大時代下的股樓策略

筆者：「股票？！做乜無端端咁問？」
老媽：「重播『丁蟹』嘛，股市實冧，放晒佢先啦！」
筆者：「近年好少炒股票，只係閒錢玩吓，理鬼佢呀！」
老爸：「啱啦，玩磚頭咪仲穩陣好多！」

今個星期最多散戶討論的，應該是神劇《大時代》重播吧。很多朋友說TVB的劇集行貨，又話要靠香港電視(01137)革命云云。

筆者出身於TVB，容許我為娘家講句好說話，每日兩線劇集，以平均每齣20集計算，一個月就有兩齣新劇，每年就是24齣，仲有一線處境喜劇，就等如叫我每日寫三篇Blog，邊有咁多新Idea？

《大時代》在1992年首播，至今已經23年，簡單計一計，23年乘24齣劇，期間最少製作了552齣電視劇，當中令人印象深刻的不多，《大時代》絕對是當中神劇之一，很多投資界的朋友，當年都只是黃毛小子，甚至跟筆者一樣仍然在唸書，然而卻影響深遠。

只有少數人能靠股票發達

《大時代》描寫七十年代到九十年代的香港股票市場。雖然已經23年，很多人物、情節仍然歷歷在目，深入民心的丁蟹、人生跌蕩的藍潔瑛、莊家與股神的博奕、大奇蹟日的血脈沸騰等等，都令到萬千散戶如痴如醉，馬上就想到股票市場一展身手。

當年筆者亦受到《大時代》的影響，將儲蓄戶口轉為投資戶口，小試牛刀，後來大學畢業踏足社會，更是沉迷。

輸錢皆因贏錢起，筆者最初都頻頻有斬鑊，自命股神。第一次大劫是1997年紅籌國企爆破，輸光所有積蓄。第二次是2000年科網爆破，輸到周身卡數，債務重組。

當中很多深刻教訓，有機會再詳談。2004年還清債務，用心學習炒股知識及技巧，重整旗鼓，以60,000元再開一個投資戶口，乘着經濟復甦大趨勢，一年時間變出約60萬元。適逢需要買樓自住，就將這60萬元用作首期，買了兩個單位自住。

往後筆者以玩磚頭為主，甚少再炒股。看見身邊很多前輩，靠磚頭變出數千萬元資產，個個月收租收到手軟，相反靠股票發達的就很少，甚至大部分股民最終都要輸錢。當中有很多原因，往後再慢慢詳談股票與物業的分別。

今次先分享一點，假設你有100萬元股票，第一次贏30%，第二次輸30%，第三次贏30%，第四次輸30%，第五次贏30%，第六次輸30%。六次之後，你贏定輸？打和？！錯了，答案是輸25%！

贏了就繼續瞓身，沒有部署、沒有計劃，最後不知不覺輸了錢，這就是一般散戶的寫照。

日前有一份報告指香港股民最短視，以短炒搵快錢為目標，公司業績？前景？話之佢啦！公司做乜都唔洗知啦，最緊要趁勢炒多兩轉。

切忌賣自住樓炒股

中國人賭性太強，總喜歡快上、快落的刺激。如果你都想碰碰運氣，閒錢玩玩，筆者亦不反對，惟不應該賣自住樓炒股。

筆者之前遇上一個租客，在2010年高位賣樓，租了我的單位，套現百多萬元炒股，待樓價調整，自己的股票又賺點錢，以為到時可再買番。後來樓價不斷攀升，經常聽見他在埋怨，於是筆者好言相勸。

筆者：「不如你買番層樓，睇個勢樓市有排都唔會調整。」
租客：「冇錢買啦！」
筆者：「點會呢？你嗰陣明明套現咗百幾萬元。」
租客：「唔好提啦，輸淨50萬元啦！」

當時是2011年，如果借九成按揭，屈就一吓，都可以買番層細細哋的樓住住先。可惜他就是丁蟹上身，死不認輸。後來租約期滿就搬走了，可能到今天仍然捱貴租，越住越細。

如果真係想試吓炒股，最好的方法是加按套現，按自己的能力，套現一百幾十萬元出來過過手癮，輸了就咬實牙關，每個月供多幾千元，切忌賣自住樓炒股！成熟的投資者，唔應該吓吓搏到盡，應該是有策略、有部署，投資不是賭博。