後生仔要知 上車前要考慮的7件事
你係咪真係有自住需要？
如果真係有自住需要，以現時市況來說，供樓點都好過租樓，以市區一個300萬元上車盤為例，租樓住約10,000元，如果買，借盡90%，供盡30年，按息2.15%計算，每月供款連雜費約11,000元，當中有逾5,500元本金，實際要付出的成本不到5,500元。
如果沒有自住需要，純為投資也是好機會，不過買樓就要識得從投資角度去揀。
你有冇能力供樓？
好多所謂專家都嚇鬼，嚟緊加息週期，而家供得掂唔代表將來供得掂云云，如果跟正規矩，做足壓力測試，供樓應該都冇乜問題。況且睇美國個款，都唔會加得好多，未來三年都應該會低息，都唔知驚乜鬼。
最慘好多新樓盤提供的二按或包按，首三年就2.15厘，之後就用P即5.25厘，甚至更多，供款隨時多成倍，真係供到甩肺！如果買嚟收租就當然會輕鬆好多，因為租客幫你供。
你筆首期除咗買樓，有冇其他投資？
係咪一定要買樓？梗係唔係。如果你是炒股專家，筆者不反對你攞筆錢去炒股。但你真係專家先好，股票市場，尤其是目前個市咁難玩，十個散戶都唔知有冇一個贏，係咪有把握？
如果你是生意奇才，筆者不反對你攞筆錢去創業，但真係得先好。商業世界，一將功成萬骨枯，筆者大大話話做過十幾盤生意，都係輸多贏少。
你筆首期除咗買樓，有冇更想達成的目標？
做人唔一定要投資，更加唔一定要買樓，每個人都有自己的選擇，例如你想用呢筆錢去結婚，又或者去還遊世界，增廣見聞，青春無悔。
只要有好的計劃，Let’s Go！呢個世界冇所謂啱定錯，不過做決定之前，一定要明白得與失，得到一啲嘢，亦都會失去一啲嘢。俗語所謂，食得鹹魚抵得渴，到時你返到玩實捱世界的時候，身邊的朋友可能已經有幾層樓揸手，甚至財務自由，唔好埋怨就得。
經濟可能會轉差，你會唔會冇嘢做？
又聽見好多專家講，現時樓價係平好多，不過經濟都差咗好多，你份工穩唔穩陣先？萬一失業咁點先？收入會唔會受經濟拖累先？例如靠自由行的前線銷售同事，佣金少了很多。
雖然話經濟會差，但係都唔會差得好緊要，香港經濟基礎穩健，正所謂東家唔打打西家，最多人工平少少，你對自己的工作能力有冇信心？
你係咪可以承受升跌的壓力？
點解你咁驚輸？市場升升跌跌是平常事，尤其是現在額外印花稅(SSD)要鎖三年，三年裏總會有升的時候，亦會有跌的時候。
如果你揸住層樓，面對類似現時的情況，報紙雜誌專揀劈價、劈租新聞出來講，身邊的朋友都話樓價會跌到人仰馬翻，你可以承受壓力嗎？
你對樓有冇認識？識唔識得去買平嘢？
好多樂觀的業主說，我自住嘛，升跌關我咩事？其實買樓自住都可以賺錢，可以套現買多間，好多好多方法。
筆者的投資組合有十多個單位，住宅工商舖都有，其實都係靠最初兩間西環樓賺返嚟，如果買錯咗就冇機會，你有冇相關知識去買到筍盤？
年輕人買樓心魔
某次講座中，與年輕人交流。
年輕人：「買樓好辛苦啊！」
筆者：「點樣辛苦呢？」
年輕人：「又要儲首期，又要供樓。」
筆者：「你依家儲咗幾多錢？」
年輕人：「30、40萬啦。」
年輕人：「就算儲到首期，每個月都要供成萬蚊。」
筆者：「就係因為咁覺得好辛苦？」
年輕人：「梗係啦，要慳住食、慳住洗。」
筆者：「如果我同你講，有個筍盤俾你，持貨三、四年，保證可以賺到100萬，如果賺唔到，我賠番畀你呢？」
年輕人：「咁，死都捱埋佢啦。」
筆者：「唔辛苦咩？」
年輕人：「就算辛苦，都係值得。」
筆者：「即刻覺得好有動力係咪？」
年輕人：「當然啦！」
筆者：「咁你明白點解我哋唔覺得辛苦啦。」
大部分年輕人都怕買樓，因為他們只看到付出。在他們眼中，買樓代表要儲首期，儲到首期之後，又要每個月畀錢供樓，每個月可以花的錢少了很多，要慳住洗、慳住食，最可怕的是這些日子唔知要捱幾耐，隨時要捱幾十年……
喜歡磚頭的朋友不會覺得辛苦，因為他們看到機會。筆者當年炒燶股票，欠下超過一年薪金的債務，債務重組，節衣縮食，還債兩年之後，再儲首期，之後又要供樓，捱了好幾年。
又以公司幾位八十後小妹為例，三年前為了上車，省吃省用，努力工作賺錢，每個年代的年輕人上車，都經過幾年血汗日子。然而，這些血汗日子，我們不覺得辛苦，反而愈來愈有動力，想買第二層樓、第三層樓，一步一步，愈走愈遠，因為我們看到的不一樣。
年輕人看到的是付出 投資者看到的是機會
年輕人看到要付多少首期、供多少樓。投資者呢？看到這個單位會賺到幾多錢，收到幾多租金。
例如幾年前筆者買了一個殘裝的單位，旺角區，30多年樓，當時區內呎價約10,000元，以這個單位330呎加330呎平台計算，合理價值應該在360至380萬元左右，如果悉心裝潢，應該可以賣到400萬元以上，筆者以280萬元就買到了。
以當時收租物業最高可以做到七成按揭計算，負面的想法是是近100萬元首期，正面的想法是這個單位幾年之後最少可以賺百多萬元。負面的想法是每月供款7,000多元，正面的想法是執靚裝修租金可高達13,000元，正現金流逾5,000元！
走進同一個單位，不同的角度就有不同的盤算。分別是，你看到的是付出，就不會買，看到機會，就馬上開票。
又會有人問：「實賺架咩？唔賺點先？」
筆者回應：「咪玩啦！如果覺得唔賺，根本就唔會買啦。」
延伸閱讀:
380萬買荃灣細單位 簽約前真係要睇清楚
太古城上月最新放盤叫價是多少？
太古城上月最新放盤叫價大約…各區樓市買賣詳情請看。
九龍區有哪些大型屋苑放盤呎價最低？
九龍區不少受歡迎的大型屋苑呎價對比上月都有回落…各區樓市買賣詳情請看。
