龔成問答信箱18

龔成：我一向都覺得恒生好過滙豐控股（00005），相信可見將來都是，佢無論盈利的穩定性，賺錢能力，以及派息都較其他銀行佳，絕對值得持有。

過往股價不是分析股價的指標，因每年的盈利都不斷變，市盈率亦會不斷變，即是數年前的130元與今天的130元是不同的平貴。恒生在140元以下處10倍市盈率水平，考慮風險等因素，相信130至140元已是不錯的吸納水平，可長線投資。

至於將來股價，我很少刻意去推算，但只要其盈利保持每年增長，就能到達這水平。

———————————————-

問：成哥，香港要賺錢真係好難，有無方法？幫幫我。

龔成：之所以好多人都認為賺錢難，係因為學校無教過我哋賺錢，只係教我哋做乖乖的僱員，然後獲得基本的生活費，而非獲得財富。因為香港的教育生教真正賺錢的知識，所以，大家認為賺錢難是正常，因為無機會接觸。

香港其實有好多方法賺錢，例如創業、投資物業、投資股票、做銷售等，但你試試同你父母講，畢業去做呢類工，相信10個有9個都唔贊成，因為大家已被打工觀念洗腦，認為打工正常，但其實係財富角度，打工係最不正確。

所以，你想賺錢，賺大錢，就要諗打工以外的方法。呢個係你條路，創業、投資物業、投資股票、做銷售等係真方法，試試接觸佢哋，可以有條路你好中意，會發展到成為你的事業。

———————————————

問：龔sir，上年上堂聽你的推介，在5.7元入港燈(02638)長揸收息，近期升到上差唔多7元，你建唔建議我放？

龔成：如果你收息，其實唔洗放，因為放咗可能買唔返。港燈係優質資產，今年美國加息的速度比市場預期慢，所以呢類穩定收息股，都被市場搶高，所以現時當然唔應該買。

如果之前打算中線投資就可以放，但收息的就算啦，繼續原有的策略，除非佢再大升，到時先再諗。

———————————————

問：龔成兄，我一直有追你facebook，之前你係facebook post相，現場係26.9元入比亞迪(01211)同21.8元入金沙中國(01928)，我都有跟，賺好多。

因為你好少post你即場入貨的相，想問點解你兩次都咁準，都可以捉到低位，個價位真係差幾毫就係近年的最低位，我想知點捉？係睇啲咩？

龔成：如果我無記錯，我係facebook開專頁幾年，果兩次係唯一的兩次post我即場入貨的相，更叫大家即刻入，印象中真係無第三次。

其實果兩次捉到低位只係我好彩，因為我用的投資方法並不是捉低位。首生我會選有信心的股，比亞迪同金沙就是，呢啲股有買貴無買錯，所以只要長揸，根本就唔驚。

另外，當時都是處恐慌的大跌市中，呢啲大跌市一定係買平貨的好時機，所以叫大家買，但買完可以再跌的，所以我當時無刻意捉低位，只係知道平，就算再跌，只要是長線投資，就入得過。

——————————————–

問：成哥想再請教，在你來說，你覺得那一個行業可以長遠看好，我想找一份工長遠發展下，但苦無方向，你有何建議呀？

龔成：呢個問題真係好難答，因為世界的變化比以前快，我會諗一個前題，之後香港的經濟以甚麼主導，以及世界主導的是甚麼。

我相信科技是其中一個方向，但這範疇變化好快，不同科技都可大不同，以你的思維模式來說，相信你是尋求穩定的一類，那科技未必是最好。另外，我相信香港與中國大陸的聯繫會更多，因此這是一個大方向。

數十年後，我相信香港的金融地位仍在，因此這是一個不錯的選擇，銀行工是一個穩定的工種，你可向這方面想想。

不過，我認為一個人最重要是找到自己想做的事，而工作穩定只是其中一項，所以多想自己的興趣與強項，深入想如何好好利用，化為事業，這可能更佳。

另一方面，世界變得好快，追求穩定的難度愈來愈高，所以一定要保持自己的競爭力，保持同市場的聯繫。最好有一些各工種都適合的技能，如英文、普通話、溝通技巧、人脈網絡、領導技巧、處事技巧等。

———————————————-

問：炒期貨可發達嗎？Day Trade可發達嗎？

龔成：我不認為這些投資方法能賺錢，若你觀察一下世上最賺錢的人及基金，都是靠長線投資而賺錢的。我相信靠投機而賺到錢的人，十分少，而且他們要付出相當的時間，所以不建議。

———————————————

問：成哥，可否講講投資基金要注意甚麼，基金是怎樣賺錢的？

龔成：傳統基金只會將資金拿來持有投資物，令基金保持增長，我相信這類是較適合一般人的，例如買美國公司的股票，若這類公司長期上升，該基金自然會升。

至於非傳統的基金，例如有基金會將資金投資衍生工具，對大市作出更多方面的操作，而不只是買升，這其實好考基金經理的眼光，可以大賺，可以大蝕。

你要分析基金持有那類項目，以及投資策略，分析有無前景就可以。至於基金詳情，你可能要問銷售該基金的職員。

———————————————

問：每月供款的強積金，長年累月之下金額都唔少，想問下一般打工仔應該要如何管理強積金？有咩風險？有咩地方要留意？如牛巿、熊巿如何應對？如何選擇合適基金以賺取最大回報？Thanks!

