市區業主開始封盤

朋友：「記得，點呀？有乜好嘢呀？」
代理：「之前你咪放過XX大廈個單位嘅，仲賣唔賣呀？」
朋友：「冇乜所謂嘅，啱價咪賣囉。」
代理：「你依家諗住放咩價？」
朋友：「都係照舊放398萬啦。」
代理：「依家個市氣氛好差，呢啲價賣唔到，有冇得傾吓？」
朋友：「有票咪傾少少囉。」
代理：「300頭得唔得呀？」
朋友：「咪玩啦，我三年前270幾萬元買番嚟，賣300頭？」
代理：「依家估價跌咗好多，XX銀行都係估320萬元咋！」
朋友：「你唔好搵間再細啲？早幾日恒生仲估緊375萬元！」
代理：「依家個市差咗，係賣呢啲價。」

朋友：「咁咪唔好賣囉，我收緊1.2萬元租，又唔等錢洗。」
代理：「依家唔賣，遲啲可能跌破300萬元喎！」
朋友：「300萬？正喎！你幫我搵，加10萬同你要多間！」
代理：「真係唔賣？」
朋友：「如果你諗住鋤我，就唔好再打嚟啦！同我封盤啦！」

朋友講述事件，越講越火。佢話呢個代理唔係好熟，擺明當朋友流飛飛！

其實又唔使咁勞氣，代理都係做嘢啫。從另一個角度睇，最少佢肯試吓同業主殺價，總好過講都唔願講，第日入貨咪搵佢劈吓價囉。

翻開Facebook，仍然都係俾劈價新聞洗版。聽聞新界區不少屋苑，劈價好勁。是個別事件，還是真的血流成河，真係要自己落區睇過先知。你知香港不少傳媒精於做勢，升市的時候專講破頂、創新高，有啲仲係特色單位，梗係貴啦，低價成交當時運高睇唔到！

樓價只是回到合理水平

跌市的時候專講破底、創新低，有啲仲係凶宅，梗係平啦，高價成交當係幻覺，一定要自己細心分析。

CCL中原城市領先指數連續跌九週，由最高位逾146點跌到最新的135點，跌咗已經超過10點，整體樓市正處於一個下跌週期，這是無可爭議的事實。

部分新界區細價樓比高位回落超過兩成，例如近日河畔花園有一宗跌破300萬元的成交，被代理、傳媒大造文章，仲話同類單位最高做到370萬元云云。

如果以370萬元計，呎價高逾15,000元，一年前筆者已經多次在文章中提出預警，呎價仲貴過紅磡，溢價很高，必須小心。跌咗兩成仍然都逾12,000元，只是減去溢價，回到稍為合理的價錢而已，不算是流血劈價。

再看看市區，大幅劈價的單位更少之又少。以我們其中一個主場油尖旺區為例，很多業主都是資深投資者，之前仲會平賣一兩個單位，套現以作不時之需。這是我們其中一個面對跌市的部署，完成套現之後，其他單位很多都已經封盤，就算賣，仍然都係放番差不多價錢，情願唔賣，都唔會做爛個市。

市區供應少，租金回報高，投資者自然更有本錢去防守，好多買咗市區樓的同學們都氣定神閒，未驚過不特止，仲諗住趁跌市買多間。未來相信還要消化一年半載，幾時都話最憎大升大跌，平平穩穩先最多投資機會。