咪以為買樓收租好爽 遇上呢3類租霸 你點拆
筆者： 「租得好唔好價？」
朋友： 「幾好丫，租到1.5萬蚊。」
筆者： 「恭喜晒喎！做乜好似咁愁咁？」
朋友： 「好擔心…」
筆者： 「咩事？」
朋友： 「我可能遇到租霸。」
筆者： 「咁慘？咩情況？」
朋友： 「佢遲咗半個月冇交租啦。」
筆者： 「有冇搵過佢？」
朋友： 「梗係有啦，初初話遲幾日，噚日直頭冇聽電話。」
筆者： 「要盡快處理啦，照聽未算係最棘手嗰種租霸…」
買樓放租，最擔心當然是遇到租霸。
根據筆者及眾戰友多年收租的經驗，租霸有好幾個不同程度，如何預先察覺，避免將單位租給他們；萬一不幸遇上，要如何處理？要懂得甚麼法律知識？有甚麼法律程序？如何保障自己減少損失等，都是學問，有機會再詳談，今次先分享一下幾種租霸的特性。
Level 1：無奈型租霸
為世所逼，其實佢都唔想！
這種情況最常見，相對比較容易處理，然而卻較難防備，因為他們本來是正正常常的，正常交租、正常居住一段較長的時間，例如半年、一年，交租行為開始變得異常，最初可能是拖欠數天，又或者交住一半先，後來情況逐漸惡化，直頭唔交，成為真正租霸。
點解？人有三衰六旺嘛！就在租住你的單位期間，經濟出現問題，實在冇錢交租，為世所逼，其實佢都唔想！例如金融海嘯的時候，筆者就有租客因為被公司裁員，被逼拖租。
即使在太平盛世亦會有類似情況，曾經試過有對情侶，因為男的移情別戀，剩下女的一個人無能力支付租金。筆者及早察覺，最後都輕易解決。
Level 2：職業型租霸
習以為常，有計劃有預謀！
這種情況不算多，但近年有上升趨勢。相對於無奈型，他們很快就現形。
例如第二、三個月就開始拖租、欠租、失蹤。由於他們已經習以為常，正所謂功多藝熟，霸屋多過你租屋，趕又俾人趕過，告又俾人告過，分分鐘對租務法律，識得仲多過你，所以相對比較難處理。
然而卻較容易防備，因為他們由第一天跟你洽談，已經有計劃有預謀唔交租，比較容易看到蛛絲馬跡。如果不幸中招，就要當機立斷，立即循法律途徑處理。
Level 3：極惡型租霸
霸都唔止，仲要搞破壞！
他們不但有計劃有預謀，而且心存惡意，感覺就好似同業主有仇，不但唔交租，分分鐘仲惡過你，臨走時還會大肆破壞，例如拆走業主提供的傢俬電器，破壞天花、牆身、地板、廚房、廁所等，總之業主收樓的時候打開大門，發現自己有如置身地獄。
隨着租金不斷攀升，古怪的招數愈來愈多。近年聽過有朋友訴苦，租霸租他的單位做生意，租用你的單位，然後再間幾個梗房出租，自己就個個月收租袋袋平安，又唔交租俾業主，賺到盡。這個Level的租霸最難應付，業主的損失也最大。
因此想買樓收租，賺現金流，租務法例多少都要識！
也要懂得如何分辨租客，如何處理與租客之間的關係，如何保障自己，萬一遇上租霸要如何處理，有甚麼人可以幫手都很重要。
延伸閱讀:
太古城上月最新放盤叫價是多少？
太古城上月最新放盤叫價大約…各區樓市買賣詳情請看。
九龍區有哪些大型屋苑放盤呎價最低？
九龍區不少受歡迎的大型屋苑呎價對比上月都有回落…各區樓市買賣詳情請看。
