居屋都有奇則 屏欣苑廁所置中篤口篤鼻

事緣有一位疑似準買家的網友，近日在網上論壇發文求救，認為屏欣苑一睡房單位的設計相當奇怪，想將單位改造成兩房都難到喊。樓主想過將廚房及廁所擺位對調，但廚房有一條煤氣喉由橫跨廁所，如果要改喉位，絕對是一件超級麻煩事。

小編都觀察過上述圖則，確實是一個裝修難題，要諗諗點設計先符合到「有廚、有廁、有兩房」的要求。有「騎呢」的圖則，當然要花心思設計，網友都好好心提出唔少建議畀樓主，不過用唔用到就見仁見智啦！

1. 照兩房、廁所廚房保留
依個建議都好正路，但網友似乎諗漏咗兩個房開門的空置，如果只有近客廳的門，入第二間房豈不是要穿過第一間房先可以入到？

2. 有各自房門，縮房位
為就房門，將右上角的房間位置縮小，但小心連床都放唔落！即使放得落張床，想擺多個櫃都難。

3. 拆廁所一角、兩房改斜門
廁所空間已經細，拆一角就更更更細；如果想房門斜開，都要留意床的長度係咪足夠。

不過都有網友提出可行的建議，例如改為兩間眼鏡房、廚房改為開放式，或者唔造眼鏡房、造趟門同埋將房做地台等都算係合理。

其實都有網友好心水清，已經留意到最新居屋單位設計格局，同舊時和諧式公屋似到十足十，即是住公屋定居屋根本冇分別。事實上，屏欣苑一共提供2,409個單位，其中B座每層仲要劏最多34伙，既有開放式，又有一房同兩房單位，設計佈局固然唔會四四正正，所以出現騎呢則。

樓主當然可以參考網友建議，但如果真係要大改，小編深信這筆裝修費可能都好「金」。

資料來源：香港高登
撰文：CM LO