23歲月入三萬無資產 想30歲前買樓 點儲首期 | 龔成信箱
1．儲首期
你好 本人23歲 剛工作幾個月 月入3萬
扣除生活開支家用 每月能儲蓄1萬至1萬5
因繼續進修 頭年半需繳交7萬學費 暫時沒有任何資產 完全冇投資經驗
見到不少銀行有月供股票 本人應該嘗試由月供股票接觸投資 還是再累積資金直接購買股票較好 應該怎樣分配自己可儲蓄的收入主要希望透過投資累積財富能在30歲前能有首期置業
感謝！
龔成老師：
你先要預留$7萬學費，這部分不要動用投資，至於其餘部分，則可以運用投資及增值。以你的年齡及儲蓄情況，可以累積到一定的財富。
對初階者來說，月供股票是最適合的，因為買入價會平均。你可以用一邊月供一邊儲現金的模式進行，可以每月將$7000-$10000用作月供股票。
以你的年齡，可以供平穩增值股及潛力股，盈富（2800）、中銀（2388）、長建（1038）、港鐵（0066）、領展（0823）、金沙（1928）都可考慮，同時小注月供潛力股比亞迪（1211），只要長期進行，你就可以累積到一定的財富。
至於餘下的現金，扣除你所需的部分，之後就是等機會，若果大市出現較大的下跌時，就會動用這部分的資金。
當然，你年輕，將來的複息滾存效果會好大，我希望你能好好學投資，選股及把握買賣時機的能力，這會對你將來影響好大。（對照龔成信箱：Q5158）
2．盈富（2800）
你好成哥。開始左月供投票2800，3000蚊
但如果我想進取啲我搵咗幾隻2007、0004、823、0066，我應該點組合好？喺依4隻到揀一隻好？定2隻？但係剛開始會唔會太快？
同我銀行正個陣又聽個有月供基金 當時唔係好明，佢話比月供投票有彈性，月供基金同股票有咩分別？
龔成老師：
如果你資金許可，你可以月供$5000，其中$3000是盈富（2800），領展（0823）及港鐵（0066）可各$1000，碧桂園（2007）略有風險，未必適合投資，九龍倉集團（0004）已將最好的資產轉到九龍倉置業（1997）。
月供多少錢，最緊要睇你每月有多少錢剩，如果你每月可儲蓄的金額只有$5000，將全部都作月供股就太多，但如果你可以儲$7000以上，那就適合。因為我想你每月點都要有少少現金剩。
正於月供股票與月供基金，最大的分別是投資項目不同，一個是買股票，一個是買基金，基金有好多潛在的收費，你的成本會較高，銀行職員有數，當然會叫你買基金。（對照龔成信箱：Q5149）
3．儲蓄保險
龔sir 你好。我有主要有兩個問題想請教老師的
第一。老師常常叫我地月供股票 但股票通常要一手一手買 如一手939 已經要8千多 如果一個月的資金只有兩千 咁咪一季至半年先可以買一手 咁樣子係唔係一個好方法？
另外。現時好多保險公司的投資產品 儲蓄保險 我上網睇左好多資料 好多人都叫人千祈唔好買 甚至有人講一買即蝕 不知老師有何睇法
謝謝
龔成老師：
1）月供股票的好處，是買入價能充份平均，例如你每月投入$10000去月供，如果頭3個月的股價是$4、$5、$6，你買入的股數是2500股、2000股、1667股，你的平均價是$4.86，比起單憑$4、$5、$6的平均價$5，會有更平的效果。
這是由於股價高時，你會買入較少的股數，低時會買入更多。
由於月供股票是長期進行，最好月供3-5年或更長，所以，碎股問題好少，同時，不少銀行都提供，月供股得來的碎股，可以比你以正股價賣出，所以不用擔心。
2）要睇下咩產品先知，不能一下子否定。
保險公司較多是防守類的產品，風險不高，但要鎖死資金一段時間，所以一開始可能會蝕，但可能長期會有回報。
我地進行理財，要攻守兼備，這類產品可能有價值（但真的要睇過先知）。不過，年輕人不應分配太多在防守類產品，適當就夠，反而應集中進攻。（對照龔成信箱：Q5151）
4．便宜優質股
本人36歲，睇了你3本書，現主要想每月儲$2000，等待跌市時買便宜優質股，同時用$3000月供平穩增值股，供20年！
希望整體表現每年平均有15%以上的增值！
$1500 中華媒氣
$500 長江基建
$500 港鐵
$500 比亞迪
這樣可以嗎？現價格有點貴，是否仍可以開始月供計劃？
龔成老師：
可以呀，你的年齡可以用平穩增值股為核心，再加小小潛力股，你月供的分配是可以的。
再加上現時大市不平宜，最好用「一邊月供，一邊儲現金」作為策略，所以，雖然大市現時有點貴，但只要月供時間夠長，價格得以平均，就無問題的，所以已經可以進行。（對照龔成信箱：Q5152）
5．股票合理價
請問，1177,1093,1317,2020
合理價是多少?
