有500萬首期想買村屋求點醒 網民意見兩極：屎水倒灌VS生活態度
廣告
近年本港興起移民潮，部分人吹捧在外國住獨立屋又大又便宜，反觀香港住分層單位十分擠逼。然而，其實在香港仍有村屋可供選擇，居住環境與外國獨立屋差不多，價錢亦較屋苑式分層單位親民，不過當亦要面對按揭不足或欠缺管理等不少問題，未必個個住得慣。
日前，有網民以「有啲想買村屋，求Ｘ醒」為題在連登討論區發文，指自己憑儲蓄及買美股ETF SQQQ，總共有約5成首期，想買一千萬左右的村屋，見很多都富有靚裝修，但因擔心潛在問題，因此求網民點醒。
網民：打風可以免費拆卸天台
貼文一出，隨即引來網民兩極回應，反對樓主買村屋的網民普遍指村屋遇上惡劣天氣很麻煩、缺乏管理、地點偏僻及廁所經常出事等：
- 「買啦，落雨嗰時好正架。」
- 「買啦，你買三樓連天台既話，打風個陣隨時可以免費拆卸天台裝過個再靚d既tim。」
- 「塞化糞，打風落雨漏水，比人爆格，蛇蟲鼠蟻。」
- 「成棟樓成本300萬內頂盡住15年。」
- 「屎水成日倒灌，有時會有蜈蚣同怪蟲入屋，你忍到咪買。」
- 「啲仔女多謝你唔少，玩夜少少都的士。」
「預左電視收得差，上網成日斷，落雨會小小浸，再嚴重啲會跳電，廁所成日要搞，黃昏時分勁多昆蟲，夏天唔冷氣會勁焗，冬天會勁凍。」
網民：可以住得大啲又嫌三嫌四
但支持買村屋的網民則指住村屋空間大、有花園或天臺招呼朋友好過私樓會所、泊車平，並反駁上述網民所列缺點不是經常發生：
- 「一千買到一棟村屋，仲要有車位同花園，其實真係好Ｘ正。」
- 「住村屋=有生活態度，養牛又得。」
- 「小全幢唔使諗，真心正到痴線。」
- 「住左廿年未灌過，無怪蟲不過好多鹽蛇。」
- 「識買一定買有管理有圍牆圍住一排屋果啲，連埋車位就perfect池。」
- 「真係你要乜，三樓連天台加埋千幾呎啲地方幾好使，梗有好有唔好，住村屋有蛇蟲鼠蟻就走唔甩，吸屎都係搵人吸，當比管理費，泊車一般平啲，管理費平啲，無會所。好處就係大啲，無咁密，可以搵朋友唻bbq。啲人成日ＸＸ香港住得細，同樣價錢可以住得大啲又嫌三嫌四。」
「有得泊車，有太陽能頂賺錢，靠近大馬路唔洗入村，有hkbn，有Ｘ熊同袋鼠，屋苑式管理有看更有人幫手扔垃圾有人定期吸糞，做到每間房都有廁所，缺點：多蚊，無得一落樓就係7-11。同樣價錢地方大一倍，仲有咩好嫌。」
網民：租左試下先啦
亦有網民理性地指出買並不是問題，但應要留意按揭等現實問題，以及提醒樓主可以買屋苑式別墅，或先租住一段日子看看自己及家人是否適合：
- 「買唔係問題，但錢唔好預到太抆水，銀行批唔足會好麻煩。」
- 「一千萬複式？入唔入車？睇清楚路權，問吓hkbn有無cover，問下係咪三相電咁。」
- 「諗得村屋點解唔諗下錦繡，都係1000附近有交易，一定冇村屋咁多煩野。」
- 「建議樓主唔使心急買，租左試下先啦，睇下自己同屋企人鐘唔鐘意先，過兩年可能仲平。」
- 「住過村屋上唔翻樓，不過要考慮埋交通，你有車揸但係你啲仔女呀伴侶無車揸會唔好唔方便，半個鐘先有小巴嗰啲。」
- 「最好買有屋院式嗰啲囉，小啲問題，有野都係大家夾錢搞，又有人幫手掉垃圾。」
- 「仲有預銀行按唔足加首期可能要比多少少，早幾年買中層550，得中銀搞得足，其他都係估500。」
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
圖片來源：政府新聞處
