龔成問答信箱6

唔打算買樓，由於唔細，想住好d，打算用約8,000元住。但這樣一來，儲到的錢就少一半。好矛盾，資金當然愈多愈好，但我應該有多少積蓄，又或者我租屋同收入比例係幾多才合理？

龔成：一般來說，住的支出佔收入四分之一是理想，但近年香港租金情況實在太誇張，所以未必個個做到，所以我認為底線是三分一。以你的情況，約6,000元較理想，8,000元勉強可以，但可說是底線。

其實住很視乎你的個人情況，若然有實際需要，如有家庭，要住大一點的地方，那儲少一點錢亦可。若然只是自己想提升生活，就要在住屋及儲錢方面取平衡，因為住屋是為現在，儲錢是為將來，如何取捨要看你自己。

我一般建議後生仔（若未有家庭更是）儲收入的一半，年紀慢慢大時再漸漸降低，當然好多人都做唔到。所以，你可以定一個目標，如一年儲10萬元。雖然這目標可能因你住屋提升而做不到，那你可以再在生活的其他方面慳一點，以達到這目標。

再問：未來可能加息，想請問，假如我現在買樓，係咪會直接因為加息，供款便會提高了？還是指加息後買賣才貴息？

龔成：會的，除非做定息按揭，但香港仍不成熟，所以相比起傳統的，暫時看不出真的著數。

加息方面，我相信不會加太多，因為香港加息的源頭在於美國，而美國加息的速度其實不會太快，會加息是市場意料中事，因現時我們的利率處於百年難見的低位，利率去到較正常也是合理的事，所以你要有適當預算，量力而為。相信美國會看著經濟情況而調整加息步伐，相信會慢慢來。

——————————————-

問：龔成你好，請問股票何時是合理價，何時是偏高。有什麼計算方法？可否以莎莎國際(00178)為例？唔該你。

龔成：這個問題，真係要幾個鐘先答得完，有上過我堂的同學仔都明。用市盈率較易理解，一般8至15倍可為合理至略平，若該股業務增長較快，可承受較高的市盈率。

即是，我們要對其往後的盈利作預測，才能評估到對此股那水平的市盈率較合理。例如一隻沒有太大增長力的股票，10倍市盈率算是合理，若果現時這股的市盈率為15倍，那就可以說高於合理價。

另外，市況過熱、當炒時，亦會令很多股處偏高水平，例如早兩年熱炒的自由行概念，就令莎莎被炒高，而現在處合理水平。基本上，凡當炒的往往會過高，如之前的「一帶一路」類、證券類，所以當時我叫人不要掂。

——————————————

問：我之前狂買嘢，欠落銀行好多卡數，現已洗心革面唔再買，慢慢還緊。想問，我有冇方法可以係還卡數時仲可以儲到錢？同埋有咩方法可以係還清卡數之後賺到第一桶金？我扣晒所有開支，每個月還晒卡數之後都冇錢剩，今年之內都要還，好苦惱。

龔成：其實有幾樣野可以做。一，因為到年尾其實唔算太耐，不如把握呢段時間先提升理財投資知識，等遲啲有錢剩可以開始儲錢時，再配合投資技巧，相信效果更好。

二，可以考慮做兼職，增加收入就可以有錢剩。三，無本創業，諗下自己有咩興趣、強項，加以利用去賺錢。

再問：我都有做兼職，亦算係無本創業，但唔係每個月都有收入。屬於唔穩定的副業。我上個星期買咗你本書，仲睇緊，但發覺唔係所有內容都適合自己。

我做文職，星期六、日及紅日假期跟政府放假，你覺得我應該出去搵兼職做，或是只專注副業？定兩樣都做？如果我今年開始儲錢，盡可能一年內儲到10萬元。但當我有咗呢十萬元，我唔知道應該點樣運用去投資。

龔成：諗多啲唔同途俓的無本創業啦。一樣嘢無可能適合所有人，書只是引導，更多適合自己的方法，要自己發掘。記住，出發點要從長遠的發展去思考，無論是前途、能力、財富，舉例說：

