$100 印花稅 發展商趁勢甩納米、細價樓︳凍鏈茶專欄
廣告
新一份《財政預算案》，財爺放寬印花稅門檻，由即時起將HK$100印花稅門檻，由上限300萬元提高至400萬元。發展商亦藉住呢幾萬蚊嘅小恩小惠，乘勢推細價盤。
元朗新盤慳六萬
嘉里建設（0683.HK）旗下元朗新盤朗天峰，3月1日即推售121伙，呢個盤一房單位入場費為425.6萬元，不過扣減所有折扣，同埋現金回贈之後折實售價為347.2萬元，買家即時受惠，本來要俾6萬元印花稅，而家只係比100蚊，慳咗「大拿拿」六萬蚊，據聞只賣剩2伙。
趁氣氛好一次過推出
另外，宏安地產（1243.HK）位於鴨脷洲惠風街1號新盤Coasto亦於3月1日展開銷售，盡推首兩張價單，合共60伙。入場費381.6萬元，當中有6伙單位折實價低於400萬元。除此之外，仲有唔少四百萬樓上嘅單位都趁氣氛好，尋日「搏大霧」一次過推出。是關印花稅大劈價，憧憬有短炒嘅利潤空間，無疑為近年難甩手嘅納米樓提供逃生門，所以呢個時候唔出貨，仲有幾時可以出貨呢？
如無實力 勸大家要諗清楚
政府早前無聽意見，比市民提早拎MPF買樓，相反重推呢啲印花稅招數，小恩小惠吸客。就好似當年前特首林鄭月娥在其任內提出，首置人士可以免壓測申請按揭保險，而總貸款額亦有所增加，物業屬800萬元或以下，可申請最高9成按揭，最後引咗唔少無實力嘅人上車。今次新招主要吸引細價樓嘅準業主，相信實力亦相對地有限，而且呢類二、三線新盤，質素亦不是特別高，他日是否可以轉手賺一筆？還是勸大家要諗清楚。
諗起當年林鄭推首置借9成，引咗唔少無實力嘅人上車
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
