啟德地跌價跌到殘 發展商齊齊中伏｜凍鏈茶專欄

啟德發展區自2013年至今，已經賣出逾30幅地皮。一眾發展商好似小市民盲搶樓咁，盲搶啟德地。例如海航集團2016年以每方呎樓面地價$13,600 勇奪一幅地皮，之後新鴻基地產(0016.HK)再用$251億港元投得一幅商住地，每呎地價$17,776，成為啟德地王。最近開張嘅南豐新商場Airside，係南豐2017年用$246億港元投得，平均呎價$12,863，市場估計，Airside總建築成本高達300億港元，非常揼本。

唔講唔覺，當日林鄭仲係發展局局長時，佢嘅升職功課之一係發展東九龍，將啟德發展成CBD2，配合埋單軌鐵路，可謂願景宏大㗎。不過做咗特首之後，佢就剎停咗單軌鐵路，搞到圓唔到夢。現任特首嘅任務之一係解決青年人住屋問題，就更加要將啟德地皮選址做簡約公屋之一，同埋將啟德方艙醫院改裝為青年宿舍。