唔想踩地雷？2025理財投資要睇特朗普！｜凍鏈茶專欄
廣告
特朗普1月20日上任以來，只係短短幾十日，已經弄得美國以至環球翻雲覆雨。香港當然不能置身事外，喺美中貿易戰嘅關稅影響下，香港同內地一樣都要俾額外關稅。美國郵政曾經宣布暫停接收嚟自中國同香港嘅包裹，雖然只係暫停咗一日，但我哋都唔可以掉以輕心，因為關稅隨時話嚟就嚟。
特朗普上任，香港人「荷包」一定會受影響，以下幾個重點你要知：
1️⃣現時美國息口仍然維持高位，但香港息口就愈來愈低，唔少人就將港元轉為美元做定期。由於未來市場有好多未知之數，暫時咁樣做睇落係最穩陣嘅。不過留意返，特朗普要求聯儲局減息，並指打算「在適當的時候」與聯儲局主席鮑威爾談話，他更揚言「我想在利率上我比他們要懂得更多，而且我認為我比主要負責做決定的人肯定也懂得更多」，咁樣講好似暗示息口方向隨時改得。同時，中國不斷拋售美債，美元好難一直強勢，所以美元定期係咪一個長期嘅避風港有待商榷。加上特朗普家族生意涉地產，又點會唔想減息？
2️⃣之前因為擔心地緣政治緊張加埋聯儲局今年減息，有唔少人用低息借日元買黃金。不過特朗普上任之後，黃金價格即時受壓。未來睇黃金價就要睇特朗普嘅關稅措施有幾強硬，會唔會進一步推高通脹。
最後，就是大家最關心嘅股市。特朗普2017年至2021在任期間，美股表現好過大多數前任總統在任時嘅表現。特朗普對上一次做總統，標普累計漲幅已經達到50%以上，係歷任總統上任三年以後平均市場回報率嘅兩倍多。佢依家再次上任，傾向低稅率同寬鬆措施，進一步令大家都對美股有期待。不過，有啲板塊要識避開，例如，特朗普要壓制油價，油股就要小心。另外，一啲同中國貿易關係密切或者同內地企業有關嘅板塊，可能都會面對風險，大家要特別小心﹗
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
