$16高追希瑪眼科 搵機會沽定長線 | 龔成信箱
撰文：龔成 ｜圖片：網絡圖片
1.$16高追希瑪眼科，搵機會沽定長線？
大師~借問聲
3309我之前一時衝動，16蚊入左
現在如何是好？
龔成老師：
希瑪眼科（3309）的估值的確過高，睇翻佢之前的盈利，大多是幾千萬一年，就算當佢是有潛力的股票，市盈率50倍，假設將來盈利增長，一年能賺$1億，企業價值應該是$50億。
但現時的市值已達到$150億的水平，明顯地已是過高。
這股上市時的估值，已反映了佢的增長及潛力，之後所升的，都只是市場比佢的概念價值，以及炒價。所以，你最好找機會放。
至於幾時放，其實睇你博唔博，無錯，佢的股價已經偏離價值，但市場仍炒緊這類股，加上概念價值呢樣野，其實變化好大（即是可令佢大升大跌），所以股價仍有機會上升，但緊記，這些炒價無人知幾時近回合理價，所以，如果你太大注，就要先賣出部分，風險就能有效減少。
2.定期plan與月供股票
你好，我想問銀行果d定期每月供錢 10年後計息比番你果d plan同月供股票有咩分別
如果有心月供十年差別大唔大
龔成老師：
當中的性質其實是不同的，供銀行的產品，是持續將錢買他們的產品，不同產品有不同的特性，長遠有不同的回報。至於月供股票，則是你每月將錢，買入某些股票，沒有年期限制。
一般來說，銀行產品的回報較為穩健，你到期時可得到指定的回報，又或中途得到股票，這類產品風險較少，但回報同樣不多。
月供股票則有較大的回報，只要你長期進行月供，風險不大，一般的回報不差。因此，比起銀行產品，月供股票回報較高，同時風險比產品高。
3.放平保入港鐵/碧貴園點睇
龔成. 我平保78.6買而家就90 放唔放好 我想試下買港鐵/碧貴園。 成本唔多 想積少成多
龔成老師：
如果你是中短線的投資者，其實已可獲利。但如果當初打算長線，那一直持有平安（2318）都可以，這股始終有質素，長遠有增值力。
至於是否轉到其他股，同佢的股價、入場費、手數等無關，關鍵在於如何令總財富有最大的長遠增值空間。
4.藍籌4揀2
龔成老師你好！我是家中獨女，眼見兩老即將退休，想學習為自己的資產增值。
出來工作兩年，儲了10萬餘錢（可動用），打算用來投資藍籌股長遠收息。看過多個你的解答，若我打算各以5萬投資兩隻股票，請問以下4隻你會怎樣選擇呢？有甚麼分別呢？謝謝！
港鐵0066、中銀2388、香港電訊6823、港燈2638
龔成老師：
一般來說，我地會用「先增值，後現金流」作為人生累積財富的模式，年輕人較著重增值，之後才慢慢追求現金流。當然，增值的股票風險會高少少，同埋要有一定的投資技巧。
所以，如果你本身的技巧不算高，同時個人承受風險能力較低，那就可以用「平穩股+收息股」作為投資的策略。
港鐵（0066）及中銀（2388）都是增值股，企業仍有發展的能力，派息則不過不失。而港燈（2638）及香港電訊（6823）是收息股，企業的增值能力好少，將賺到的錢，都用作派息給投資者，所以股息回報不錯，同時股價的波動不大。
上述4隻都是優質股，如果你打算投資5萬，可選1隻增值股及一隻收息股就可以了。但你要明白，現時市況不算平，可以的話就分注買入，同時買入後，平常心面對股價上落，集中長期價值及收息就可以了。
5.博700大升
你好，現時個倉分佈係︰
中華煤氣: 22,000 股 ($14.78買)
騰訊: 100 股 ($429.4買)
玖瓏紙業: 2000 股 ($12.94買)
每月可以儲 $10-12k
諗住目標係儲夠 10萬股煤氣 (主要係睇中佢10送1)
我呢個方向會太保守，需要調整？
揀 700, 2689 都係博佢大升，將贊到ge 拎去買3號
（因為工作關係，同你之前開班GE撞哂時間。決心今年要上到你GE加強版課堂。）
龔成老師：
煤氣（0003）及騰訊（0700）都有質素，可長線持有，但玖龍紙業（2689）的質素則只屬中等。另外，你的組合有集中情況，可以的話，分散少少到不同的類別，又或買盈富（2800），令組合更為平衡。
同埋我地好難用「博佢大升」這一方法，只會持有優質股，等企業成長，然後耐心等收成。
如果將之後的組合都集中煤氣，風險會較大，所以平衡持有不同類型的股，相信會更好。
6.持有定離場收錢
