、明翹匯、傲玟最新消息

推薦閱讀：【施政報告2019】首次置業800萬樓可借9成按揭

愛海頌基本資料

• 地址：海壇街201,203,218號
• 首份價單日期：2019年10月9日
• 首次出售日期：2019年10月17日
• 出售日期：2019年10月25日起
• 出售地點：九龍紅磡都會道6號置富都會9樓
• 預計關鍵日期：2021年6月30日

深水埗愛海頌位置、物業、配套、性價比評級

位置： 方便度（★★★☆） 地區（★★☆） 地段（★★☆）

先講位置，確實係好方便嘅，東行幾分鐘就到深水埗站，西行幾分鐘就到南昌站，不過方便唔等於好！深水埗西目前的環境比較差，通州街、海壇街、醫局街一帶，舊樓林立，亦有不少車房及電器回收店等，鄰近北河街及鴨寮街等，是基層集中的地方。

物業： 開則（★★☆） 間格（★★★） 質素（★★★）

開則就比較少選擇，主要係兩房及三房，可能因為遷就番匯璽及區內的單幢樓都是以細單位為主，所以開大則避免直接競爭。發展商經常都有新間隔出現，今次亦都唔例外，睇兩房示範單位，面積507呎，內隴面積幾大，客廳亦夠長，但沒有露台，最令人印象深刻的一定要數客廳的窗，三角形架！至於三房單位，內隴都夠大夠實用，房間亦都大，771呎來說空間感算唔錯，不過亦有幾個奇怪佈局，露台响正廳中間，而且好細個，似平時的工作平台，三間房間亦屈埋一邊，遠睇個平面圖，好似一隻大龍蝦的兩隻大蚶，好少見。

配套： 景觀（★★★） 會所（★★★☆） 社區（★★☆）

景觀方面由於位處舊區，向東很多單位都是望舊樓，不過由於區內的舊樓好多都唔高，高層應該可以望到開揚城市景或山景，向西有高速天橋，高層會有公園景及海景，不過就要小心嘈音。會所設施幾好，綠化空間都算多，而且設施有點新意，除了泳池健身室等基本設施，亦有不少兒童活動空間。另外又分男、女主題，男性主題有不同動態設施，女性主題有SPA及畫室等。社區配套非常成熟，鄰近北河街街市等，但卻嫌太過基層，例如鴨寮街、通州街等，民生店舖齊備，但坦白說環境、衛生比較差，而且品流亦比較複雜，是否值這個價錢確實見仁見智。

性價比： 價錢（★★☆） 付款（★★★★） 潛力（★★☆）

價錢…坦白說，感覺有點搵笨！個個都話1.4萬，其實均價接近1.9萬！其他新盤，最低價與均價大約相差一成，點解佢會爭兩三成？最大伏位是…擘價太大！其他樓盤每高一層都係貴2、3萬，最多都係4、5萬，但今次擘價好誇張，例如第3座室，6樓與7樓相差60多萬，其餘很多一層相差10多萬、20多萬，然而也有些正常，相差4、5萬，好難捉摸，自己要睇清楚！付款方法靈活，有發展商高成數按揭，但要自己計清楚。

最後講講潛力，以平均呎價來說，唔值！

甚麼同區平兩成，應該是同匯璽比，然而兩者其實是兩個級數，位置上匯璽自成一角，遠離基層區，又係港鐵站上蓋，樓下又有大型高級商場V Walk，不會覺得自己置身深水埗。再加上發展商過往的交樓質素，確實有分別，價錢低兩成只是合理，不算平！無論匯璽也好，愛海頌也好，沒有反映社會當前狀況，區內亦不見得有很大發展，將來要有可觀升幅，並不容易。