是優質股嗎？
龔成老師：
中國生物製藥（1177）有質素，有潛力，但現時已貴。
石藥集團（1093）同樣有質素及潛力，但現價同樣處貴水平。
楓葉教育（1317）同樣正面，有增長力，現時小小貴。
安踏體育（2020）發展正面，但規模唔細，唔好預佢高增長，現時估值略貴。（對照龔成信箱：Q5153）
6．月供股票
你好，我想請教一下月供股票的問題，其實要供到幾時會轉供第隻？供到放先停？定供到某個股數就停？
龔成老師：
月供股票是一個長年期進行的過程，一般供3-5年或以上，愈長愈好，如果資金許可，可以一直供。當供到這股處於過熱往，就就可能減少供款，又或賣出轉其他股，但就算一直供都無問題，因為我地以「儲資產」的模式進行。
通常年輕時，會供潛力股及平穩增長股，到年齡漸長時，就會開始供收息股，這是一個建立財富組合的過程。（對照龔成信箱：Q5154）
7．雲遊控股（0484）
龔生，請問484雲遊控股，是怎樣的股票，買入時17元，現在只有9元
另外也想問下1415高偉電子這個股票，謝謝您
龔成老師：
雲遊控股（0484）比較麻煩，佢的生意不斷下跌，而且已出現多年的虧損，係咁樣的前提下，企業價值只會不斷向下，這類股投資價值不大，長期股價將下跌。
除非佢的業務有突破，又或出了一些好爆的遊戲，否則，佢只會繼續處較弱的情況。如果你持貨唔多，都可以博下，因為遊戲可以爆，又可以無人玩，所以要睇你博唔博。但如果你持貨較多，要先減持一d先。
高偉電子（1415）不過不失，生意無大增長，盈利雖然有，但有少少不穩，現時估值不貴是這股的賣點，投資價值中等。
（對照龔成信箱：Q5155）
8．成份股
老師請問盈富基金 你提過有50隻成份股！其實有咩成份股呢？？
龔成老師：
其實盈富基金（2800）就是一隻追蹤著恆生指數的基金，恆生指數由50隻成份股組成，所以就是這50隻股票，例如長和（0001）、中電（0002）、煤氣（0003）、匯豐（0005）、電能（0006）、恆生（0011）等等。
這些都是有質素，最有代表性的股票，都可以長線投資的。你只要上一般的財經網站，找恆生指數的成份股，就會見到晒這50隻是甚麼。（對照龔成信箱：Q5156）
9．月供比例
成哥：我月儲5000 打算用3000月供 本身冇咩投資經驗 咁組合你覺得點？
2000盈富 500港燈 500比亞迪
因無負擔 可唔可可以供多啲定點分配？
另外有56萬 打算跌市時用30萬分幾注入盈富，其他留反等機會。咁策略上有冇問題？
另外，你會唔會再開星期六班？
龔成老師：
月供比例適合，可以開始月供。當中有增值及潛力，分配無問題。你以上述一邊月供，一邊儲現金的模式進行，長期去供就可以了。
至於你持有的$56萬，如果你這刻無任何股票，其實這刻都可以將其中的$5萬-$10萬入貨。因為好多人都會用等跌買入這模式進行投資，但如果個市唔跌，你就會損失機會成本，所以，你這刻最好有小小貨先，打左個底，之後先用等跌買入的策略。
這刻大市雖不平，但又未算好貴。如果你擔心貴，可以買收息股，現時這類股相對較合理。
星期六班我久不久都會開，但比閒日班少，你可以留意我的公佈。（對照龔成信箱：Q5157）
10．欠200萬供款
成哥，我有層樓收租，但無股票，現時仲欠緊200萬供款，市值650萬，每月收租14300，每月還款10600，請問有無更好嘅方法投資呀？
另外，你嘅書真系好易明白，我諗住睇完兩本書就報課程，因為我有啲都要諗好耐先明，我驚上堂嘅時候聽唔明當中嘅原理，有幸遇上成哥嘅投資教學，我宜家會努力儲錢，去計劃20年後嘅我
龔成老師：
收租樓每月都有正現金流，這是不錯的情況，暫時不要有大動作就得。你這刻集中做好財富增值就得，你現時的財富分類，集中在物業裡，所以應該強化其他類別，例如以月供等模式去儲股票資產，令你財富增值之餘，又可以有平衡分配的效果。
對！你以長年期計劃的策略進行，是十分好的，我地投資不是炒賣，是建立一個財富組合，長期增值。
你可以保持睇書增值，之後報讀我的課租，兩者配合更有相輔相承的效果。其實我近期的課程都爆左，所以最近的課程都要兩個月後先上到。總之，你保持知識增值就得。（對照龔成信箱：Q5159）
