借錢拉筋 不如儲錢買樓

朋友：「估唔到咁大間健身連鎖店清盤。」
筆者：「你有冇中伏先？」
朋友：「我都有會藉，不過已經好少去，少到自己都唔記得。」
筆者：「俾咗錢都唔去？咁咪好蝕？」
朋友：「好煩架！成日有人走埋嚟問你跟唔跟教練。」
筆者：「咁又係，成日煩住你，自然就唔想去。」
朋友：「呢個苦主仲搞笑，借錢Join咗，成15萬元，要破產咁話。」
筆者：「點解咁傻？」
朋友：「佢話Sell佢個靚女教練，答應親自幫佢拉筋。」
筆者：「唔係嘛？！做乜唔去深圳按摩，15萬按到斷腳啦。」
朋友：「佢投訴俾咗錢之後，愈嚟愈少女教練，冇人幫佢拉筋。」

筆者：「咁爆笑？咁有冇美男計？即係靚仔教練劏闊太？」
朋友：「可能有架，聽聞有啲苦主Join咗幾十萬蚊。」
筆者：「幾十萬？練乜鬼呀？參加奧運咩？」
朋友：「攞啲錢去做首期買樓好過啦！」
筆者：「政府俾你買先得架，咁多辣招！」

幾年前筆者都有朋友中過招。話說朋友來自基層，在某超市做收銀，月入僅一萬元，見自己有點肥胖，就參加某連鎖健身店，心想每個月才幾百元而已，每天放工去做做運動，既可減肥，又有益健康，何樂而不為？

跟今次的苦主差不多，朋友被健身教練游說參加了一個兩萬多元的健身計劃，打電話來訴苦。

兩萬多元如果可以減肥成功，鍛鍊好自己的身體，亦算值得，於是朋友決心要做到最好，誰知上不到十堂，健身教練又說她有其他問題，游說她再參加另一個計劃，三萬多元，合共超過六萬元！

筆者：「早兩個禮拜你咪話自己好慘嘅，點解又Join三萬幾？」
朋友：「我都唔知點解，當時幾個人同我講，唔夠佢講。」
筆者：「你人工得一萬蚊，邊碌到咁多錢？」
朋友：「佢哋幫我申請埋一張新嘅信用卡。」
筆者：「咁你可以拒絕嘛！」
朋友：「我唔識點樣拒絕。」

之前筆者寫過一篇文章，說持有現金是危險的事！最近樓市調整，很多朋友都話要睇定啲，說持有現金等樓價跌，一則樓市未必會如你所願大跌，二則持有現金實在太危險了，尤其是財商不足、目標不清晰的朋友，很容易就被身邊的誘惑吞噬。

買樓是理財訓練

有人會走去炒股票，甚至炒期權窩輪，自己又唔識，最後輸到反艇。又有人會走去做生意，自己又沒有經驗，輸到一身債。近年又多了很多職場騙子，被騙去做健身、買巨額保險、炒金炒外匯等等。

對年青人來說，財商訓練很重要。買樓，不單是為了層樓，其實是一個很好的財商訓練！

如何儲首期，甚麼錢該花，甚麼錢不該花，如何設定理財目標，如何實行計劃，如何計算收益與成本，如何與不同的對手例如業主、代理、銀行、律師等打交道，買樓的過程中都會學到。

相比做生意、炒股、炒衍生工具，買樓更簡單、更穩妥。將來處理其他財務上的問題，就會更有經驗、更成熟，筆者鼓勵年青人從買樓中學習理財。