疫情過後受難股之一 HKTVmall生意插水｜凍鏈茶專欄

今年四月，持有HKTVmall嘅香港科技探索（01137）公布去年全年業績，收入38.1億港元，較2022年稍為下跌，但純利就大幅下跌近八成，僅錄得4,532萬港元，即係做$100生意，賺$1.2左右。HKTVmall要救亡，連本來嘅目標「2026年取得120億元總商品交易額(GMV)」都要延遲。佢哋強調「從來不怕競爭」，可能要打價格戰嚟爭取市場份額。「魔童」王維基一向最叻打價格戰，不過今次戰線唔同咗🤺。

HKTVmall一向定位清晰，嗰啲要求「最緊要夠平」，對食物重量唔重質嘅消費群，一直都唔係HKTVmall嘅主要客戶群。所以王維基上次記者會都話「HKTVmall客戶以中產為主，北上消費對平台影響不大。」相信HKTVmall睇佢自己嘅大數據都深知佢哋班客，好多都移咗民去英國、澳洲同加拿大，所以呢個價格戰由香港打到去英國同澳洲，唔少移英港人大讚HKTVmall成日出免運費、免稅優惠，如果抽中要交VAT（消費稅）嘅話就物流公司包埋，仲出埋海運，運費平一大截。佢哋就好開心，因為可以用返香港嘅價錢，食返香港嘅味道，不過大家都忍唔住問究竟仲點賺錢？