近3年打針食藥頂到奧運 體操王子石偉雄克服傷患完賽
醫生曾表示會有斷的風險
32歲石偉雄由2012年倫敦奧運開始，到2014仁川亞運、2018雅加達亞運連贏兩屆跳馬金牌，創造香港體操歷史，2021年東京奧運參賽受傷，近3年不時要吃止痛藥及打針頂住傷患，來到2024年巴黎奧運盡力完成兩跳。賽後石仔（石偉雄）於個人社交媒體感慨巴黎奧運這一段經歷完結「上屆東京奧運，要決定喺巴黎見大家，我做到啦」
又感嘆三年的路已經不可以單用崎嶇形容，「要去世錦同奧運，一定要用世界盃拎積分黎拎資格，所以由22年頭開始我兩隻腳一直有傷都好都唔可以休息，特別係由上年世錦拎唔到資格後，我即刻做左個腰手術，我同醫生講唔好話比屋企人知，我自己一個人出入醫院就得」
透露為參加奧運而打止痛針，當中醫生亦曾表示「唔好打咁密，兩個月打兩枝唔得嫁」石仔亦回應：「我唔怕，揀得去就冇得怕，都最後一站啦，我唔想係呢個時候跑唔到，我情願斷都唔要三五七十年後後悔自己點解當初唔行多步。」
容樹恒形容「是我們心中的硬漢子真英雄。」
中大醫學院副院長、香港運動醫學及科學研究中心主任容樹恒在石仔比賽翌日一起在巴黎午膳，回顧過去20年一起克服種種困難的點點滴滴，形容石仔「是我們心中的硬漢子真英雄。」他透露「石仔由頸、膊頭、腰、大髀、膝頭、腳踭，全部都受過大大少少的傷患」、「跳馬運動需要他跑得好快、跳彈得好高，大腿力量很重要，但偏偏這段日子受着累積多年的大腿肌肉傷患困擾」並感慨一切很不容易「以一個玩跳馬膊頭要用好多力嘅運動員嚟講，其實呢個係好嚴重嘅傷，但係（佢）都咬緊牙關去克服。」
26年既體操生涯從未多謝自己
石仔表示「今次成績雖然未如理想，但係我做到自己需要做到既本分，做到享受呢個舞台，做到平常心完全冇壓力咁去比賽，我對得住自己，珍惜每一日仲可以練習同比賽既機會。」又表示感謝同路人多年來扶持，特別有治療師是即日飛來巴黎看他比賽再即晚離開，令他非常感動。
第3次參加奧運，很可能是最後一次，石仔表示沒有遺憾並向香港市民表達感謝：「多謝你哋支持我，留意香港體操呢個運動，留意香港既運動員，感恩，最後我呢26年既體操生涯從來都冇多謝過我自己，多謝你26年既堅持同努力，艱難左26年都冇放棄，當我有78歲命，你堅持左1/3你既生命日復日年復年咁做，石仔多謝你」
李麗珊李慧詩為石仔加油
李麗珊正為「HOY TV」做奧運主持，當晚直播期間提及，無論是奪金的江旻憓，還是無緣進入決賽的「香港體操王子」石偉雄，運動員都要克服傷患困難，「表達自己努力」，認為2人都值得敬重支持。
「牛下女車神」李慧詩亦感觸良多：「今日真係令到我經歷得太多嘢，由石仔開始到江旻憓，諗返起好多以前回憶」「無論得與失都好，無論你係攞到牌定攞唔到牌，其實，嗰個過程都會令到你永世難忘……嗰樣嘢未必一定係一個鼓舞，但係一定係由心裏面嘅一個原動力」。
