30萬本金想快速滾到100萬 買甚麼股票最理想 | 龔成信箱
老師好，如果我有本金30萬，以目前情況，要如何才較快滾到100萬呢? 買甚麼股票才最理想呢? 謝謝您。
龔成老師：
你可以投資「潛力股」+「平穩增值股」，這會對你財富有最大的增值力，但由於潛力股有一定的風險，你要有一定的投資知識才可投資，否則只能小注。
投資好難一下子將$30萬變到$100萬，但就可以平穩增值，都可以做到，當然，如果你再加大本金，追到的時間更快。
平穩增值股，你可考慮盈富（2800）、金沙（1928）、中銀（2388）、長建（1038）、港鐵（0066）等，潛力股可考慮比亞迪（1211），但由於現時市況都不平，所以買入時要分注。
同時，要留有一定的現金，不要用盡，因為無人知之後的股市會升跌，若出現下跌，你有現金就可以把握到機會。（對照龔成信箱：Q4897）
2.長線投資
成哥，想問下股票問題，如果買入優質股票做長遠投資，股市怎樣下跌，都可以不用理會股市下跌嗎？
繼續持有是嗎？
龔成老師：
如果買入的是優質股，基本上可以不理，因為股票就是企業，短期的市場報價（即股價），可以同企業本質無關，長期才會回歸企業基本面。
我地買企業就是等企業慢慢成長，因為股市跌都可以繼續持有。
好多人會認為，面對跌市，賣左先，跌左再買是最好方法，如果我地能準確預測到這走勢，的確係。
但根據過經統計，散戶往往是估錯的，所以，而結論是，無人能估到之後的股市走勢，所以「估市走勢」這方法往往不正確。（對照龔成信箱：Q4891）
3.月供股票
成老師，我想財富長遠增值儲$ 結婚買樓，應該怎樣買，增加$$ 月供或再加入什麼類月供股，或直接買入1手手那類型股票好？
正在月供下面股票(總 $8000) ，這個組合可以嗎？
0001,$1000 (約2 年)
0003,$2000 (約2年)
0066,$1000 (剛開始)
1038,$1000 (剛開始)
2800,$3000 (約2 年)
龔成老師：
月供股票是很好的累積財富方法，特別在現時市況不平的情況下。因為月供可以將買入價平均，有效將風險減少，長期令財富平種增值，因此是很好的方法，只要所供的都是優質股就得。
你所選的股票都優質穩健，基本上一直月供就得，重點是長時間進行。你繼續上述計劃就得，如果你想多點增值力，可以供多$1000在比亞迪（1211）。
不過，如果你打算結婚買入，若這個計劃會在2年內進行的話，你就要留有一定的現金數目，不要將所有資金都用作月供股票。（對照龔成信箱：Q4892）
4.知識改變命運
老師，我都已經買左好多書了，包括你既書，我覺得知識改變命運！由細到大都有個信念，就係自己一定會飛皇騰達，所以由18歲起考左十個教練牌，因為教練時薪高(每小時200∼800都有)。
我目標都係實體化要36歲(仲有4年時間)前可進入私人投資銀行(即現金及投資組合要多過800萬)我自己而家開左間教育服務中心，月入大約11萬。
本人儲蓄現金暫時只有28萬，公司有35萬現金，預計去到8月暑假，會再有70萬收入收回，(去到8月尾會有大約133萬)，外幣有9000幾美金，48000幾人民幣。
股票長短線倉大約160萬(長股票組合：匯豐[email protected], 87001匯賢產業信託有67000股@3.09(呢隻信託有8∼9厘，但唔知優唔優質),工行[email protected]，呢幾隻長線持有，另外仲有891利邦，8027吉輝，3989首創環境，同埋?輪大約15萬輪)。
債基有82萬(2015年買一隻派港幣，年回報4.2%；另一隻債基係摩根既人民幣對沖，年回報7.5%)，不過帳面虧損六萬(派息累積了十六萬)，有ibond4萬。
剛買左層新樓自住，做了8成按揭，每月供約19000，管理費大約2000
我呢排有個難題，其實我係返工一定要養車，但發展商要賣車位(百幾萬，計過買的話，要租20年先回本(以月租5000計)，成本效益唔化善)，我在想我應該買定租(4000∼5000月租，怕租唔到)。
