舒適堡結業個個抽水 李玟老公Bruce 成健身中心大贏家︳凍鏈茶專欄

舒適堡最平HK$200一個月，主打簿利多銷，但近年都俾好多連鎖式經營嘅健身公司搶走唔少生意。 據知舒適堡過去6至8個月已經唔準時出糧，爭落嘅強積金，涉及金額約HK$300萬，創辦人陸毅強仲不斷劈價賣樓，合共套現近2,700萬元。舒適堡最後好似有白武士出手打救，換上Healthy 呢個招牌，家陣都未知有冇古惑招喺後面。據知舒適堡老細陸毅強兩公婆唔掂咗好耐，但要面一直死頂，所以咪谷客買長線plan預繳大筆錢，夫婦已經被海關拘捕但未有落案起訴，盤生意搞到咁爛尾，同當年另一啲健身公司California、Fitness first都係同一命運。

講到最識賺錢嘅健身中心老闆，一定非已故樂壇天后李玟（Coco Li)老公樂裕民（Bruce Rockowitz）莫屬。樂裕民2002年同partner 開咗Pure Fitness，佢目標清晰就係凑大佢賣盤，Bruce話哂初來港係富豪嘅網球教練，多少知道運動行業經營之道，最初Pure喺IFC開張專吸金融客，入會費相宜，旨在客人個profile。2017年香港經濟高峰時，就高價將一手創辦兼湊大嘅Pure Fitness易手，接手嘅係內地一個基金，出價5億美金收購，以樂裕民手頭佔一半股權計，都套返16億元。基金本來打算以Pure呢個品牌喺大陸大搞再上市，不過冇幾耐之後，疫情就殺到嚟。

上市夢碎要經營Pure都唔係易，呢幾年中產移民，expats又走，金融業成遺址，都直接衝擊Pure生意，聽講都係由幾個會計佬去管理，當然cut得就cut， 所以唔少會員都話呢間嘢管理差咗，環境衛生都做唔好，今年四月開始，亦有傳出交租方面有些少問題，甚至不再提供毛巾，連可以報嘅瑜伽班堂數都減少，仲有唔少高層都已經跳船。不過，呢啲都唔關樂裕民事，因為佢個HK$16億早已袋袋平安。