1.創業現在無錢賺，但將來會建立到某些東西；
2.兼職現在賺到錢，但對自己的提升，將來無任何幫助。

除非選擇2可以賺好多錢，否則必然是選1。當然，你自己先知如何選擇對你將來較佳。

其實有興趣可試試創業，開拓新事業，不一定實體的，網上都可。若無興趣創業的話，就專注副業吧，有可能對將來較好。

如果無投資知識，只適合最穩建的，即低風險的。

再問：咁金融產品邊種屬於低風險？

龔成：定息產品、債券、股息較高股票、盈利穩定的公用股、某些低風險的基金等。由於難以三言兩語講到，所以請自己先多學習。

——————————————-

問：我很高興能看到你出的書本，知道你的經歷，亦因為這樣我得到鼓舞，而且慢慢相信自己有能力除工作以外賺取金錢，真的多謝你。

其實我是一個投資新手，想了解一下我應該從哪裡開始去認識更多投資的知識才好？我非常想行出我的投資第一步，但自知自己對投資一竅不通，知識非常有限，這嚴重地令我猶豫……

另外，我報讀了你的講座，我是個投資新手，希望能聽得懂、聽得明白在講座上的分享，所以我非常想做定功課出席，所以在此前我要準備甚麼東西出席課堂？

在這，再一次感謝你的鼓勵，讓我知道自己是掌握自己生命的人。

龔成：多謝支持！講座沒有功課可準備的，但相信平時多接觸財經知識，對你長遠是最好的，如看財經新聞、有關經濟的報章等。

投資是理財的其中一環，學投資之前，更要學理財知識。你可多看理財書，到坊間上堂（就算是XX會都可），其實都有用的。係！我地係掌握自己生命的人！

————————————

問：100萬元的商場舖諗得過嗎？

龔成：商場拆舖小心呀，唔好因入場費低、甚麼保證回報字眼就入場。之前好多死場，就算位於尖咀都有拆舖的死場，因為商場拆舖好依靠主題、管理，大業主賣咗比你，佢愛理不理，你都無辦法。

————————————

問：龔成，我在書店找不到你的《80後2百萬富翁》，是否已賣晒？

龔成：坊間仍有的，其實已再版，但部分書度賣完後未必立刻會補貨，我聽讀者講大眾書店《80後百萬富翁》及《80後2百萬富翁》都有充足貨源，你可找找。

————————————–

問：成哥，可唔可以分析維他奶國際(00345)？好似好穩健咁。

龔成：維他奶不錯的，其實我走了寶，大約7、8年前分析過，但無買，當時只係1元、2元，而家升過了10元。或者遲啲分析啦，因近期趕緊兩本書，要遲啲先得閒。

——————————————–

問：想請教，書中提到篩選優質股用條件篩選的電腦程式，有免費app可做到嗎？

另外，我又有做下功課，不同股評人在幾年前分析推薦過你買過的中國人壽(02628)，但我自己見依家31.8元，pe 22倍幾，覺得已經over合理價，請賜教?

同時，我覺得友邦保險(01299)同港鐵公司(00066)都係難得優質，但現在股價是否與2628一樣，貴過合理價？

龔成：免費有的，我在課堂中會講，並仔細教你用。其實你所講三隻都是優質股，只要以合理價買入就不用太擔心，市盈率是其中一個指標，同時不要以某市盈率就一定代表平貴去評估。

一般來說，評估優質股的價值時，由於是優質，故會有較高的價值，即能承受到較高的市盈率。現市盈率算是合理，但不特別便宜，我自己則會耐心地等到便宜價才入貨，可能一等就一年。

另外，你三個月的投資是不足的，要多睇書、睇財經雜誌、上堂。但我見你懂得找優質股，方向正確，相信不斷學習會比其他人的成績好。

———————————–

問：究竟怎樣去估一間公司或股票的實際價值？

龔成：這是一個很複雜的問題，正統就是將那企業將來所產生的現金流，拆換成今天價值的總數，所以只是一個估數。但簡單方法就是用市盈率，即是你所投資的，理論上要幾多年才能回本，以這作為該企業的估價。