另外買樓個度有兩成(即124萬係發展商二按，第三年起，年率利4.5%，如果三年內還清會回贈60000比我)，我究竟黎緊儲既錢係用黎投資(買債/債基/股票)定提早還款 或買車位？
定係將股票套出買高息企業債券，再用疊增方法提高回報呢(年回報10%)？好苦惱………有勞謝手，謝~~
龔成老師：
你有一個明確目標十分好，這是完成目標的重要一步，我相信你可以在4年內做到的！
資產分配可以再優化，先講股票，不建議短炒，因為根據我過往做銀行及證券行的經驗，所有短炒客都是輸多贏少的。買股票是買企業，希望你明白這點。
匯豐（0005）質素不差，但之過往時代已轉弱，持有收息可以，但不要對股價有太大期望。匯賢（87001）有質素的，可長期持有收息，雖然穩定性不及香港的房託，但只要長持就無問題。
工行（1398）可持有，這是不錯的收息股，但你長線組合只有3隻股票，更同時有2隻是銀行股，會產生集中風險，你應分配更多到其他類別裡。我地不是要炒股票，而是將財富，建立一個平衡、優質的組合，長線令財富增值。
債券基金方面，你仍年輕，其實可將更多資金，投資在增值類的資產項中，以「先增值，後現金流」作人生財富累積的策略。債券基金雖然都可投資，但以你的年紀，可以調低持有比例，相信長遠來說，你持有盈富基金（2800），會對你財富有更大的增值效果。
車位方面，現時的確不平，你買車位用的資金，雖然可省去租車位的錢，但會損失機會成本，現時車位租金回報率約3%，若你將該筆資金投資收息股5%，會有更大的回報。
物業按揭方面，4.5%雖然有少少高，但又不算好高，如果將這筆資金同於增值，只要回報高於4.5%，那麼不還錢會較好。因此，好睇你有無信心，保留資金後會取得4.5%以上的回報，如果無的話，可以還部分錢先。
其實我唔太建議還晒所有錢，因為會令你無晒資金在手，令財富減少增值力。
高息企業債券有利有弊，不要只睇回報，要睇風險，債券的二手價格都可以下跌好多的。（對照龔成信箱：Q4893）
5.優質股一問
成哥，我想問860,3918是否優質？
謝謝
龔成老師：
奧立仕（0860）有保留，佢從事好多業務，珠寶產品、書寫工具及鐘錶之出口及國內貿易、零售與批發、開採、借貸及證券投資等，其實有點雜。
過往的生意不斷下跌，同時年年都出現虧損，見唔到有投資價值，雖然有時這股有炒作，但我從本質角度分析，對這股有保留。
金界控股（3918）有質素的，佢係柬埔寨最大的酒店、博彩及娛樂運營商，旗艦NagaWorld是金邊市唯一的綜合式酒店及賭場娛樂城，持有為期達70年至2065年的賭場牌照。
同埋佢亦享有在金邊市方圓200公里範圍（柬越邊境地區、Bokor、Kirirom Mountains及Sihanoukville除外）內至2035年屆滿為期的獨家賭場經營權。
賭業本身是高毛利行業，而金界壟斷了金邊的業務，加上業務平穩，財務穩健，沒有未償還借貸及債務，企業有一定的質素。
但金界所發展的是較新興的市場（柬埔寨、俄羅斯），若然比較澳門的賭業股，金界的增長及潛力較大，但當中的風險同樣略高，因為業務難免存有不確定性，在注碼上不能去得太盡。（對照龔成信箱：Q4894）
6.供基金定股票
老師，我而家供緊基金，但又想月供股票，所以想請教：
月供股票可能每個月收佣金，又未必一定可以賣得來提款（因為可能有條款）咁我宜家不如供返之前供梗既基金plan重新供返咪仲好？
因為我有份基金plan，咁我研究返基金既股票會唔會黎得實際？因為我已有少少錢留起一手一手咁入，咁係咪不需再搞月供股票，直接研究返舊基金plan ge股票就可以？
thanks
龔成老師：
月供股票的條款，一般都比傳統基金寬鬆的，當然，每間銀行不同。手續費方面，有些銀行都不貴的，因此你可以先找下資料，再決定。
不過，月供股票，還是基金，上述都只是小問題，最核心要考慮的，是該項目在長期能為你財富增值多少，當中的質素如果，前景如果，才是你要分析的核心。所以，你可先了解翻原基金的資產組成、過往表現、前景。（對照龔成信箱：Q4895）
7.投資心態
老師~我之前入左建行，因為擔心而調整部署，所以在其後止賺離場。
