土地供應死局 又係高爾夫球場惹的禍｜香港樓市2019

朋友： 仲有好多地方未發展，棕地、農地，點解要填海？
筆者： 涉及私人業權有排搞喎，填海可以自己話事重新規劃！
朋友： 仲有高爾夫球場呢？咁大又唔用？
筆者： 可以一齊搞嘛，點解一定要分先後呢？
朋友： 要洗好多錢嘛！
筆者： 賺得番喎，可以賣地，又可以發展第三個CBD！
朋友： 總之唔收番高爾夫球場，政府做乜都反對架啦！
筆者： 原來又係高爾夫球場惹的禍…
撰文：1%Anthony ｜ 圖片：新傳媒資料室、unsplash

期待已久的土地小組報告出台…

如果期望報告幫手解決土地短缺問題，相信你會失望…

報告雖然打着「土地大辯論」旗號，但睇落似諮詢報告多於辯論。報告從18個諮詢選項中，建議政府優先發展3個短期選項，

包括發展棕地、公私營合作發展私人農地、發展部份粉嶺高爾夫球用地；另外5個中長期選項，包括填海及發展東大嶼等。

所謂諮詢，只是收集民意，然而實際幫助又有多大？

每個建議都有很多人反對，每個人反對都有自己的理由，有的是因為既得利益受衝擊，有的是因為對政府不滿，有的是因為對諮詢選項不理解。

試想想…如果忽然有人打電話俾你，問你讚唔讚成發展岩洞、運輸基建上蓋，你會點答呢？直頭唔知講乜？正常丫！

例如發展棕地、公私營合作發展私人農地，大熱勝出！

然而可行性又有多高？有幾多支持者了解呢？例如棕地，在報告中指出「分佈較為零散，大小不一，形狀通常不規則。

由於發展缺乏整體規劃，棕地多數夾雜村落、寮屋、常耕或休耕農地、魚塘，亦缺乏可支援高密度發展的交通、排污等基建配套設施。

若要發展棕地，往往需要收回及清理這些土地，過程需時，棕地作業者亦不時有重置的訴求。」

發展難度極高，就算發展到，由於土地零散，都難以有規模、有系統的發展，點解仲要堅持優先發展呢？

又例如公私營合作發展私人農地，明顯難度更高。

難度高在甚麼地方？公私營合作，冇著數，土地擁有者點會持？有著數，自然會引來利益輸送的指責，點做呢？

如果咁易傾，發展商手持大量農地，一早就大肆發發展啦，點解咁耐都搞唔掂？

再者，發展商點解要大幅增加供應，令到樓價受壓呢？

諗極都諗唔明，點解公私營合作可以大幅增加供應，但偏偏是最優先選項之一。

幾個優先選項中，最有睇頭發展部份粉嶺高爾夫球場。

反對！反對！反對！

一直以來，不少市民對於政府的建議，有理冇理都反對，是對社會貧富懸殊的控訴，只要粉嶺高爾夫球場一日唔收回，無論甚麼土地政策，都難以得到市民支持！

今次土地小組率先取回32公傾用地絕對是好開始，可能有人會問，點解唔一開始就收晒？

如果一開始就收晒，將來又何來議價空間呢？

至於填海，很多人反對，筆者亦覺得莫名其妙。

反對的人當中，很多都是年青人，更難以理解。

增加土地，起更多樓，將來得益的不是年青一代嗎？為甚麼要反對？

眾多選項之中，明顯填海是最有效增加土地的方法，由小學開始，已經學會香港地少人多，過去百多年就是不斷的移山填海，不斷發展。

相比起發展棕地、農地等，填海最大的優勢是政府可以主導整個計劃，土地要多大有多大，開則亦可以自己話事。

不似棕地東一塊，西一片，看看將軍澳及東涌等就知道，可以興建多個大型屋苑，可以重新規劃，有住宅、有商業。

不用為着回收私人土地業權而不斷的司法覆核，這絕對不是靠發展棕地農地可以做到的。