一年先儲到3萬蚊 我連公屋都買唔起

我同拍拖幾年嘅女朋友一早有共識要結婚同生小朋友，為咗小朋友嘅將來著想，就一定要有一個安樂窩。我哋夾埋月入大約三四萬，扣除大家要俾家用同日常洗費，好理想咁諗住每月輕輕鬆鬆都大約儲到一兩萬。

作為社會新鮮人，我哋仲曾經好天真咁諗住每年都一定有職升有人工加，所以喺開始儲錢嘅第一年，我哋都冇好認真咁節省洗費，只係將一年兩次旅行減至一次，係咁易減少個個禮拜出去睇戲、食好西嘅次數咁。

結果第一年後，我哋最後只儲到三四萬蚊。

跟住我哋開始認真思考點樣可以提升我哋儲錢個效率，開始訂下咗以下嘅規條：

1. 每個月只social一次

細心計過無論我哋同朋友唱K定去飲嘢，又或是我去打war game或者佢去shopping都好，每次social嘅平均洗費都近乎500蚊，有多冇少嗰隻，每個月因為咁洗多幾千蚊，但其實一年落嚟我哋每人分分鐘洗多咗成萬。為咗唔洗咁遲先買到樓再生小朋友，惟有犧牲朋友。

2. 帶飯

我哋以往都係同同事出去食，諗住可以順便聯誼吓，但下咗決心要儲錢後，大大減少咗出去食嘅次數改為帶飯食慳錢。

3. 拍拖食飯永遠控制喺150蚊內

我哋以往拍拖洗費都係出街食，諗到想食咩就食咩，好少計住計住，餐餐都兩三百蚊，一個月計埋可能又幾千蚊。所以我哋就係呢一方面著手，食日本嘢嘅時候由板長、元氣改為爭鮮就算，食吓平民茶記或者薩莉亞咁，總之我哋堅持喺150蚊之內搞掂。加上女朋友睇多咗啲烹飪有關嘅資料，有時仲會自己落手煮，再順手做埋大家嘅lunch box，又慳一筆。

4. 除咗生日之外乜嘢周年紀念唔再買禮物俾對方

呢一點係由女朋友提出，佢話反正大家一齊咁耐，諗得出嘅禮物都送過晒，不如慳返唔好送啲唔等洗嘢，努力儲錢。不過都係，因為我哋送禮物方面不嬲唔太慳，我哋互送過手錶、手袋、手飾、apple watch、iPhone甚至Macbook等，都動輒幾千至幾萬蚊，加上女朋友嘅物質要求唔高，所以佢寧願慳返等快啲買到樓算數。

喺嚴格遵守呢啲規矩嘅情況下，我哋儲錢嘅效率係高咗兩三倍，但老實講，亦都令我哋嘅生活好枯燥，做每樣同錢有關嘅嘢前都要諗好耐，由以往去做gym或者去泳池，都改為出街跑吓步算，愈嚟愈唔捨得洗錢，甚至連人哋差我十幾蚊都令我記住好耐，令錢銀對自己產生嘅心理壓力愈嚟愈大，甚至同女朋友都有幾方面嘅拗撬…… 但我愈嚟愈控制唔到自己唔去介懷，真係好痛苦。

儲到數十萬左右嘅時候我哋就開始物色吓啲樓盤，本身我哋嘅目標係市中心嘅舊樓，後來睇咗幾次樓都唔係咁啱心水，就諗住不如睇吓啲遠啲嘅新私樓咁，但新型私樓又真係好細而且啲間隔又騎尼，再計埋條數，近嘅啲裝修費同日後啲管理費等等都好甘，又打消咗個念頭。再睇吓啲大西北嘅二手盤，又再遇上啲天價維修事件嘅新聞令我哋好擔心，最後我哋連二手公屋盤都考慮埋……

喺物色單位上，其實我同女朋友已經開始有好大分歧，再傾埋結婚嘅事，可能積年累月嘅節儉習慣，搞結婚呢件事令我愈嚟愈心煩躁底，由諗住唔擺酒，到連婚紗相都唔想影。

由呢啲繁文縟節開始，我哋嘅關係愈嚟愈疏離，由不停鬧交，到交都懶得鬧，一講到結婚嘅嘢，我哋兩個都唔想再講，大家都知道其實一日未買到樓，一日都好難專心去搞結婚嘅事，而且一個乜都無嘅婚禮，或者係無論幾慳家嘅女仔都接受唔到啦。結果，有朋友撞破佢係街拖住另一個，我哋就攤咗牌，分返啲錢，分埋手。

或者肯捱同捱唔捱得係兩回事，女朋友向我坦白時話，頂唔順我愈嚟愈臭嘅脾氣，亦開始脫離我嘅步伐，接受唔到要慳到咁盡。或者佢講得啱，你唔捱得但夾硬捱，結果要對方長年累月受你氣，咪盞傷感情。。。結果分完舊錢，大家都買唔到樓，仲冇咗終身伴侶。

所以其實我講返之前嘅慳錢模式，係想俾個人版大家，咁慳法，其實都唔代表實買到，仲可能失去更多。或者當日我哋冇逼自己儲錢買樓，可能一切都唔同……