呢一次沽售係自己第一次沽貨同埋第一次獲利。有種感覺自己仲係一好新手投資者。原本投資係打算長渣，但係股價反覆太大就止賺離場。
往後仲需要多多學習同支持龔sir指教！
龔成老師：
投資股票一定要自己經歷的，當中的心理恐懼與興奮，只有經歷過先學到的，這次你可以當吸收經驗，無問題的。
但你都要明白，買股票就是買企業，這是長線等企業成長的行為，股價中短期上落，只是一個市場報價，可以同企業面無關的，這點，你要慢慢明白。
同埋，你下次在入市後，要學懂平常心面對股價上落。（對照龔成信箱：Q4896）
8.三盛控股
龔老師 最近遇到一個問題 我雖然好想入一隻叫三盛控股既股票 但一直比佢既股價令我有點兒卻步 所以希望龔老師可以幫小弟分析一下現價值唔值得入手
小弟如入手 應該以5手為最少不過最多亦只會入10手左右
如現價不值得入手 咁應該入手價會係幾多呢？
呢隻雖然沒有收息 但係我都係作長線投資之用
龔成老師：
三盛控股（2183）由利福國際（1212）分拆上市。主要經營物業開發及物業投資，透過資本增值獲取回報，包括開發發展中物業及翻新已落成物業、出租物業、於出租或出售物業前進行增值工程（包括興建、重新設計及翻新）。
這間公司，都幾難分析，因為過往無乜做過生意，但又唔係無發展，劉鑾鴻佢地玩財技，外人好難知道種種玩法，所以無得從過往業績分析，只能分析現有資產同發展。
係2018年2月，佢以7億元人民幣投得福州市馬尾區土地。2017年，佢以5億元人民幣收購香港中盛置業投資9成權益，其主要業務為物業投資及物業管理。
佢現時市值近$50億，如果只睇佢的資產淨值，唔值呢個價，相信市場考慮埋佢未來的發展，但這方面你要再找更多資料，先可以得到發展潛力，因為我都未仔細睇。
如你想投資這股，我不建議太多，始終不確定性較大。（對照龔成信箱：Q4898）
9.紫金磺業
老師，紫金值得投資嗎？
另外，平保點先叫平 到邊個價入好呢？
龔成老師：
紫金礦業（2899）質素不過不失，佢主要係中國從事黃金及有色金屬勘探、開發和銷售，並以黃金生產為主的大型綜合性礦業集團。
本身有一定的規模，但始終是商品企業，盈利有點被動。睇翻佢過往的財務數據，生意不斷增長，但盈利有點波動，唔會因生意多左盈利就增加，因為佢點都要跟住金價的走向，所以盈利被動，缺乏價格自主的能力。
這股不是無質素，但就不會太高，投資都可以，但不要太大注。
中國平安（2318）要大幅下跌先會去到平宜價的水平。
這股有質素，長線發展唔錯，但近期已經開始有少少貴，保險企業除左自己保險業務賺錢外，同時會將收來的淨存金用作投資，部分會投資到股市，當股市大升，佢的中短期盈利會增加，股價向上。
因此，只有當股市大跌時，佢中短期盈利會大跌，這是才是真正的平宜價。（對照龔成信箱：Q4899）
10.十年投資之選
龔成老師，如果以長渣去計算（10年以上）煤氣是否一個好選擇？
假設股價跟現價一樣 我月供2500煤氣 一年將會供到2手如無意外 每10股送1股 一年加埋會有2200股
如果無理解錯誤 以每年入兩手去計 去到第4年出完紅利後會有10210股 假設之後唔再月供 一年起碼都有一手
當然我知道每次拆股 股價都會低 亦都可以襯佢拆果時 一次過多買一手兩手 同埋煤氣係必需品 股價應該唔會有太大波福 求指教 謝謝
龔成老師：
你理解的正確，月供煤氣（0003）是不錯的選擇，一般都會每年有10送1，但送股後，股價會調整，這是自然反映送股的現象。
煤氣是必需品，股價的確唔會有好大變動，而佢發展緊大陸，這有穩中求勝的作用，不過近年股價一直處不平宜的水平，因此，同月供策略，慢慢儲這股，是最好的。如果股價有較大的下跌，令是難得機會，到時可再買多一兩手。以長線及超長線可式持有，是最好的。
你以這個策略進行就可以了。（對照龔成信箱：Q4900）
編按：龔成是於公屋長大的80後青年，畢業後於銀行從事投資相關工作，雖然月薪僅萬多元，但因為理財及投資有道，只花五年時間，於28歲已累積到100萬元資產，目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》，並出任創富課程導師。
