上唔到車就係廢青 上到車就係死好命？
撰文：藍橘子
呢個時候，地鐵車門嘟嘟嘟嘟閂埋時，遠處有個來勢凶凶嘅阿姐，後隨一個MK仔急步想衝入嚟，我腦海頓時響起《進擊巨人》片頭曲。
只見阿姐單腳重踏一跳！跳咗入車廂之後，就企喺原地玩手機，而一直緊貼住阿姐嘅MK仔收唔切掣，一嘢撞咗落阿姐個背脊。
「X你媽仔！撞鳩我！」阿姐揪起手袖，露出白滑肉臂，粗口簡潔而精鍊。
「地鐵咁多位你唔行入啲，後面啲人點入啫。」皮包骨嘅MK仔當堂有啲怯。
「你撞我仲叫我行入啲？」
「咁你咪企喺度囉，下個站一樣俾人撞。」M仔行入車廂，使出打帶跑技巧。
「我企邊關你X事？你老母正雞X嚟！生你咁嘅X仔！信唔信我告你非禮！」阿姐運用粗口嘅技巧可以算得上係出神入化…
「要非都唔非禮你啦白雪公主！」MK仔一句收咗阿姐皮。
阿姐惱羞成怒，指住個後生仔狂鬧，手舞足蹈，相當有壓逼力，雙方一輪「你唔好郁手啊～」「我無打到你！」「夠膽你就報警囉！」嘅爭辯之後，MK仔想撳車長通訊制。
由罵戰一開始，乘客只好似戰地記者一樣拎出手機食花生。但當見到MK仔想按下車長通訊鍵，一直沉默嘅乘客就衝出嚟喝止。
「一人少句啦！」「大家都想返工啫！」「成車人都趕住返工啊！」
件事就係咁告一段落，喺呢個狹窄嘅地鐵車廂入面，就好似望見香港現時嘅縮影咁。
早一步上車嘅阿姐，自己生活穩定，上咗車就唔會理年輕一輩嘅難處。
上唔到車就係廢青，上到車就係死好命，明明車廂有好多空位，可以俾更多人上車。不過好多人都覺得，我上到車係我本事，俾更多人上車？我寧願企得鬆動啲囉。
所以，大家只顧住低頭玩手機，只要唔阻到佢返工，精神上係支持個MK仔的。不過如果搞到地鐵延誤，撳制叫車長都太激進了。
而其實唔單止老一輩會係咁，
好多人都一上車就企定定玩手機…
如果每個人都有同理心，行入兩步，香港就會美好得多。
藍橘子為80後網絡作家，憑【我是技安，我出席了大雄的葬禮】網絡創作爆紅。
facebook專頁：https://www.facebook.com/BlueGodZi/
太古城上月最新放盤叫價是多少？
太古城上月最新放盤叫價大約…各區樓市買賣詳情請看。
九龍區有哪些大型屋苑放盤呎價最低？
九龍區不少受歡迎的大型屋苑呎價對比上月都有回落…各區樓市買賣詳情請看。
