31歲失業女 短炒股票贏到開巷 望日賺1,000元 最終目標執100萬買多層樓

撰文：龔成｜圖片：unsplash

有20萬現金，30萬股票，15萬外幣儲蓄。 丈夫每月月入2萬5，現供樓每月用1萬2千蚊，每月可儲5000左右。

本人現時有短炒股票，以每日平均賺千多元左右為目標，資金有一直增強。

但最近大市好似唔太穩定，開始有擔心，對短炒信心愈低。

希望可以請教老師，如果希望未來十年可以有100萬增長，最終目標買多層樓收租，可以點投資？

讀者現有股票

友邦保險(01299) 61蚊買

吉利（00175）10.6買

微盟（02013）6.5買

京東（06618）149買

金沙（01928）27買

領展（00823）55、65、66.7都有買

滙豐（00005）55蚊買

雷蛇（01337）5.37買

長江基建（01038）38買

以上股票應否先止賺？

多謝老師先，留意你的page好耐，覺得你的價值觀同想法都很好。希望之後有機會能上你的課！

龔成老師 分析

第一，你現時失業，宜保守少少，留一定的現金，投資股票不宜太進取。

第二，我20年前，都是短炒者，炒左幾年，輸足幾年，之後長線投資，就開始不斷賺錢。

我好後悔當時浪費左幾年去學短炒，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒。

所以，我強烈建議你不要再短炒。

至於你現時的股票，基本上都有質素的，你可以長線。其實，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

微盟（02013）、雷蛇（01337）有潛力，但都有風險，不建議持有太多。滙豐（0005）只是收息，增長力不強，未必適合你年齡，如果股價上翻可轉其他。

現時你失業，宜保守一點。

當之後正常，就可以加大投入，如果每月能投資5000元，連同你原有的資產，10年後預期能滾存150萬元以上。