月入$55,000夫婦持2.5個物業 點樣收租先賺到盡

本人39歲，有一個兒子，6歲。月入16,000元；丈夫45歲，月入39,000元。

本人基本開支是供保險每月10,000元，丈夫是長糧公務員，每月開支23,000元（已包括供樓），還有股票20萬元，基金50萬元。

自1997年開始工作至今，本人都儲唔到50萬元，實是慚愧。 1998年時，樓市低迷，政府推出「租者置其屋」計劃，本人於是向銀行貸款，買下自己居住的公屋。

當時樓價只是19.8萬元，敘造25年按揭，由高息供到低息，每月供約1,400元；到2016年用10萬元供斷貸款。 2012年時，本人的弟弟用本人名向兩間銀行分別借了約10萬元的P Loan，投資內地買樓，之後在升值後出售賺價。

2014年，又與本人丈夫合資在深水埗買入一物業，當時用290萬元買入，由本人弟弟單名持有，現值400萬至430萬元。 本人與丈夫居住維景灣畔低層一樓，買入時475萬元，近日估價660萬元，升了185萬元。

現時想出售深水埗區的單位，拿回資金約220萬元，然後用本人名在其他地區買過一層作出租。

又或是原封不動將深水埗區單位出租，租金與弟弟對分，可免畀稅、厘印、律師費、代理佣金等使費。 其實本人人工低，有想過不買，但若放租的話，有租客代供，人工低其實都唔關事。希望諗sir指教。

讀者Maggie

文：諗sir

讀書多少同賺錢多少，無一定關係，現今比往時更見唔到這類關係。 按讀者所言，都只不過係1978年出世，不少本欄讀者應該較她更為年長。

雖然各人家境唔同，但該時代長大的小朋友，大都不需要面對無錢交學費、又或阿女被迫輟學去賺錢供阿哥讀書這回事。 留意到另一件事，就係讀者講咁多物業，好似只係得間公屋係自己名。

讀者只交待了維景灣畔物業同老公住，但唔知係聯名定單名。 至於維景灣畔買最低一層，只可以在跌市等著跳價沽都無人接呢個現實。 唔係講該屋苑，而係任何樓都唔應該買最低層。

不過，讀者離執好維景灣畔呢件事還很遙遠，都係先答讀者問題。 關於賣深水埗物業，再用讀者單名買另一單位，因讀者已有公屋，再買第二間樓要付15%重稅，尚未計佣金雜項。

故若以三個人為一體想法，賣樓就是不必。 加上讀者人工不高，利用銀行做靠山，再靠租客幫家庭儲錢，就是最好的理財策略。 人工高反而唔使點買樓，人工低先至要買樓去理財，這確是筆者想法。

因為買樓可助業主利用30年長按揭工具，去單邊睇銀紙長貶呢件事，留意香港經濟或人工都無升值20倍，但係銀紙就唔見使20倍。 但用讀者個人角度去諗，賣深水埗物業就是好做法。 既然有人畀錢用自己單名買樓，那就算要畀稅都無妨。

這些事情讀者要學好基本功，再作分析會更有效果。 人對錢財事，唔可以唔理，亦有一些事不能不著緊。做事不認真，社會自然會對你作出懲罰。 補充一句，一區樓市上升又或另一區跑慢，都有其道理。邊區跑先，唔係估估吓，根本有數據。 當然你去買海之戀，經紀梗係會比正確而又偏向一方的資料你睇啦。