大陸盤大力發展？小心得個講字

筆者：「係呀，今年香港入咗幾間，夠皮啦，咪轉戰大陸。」
朋友：「我都有買。」
筆者：「係咩？買咗咩呀？」
朋友：「低密度豪宅，平過香港好多，千幾呎都唔使400萬元。」
筆者：「嘩﹗咪成3,000幾蚊呎，應該係靚位嚟。」
朋友：「係呀！對住成個高爾夫球場，個景靚到不得了！」
筆者：「高爾夫球場？咪好遠，邊度嚟？」
朋友：「ＸＸ市ＸＸ灣，有冇聽過？」
筆者：「冇喎！係邊架？點去架？」
朋友：「好近，深圳搭專車，四個鐘左右就到。」
筆者：「四個鐘？！會唔會遠咗啲呢？」
朋友：「而家係遠咗啲，不過唔驚，將來會大力發展。」

筆者：「大力發展？點大力發呢？」
朋友：「唔使一個鐘就到高鐵ＸＸ站，遲啲起埋輕軌仲快。」
筆者：「起緊輕軌嗱？」
朋友：「未，傾緊，代理話好快會落實。」
筆者：「會唔會傾唔成架？」
朋友：「唔會，將來會大力發展成一個六星級度假村。」
筆者：「邊個負責發展？」
朋友：「當地幾個發展商聯手打造，個個都好有實力架。」
筆者：「哦…」

相信睇過大陸樓盤的朋友，都會聽過「呢區將會『大力發展』。例如新區就會話計劃起輕軌、高速、大橋……好快就去到市中心、高鐵站；又例如舊區會話計劃起商業中心、高級住宅區、國際學校等等。」初初聽，總會心花怒放，但係聽多幾次，就會覺得「又係呢啲！」

國家級發展最可信

講真，個個樓盤都話自己嗰區會「大力發展」，唔通代理同你講，我哋呢區「冇發展」架，你買啦！

講之嘛，傾之嘛，吹吓唔得呀？最後發展唔到你咬佢咩？如何分辦呢啲所謂「大力發展」，信唔信得過呢？

首先筆者會睇「大力發展」的級別，最可靠當然是「國家級」發展，跨地區的、中央規劃的。例如高鐵，全國性的四縱四橫網絡；又例如自貿區，深圳前海、珠海橫琴及廣州南沙；又例如港珠澳大橋，連接深圳、香港、澳門及珠海幾個重要城市。

筆者認為「國家級」發展比較可信，效果亦較好，網上會有很多新聞、資料，可以深入了解、查證。

其次是「地方級規劃」，例如省市自己的規劃。今屆領導的藍圖，下屆會否跟隨？決心有多大？真係有經濟效益？定係為咗衝政績而做的大白象工程？多了一點變數。

發展商計劃要小心求證

再其次是「發展商級」規劃，是否純粹是發展商的構思。幾年前筆者中過招，到外面上創富班，認識了一夥戰友，夾份開了一家糖水店。誤信廣州某大型發展商，聲稱會將某個小區打造成美食城，最後項目爛尾，血本無歸。

其次筆者會睇「大力發展」的進度，計劃如何如何，都是紙上談兵，係咪落實咗先？幾時開工先？市場反應如何？地區是否已初步見到變化？

如果連工都未開，講到天花龍鳯都冇用，筆者會多觀察一段時間。當然，乜都未做的時候買入是最平的，項目上馬之後，買入成本會貴些少，但筆者情願賺少啲、穩陣啲。

當然亦要分析發展計劃係咪真係對物業價值有幫助。世上沒有免費午餐，想睇一次就揀中？行一轉就賺大錢？冇咁易。尤其是大陸，地大物博，個個地方都「大力發展」，揀唔中就有排坐，甚至爛尾，揀得中真係可以翻幾倍賺好多，要努力做功課。