再問：另外要再考慮公司的背景方向及投資者的經驗，對嗎？

龔成：如評估公司，公司的背景是必須的。其實原理根本就是，若我打算收購某公司，我會畀幾多錢，這就是當中你要考慮的。

再問：事實上這是買股票的正確想法嗎？

龔成：係，因長遠的價格必然是基於企業價值。

———————————–

問：龔Sir你好，有關前途的請教，我現在做飲食業，但我想轉做金融投資呢一行。我無經驗，知凡是起頭難，可以點行第一步？

我諗過唔收人工去一啲公司實習學野，但生活問題又難以實行，請指教。你又怎樣開始這一項？

龔成：如果係經紀類的職業，唔少證券行都會請新人，因為採用佣金制，要自己找客，當然公司會有支援。初期可能有些底薪，後來全靠佣金。

不過，這類職位好多時要求銷售技巧多過投資技巧。如果你本身外向健談，識sell嘢，其實已經夠料。

至於第一步，不如去坊間的投資講座（好多係免費的），識下果度啲人。因為好多投資公司鍾意搞免費講座，然後吸客sell客，你識多啲人，friendr咗後知多啲，多啲了解裡面運作，先再諗適唔適合自己。

再問：龔Sir，多謝你抽時間解答在下的問題。其實sell嘢真無甚大興趣。我之前出過去上投資堂，位講師做基金管理者(即有權幫客戶管理基金以及買賣股票)，我問過佢地，未知請唔請人。

我想趁呢段時間裝備自己。但我想知第一步應該點行，我想過考證券牌，有甚麼課程可以拿到相關的專業資格。

龔成：XX會有證券牌的課程（即卷1、7、8），不過考牌要在一年內登記（我不肯定是否一年），登記即找到公司幫你掛牌。

———————————–

問：你好龔成，想問，如果買同一隻股，月供股票好，還是買一手好？

龔成：好睇你策略、資金、能力。如何你未能掌股價現水平是平貴，大市的冷/熱，月供股票能幫你減低風險。我兩樣都有，睇股票平貴、大市處於冷/熱的程度。金融海嘯期，我n手咁入貨。

————————————-

問：成兄，想問農業銀行(1288)及中芯國際(00981)兩隻，你點睇？

龔成：981中芯有所保留，上年度生意與盈利下跌，近幾年的盈利亦不穩。雖然是內地最大晶片代工企業，但行業前景一般。加上代工事業缺乏產品價格自主能力，預期下年的盈利將下跌，投資價值一般。

農行則有一定質素，雖然內銀有潛在壞帳問題，中短期有可能波動，但長期盈利的確有實在的上升，加上派息不差，因此有一定的價值。

————————————-

問：如果有一隻股被大行唱淡，其實係咪大行想入這股，但價位太高，所以唱淡然後等股票慢慢跌，然後大行靜雞雞入貨？

龔成：有可能，見過不少個案真的一邊唱淡，一邊入貨。但不能一概而論。

——————————————-

問：最近聽到長江基建(01038)合併電能實業(00006)的消息，你如何看合併後新公司的前景? 是否更值得買入?如果要買電能，這情況一般建議合併前買入，還是等待合併後再買入? 因為他說派特別息。Thx

龔成：遲些電能併入長建，二為一體，其實現時買邊隻的市場價已變成一樣。若你買電能，遲啲會有碎股，不如買長建。

長建核心業務包括：能源基建、交通基建、水處理基建、廢物管理及基建有關業務。營運範圍遍及香港、中國內地、英國、荷蘭、澳洲、新西蘭及加拿大。而電能自拆港燈(02638)後，已更國際化，平穩性減少，但潛力增多。

故長建是不錯的企業，有一定的規模，當中的資產亦有一定質素，加上擁有相當的現金，潛力一定有，但注意合併期是市場焦點，留意價格是否被炒高。

——————————————-

在此先多謝各位的提問，而我亦繼續歡迎各位讀者網友提問，但要注意，如無特別聲明，我有可能將問答放上網，當然，我會將發問者的身份，以及有關個人的部分刪去。

另外，由於提問人數眾多，見諒我無法即日回覆，如果是普通的提問，預我起碼要三天以上才能回覆，若然是較複雜的提問，起碼要一星期才能回覆，希望各位能諒解。