35歲已婚 消費過度只剩下10萬積蓄 想5年內買港島樓 應採用特別的投資方法｜龔成
撰文：龔成｜圖片：unsplash
另外有問題想請教你，我今年35歲，已婚，冇細路，租樓住，每月扣哂開支大慨有$10000可儲，但我積蓄只有十萬元，因之前太大洗冇錢剩。我想5年內買到細單位「首選港島」有可能嗎？我應該投資哪一類型可達標？謝謝幫忙
另外想問一下隻恒大醫藥「708」，我見佢賺錢能力好似不太好，而且最近蝕錢，但如果5年前買佢的話而家升左3千幾%，啱啱仲話出隻新能源汽車，好似同佢本質業務好冇關係，其實呢隻708值唔值得投資？
龔成老師 分析
你可以用1萬做月供，去創造一個財富增值平台。
你將每月儲到5成的資金去做月供，其餘先儲起，用一邊月供一邊儲蓄的策略。
月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、粵海（0270）、領展（0823）、希慎（0014）、太古地產（1972）或潛力股︰比亞迪（1211），中生（1177）或福壽園（1448）。
由於現時大市只是合理區較底位置，你現有10萬資金可以先投入一半，用「分注」形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨。
以恒生指數過去年平均回報10%計（連股息再投資），你每月投資$10000 + 本金10萬，5年後大約會增值至90萬，對首期應該會有幫助。
恒大健康（0708）是有風險，有回報的類別。佢業務增長的確快速，加上母公司中國恒大（3333）可以在業務上支持佢同配合佢，我相信長遠是有發展的。
雖然前景正面，但係估值方面，就好困難。佢而家仲係燒銀紙的狀態，幾時先有較具體的盈利？無人知。往後的盈利，有幾大？又無人知，市場只是估估下。
而佢現時的市值去到成3000億，只是估出來，好難用具體的財務數據支持。加上佢自己同母公司，仍然處於高負債的水平，令人較難放心投資。
近期推出新能車，這部份會發展成點，尚係未知之數。
此股潛力雖然有，但風險並存，如果你是小注的話，都可以。
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