你好，請問1288同3988升到咁高係咪應該放左佢？
1288我2.88買入3手
3988我3.23買入1手謝謝。
龔成老師：
其實可以持有，現時雖然升了不少，但又未到好貴的水平，加上本質不差。
除非你本身好多貨，咁就可以減少少股票，否則，你一直持有都無問題，因為現金不是財富，優質股才是，賣出股票的意義不大，除非過熱，又或你要減股票比例，否則一直持有優質股，其實可以的。
7.中銀月供＄5000
龔sir，想問中銀3988，長期持有，加月供$5000，好不？
龔成老師：
中國銀行（3988）是中國四大商業銀行之一，總部設於北京，在全球為客戶提供全面的金融服務，規模相當龐大，但增長力不高。
這股有質素的，可以長線持有，月供都可以，但你最好著眼於收息，股價不要有太大的期望，相信平穩增值可以。
8.高追1211應否止蝕
如果我75蚊買1211係咪應該止蝕
同埋點解1211都唔受惠於今次升浪
龔成老師：
比亞迪（1211）是潛力股，同時有質素，加上你買入價不是好貴，不用止蝕。止蝕不是基於買入價或現價，而是基於企業質素，只有在企業質素轉差的情況下，我地才會做出止蝕。
這股在一年前是$40，已經升了7成，基本上已經在近一年的升浪中跑贏大市，因為我地唔會太著重短期股價，而會著重長期的。
同埋，企業的長期發展最重要，大市升浪只是外在因素，企業價值是實際因素。我地投資股票，就是買入企業，將錢投資後，慢慢等企業成長，之後才慢慢是收成期，這些因素可以同大市無關修。
9.盲跟IGG雷蛇，應如何部署
龔老師你好，剛睇完你的80後2百萬富翁對我好大啟發，我正係好似你書中講ge投資新手
我之前盲跟的情況下入手左 0799 平均價10.2 同 1337 平均價4.2，想請教下老師會有咩建議？
龔成老師：
所有學習都有一個過程，實驗與經歷都係，呢個會幫你進步。
IGG（0799）行業的變化好大，業務不確定，有時會較易賺錢，有時可以蝕錢，一個好的遊戲，可以好好賺，但熱潮又可以好快無。這個是這呢股的特性，唔係話唔可以投資，而係你要明白呢個特性，因此要在注碼上控制。
雷蛇（1337）這類新興行業，當然有一定的潛力，不過，這類新公司，亦面對好大的風險，佢現時處於虧損狀態，但市值有成$300億，呢個係一個好誇張的數。
這刻沒有實質的業/務價值，但估值好高，即是大部分估值都是來自概念價值，而這個價值值多少，根本無人知，同時變化好大，可以好勁，亦可以一文不值，所以，你要明白這股的風險，不要太大注。佢股價可以好波動。
因此，如果你注碼唔大，都可以持有住先，但就要明白這股的風險與特性。
10.電能普及會影響煤氣（0003）
龔Sir……一路都很欣賞你踏實的個性，經常強調投資不是短炒，在你的文章及影片學習了很多關於投資的知識。雖然我好想讀你的課程，但一直時間都就不到。
但我一直有推介朋友讚你的網頁及去報讀你的課程，最近我介紹了朋友去讀你的課程，他說真的獲益良多，教導很實在。
另外，關於之前你影片有分析3號煤氣，想問下現在用電已經很普及，這會對用煤氣盈利造成壓力嗎？
龔成老師：
我相信讀過我課程的學員，都會覺得我同出面的課租唔同，我教的是最根本的投資模式，即是買股票就是買企業，所以集中在企業分析，而不是炒炒賣賣，而不是吹水。
雖然這套方法，你好難今日學，明天即刻有錢賺，但睇翻世上賺最多錢的投資者、基金經理，佢地都用呢套方法，證明這方法的價值。
煤氣（0003）是有質素的股票，雖然電力會搶了少少市場，但根據過往數據，其實唔多，同時煤氣用戶仍不斷增長。加上佢不斷發展內地的燃氣市場，這是增長力所在，所以這股仍然正面。但由於估值一直都不平宜，所以最好用月供模式買入這股。
希望遲些在課堂中見到你。【體驗1分鐘貸款批核 隨時提款話咁易】 http://p.nmg.com.hk/afowy4
編按：龔成是於公屋長大的80後青年，畢業後於銀行從事投資相關工作，雖然月薪僅萬多元，但因為理財及投資有道，只花五年時間，於28歲已累積到100萬元資產，目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》，並出任創富課程導師。
facebook專頁：facebook.com/80shing
個人網站：80shing.skx.io/