龔成：強積金其實有個好簡單的方法，就是按年齡去分配，若你是35歲以下，就可將大部分資金投資到較高風險的類別，因為你有時間守（我自己都是100%恒指，因為手續費最低，長期回報最好）。至於市況則完全不用理會，因為你取錢已是幾十年後的事。

到年紀開始大，才慢慢減少風險的部分，轉部分去較低風險的，例如50歲，可以一半風險一半低風險。之後再不斷減少風險的，而到60歲，就要完全低風險，因為已沒時間守。

———————————————-

問：你好,因為我想增加資產分布，想學債券投資，有冇咩書介紹？

龔成：香港真係好少債券書，相信係香港人鍾意玩股票，喜歡增值，但其實債券都是好的投資工具。相信書局你找唔到，去圖書館找找啦，我相信有相關書的。

———————————————–

問：你好，想問慶鈴汽車（01122）的看法？

龔成：慶鈴主要生產銷售五十鈴的車，輕型、中型、重型商用車、皮卡車、多功能車，以及柴油，同埋汽油發動機，有佢自己的市場。

生意增長不多，但盈利都算保持上升，算係咁，但股東權益回報率(ROE)唔高，連10%都無，反映再投資的能力只屬一般。賺錢能力不算強，相信會平穩。

算是一隻不過不失的股票，現價市盈率處11倍，息率都有7、8厘，都不差。整體來說，吸引力中等。

———————————————–

問：您好，請問你覺得現在買比亞迪(01211)還值得嗎？另外也想問一下eprint集團(01884)，好像挺穩定，派息也可以。少少地入兩手當賺息可以嘛？

龔成：我相信比亞迪40元都合理，當然我自己會等30元以下先增持。

eprint只屬一般，佢主要係香港向客戶提供印刷服務，同埋就廣告、精裝圖書及文具提供解決方案，市場發展有限。另外，集團盈利不太穩定，不過股東權益回報率高是吸引之處，但由於上市年期不長，最好再睇睇先。

———————————————–

問：我想買股收息，又想買樓收租，想建立退休的保障，成哥你有無意見？

龔成：我相信股樓平衡是一個好的策略，即是你的財富組合中，有物業、有股票，這可運用適當的槓桿之餘，又可平衡風險。買樓宜選租金回報高的，方便地段。

至有不少收息股都不錯的，但不要選房託，因為這會令你物業與股票都處同一類，所以你可選公用類的收息股，作為產生現金流的資產。相信能為你建立一個不錯的財富組合。

———————————————–

問：龔先生你好,小妹30多,有一自住物業,2009年買入,還有100萬元按揭。請教可否因樓價升值而加按投資？如加按後可約有多100多萬元現金。想作股票投資,請問邊類股票較合適?請指教! 感激。

龔成：以你年齡可承受的風險程度，是可以去加按的，加上現時仍處低息期，所以問題不太。

因為關鍵是加按後，將資金買入其他資產，創造更高的回報，由於加按是要支付利息的，所以新資產產生的利息一定要比加按的利率為高，那才值得做，最好有比較明顯的息差，這樣才能抵消加按後，更大負債為你所帶來的風險。

因此，你加按前，要先計劃好新資金將如何分配，如何平衡風險，怎樣說服自己獲得理想的回報，即是有充分的理由，而非為按而按。

若投資於股市，相信中低風險會較合適的，盈富基金（02800）、公用股、內銀股都可考慮，策略長期的增值及收息，絕不建議炒兩轉等方法去投資股市。

———————————————–

問：如果交易所買賣基金(ETF)倒閉, 會如何賠給股東？房地產信託基金(REIT)又會唔會倒閉呢？

龔成：ETF極少機會倒閉，因為大多穩健。不過，香港曾經有些ETF每天的成交太少，所以發行機構決定唔玩，將隻ETF除牌，不再係交易所買賣，無得每日睇股價，只可打電話去問價。

若果是已買入的投資者，想放的話就要到那公司（不記得是否在中環）簽文件先放到。不過報出的沽出價是合理的，沒有刻意低開。

至於房地產信託基金（REIT）同樣好少機會倒閉，因為原理同買樓收租一樣，要變做零其實好難，所以唔洗擔心。

———————————————–

問：我係你本書《80後2百萬富翁》裡面，有推介《解讀畢菲特》 同 《畢菲特傳-永恆的價值》，想問下係咪畢菲特佢自己寫的？

龔成：兩本都唔係佢寫，但《解讀畢菲特》已經係好完整咁交代左畢菲特的投資方法。其實有本叫《畢菲特寫給股東的信》，呢本係畢菲特每年寫巴郡年報時，寫給股東的信的集結，係唯一一本佢寫的，可睇睇，好正的。

———————————————–

問：想問問供股，同月供股票有咩分別？

龔成：兩樣係完全唔同野。供股通常係企業唔夠錢，或者想發展時，要股東們大家夾錢畀公司，只有股東，或持有供股權的人才可參與，以某一個特定的價位去買入某比例的股票。

月供股票就係每月買入同一隻股票，例如每月用2,000元買入盈富，如果今個月隻股20元，就可入到100股，下個月21元，就可入到95股，每月入少少，原理是儲股票。

月供股票的好處是減少一次過買入時的價位風險，但如果入貨數量少，手續費就相對較高，令投資成本增加。

———————————————–

問：我18歲，應買政府的iBond，還是企業股票如金沙中國(01928)，滙豐控股(00005)等？

龔成：18歲可以承受較高風險，所以不用買債券，而應該著眼於財富增值，買物業及買股票，令長期財富上升是好方法。

因為18歲有時間守，就算股票跌，你都可以守，佢都會升，但前題是該股要是優質股，而你唔好在高位入。近期的股已不是高位，部分股更是便宜價，絕對有長線投資的價值。金沙及滙控都有投資價值，雖然已過便宜價，但現價仍合理，可分段入。

———————————————–

問：百麗國際(01880)一直下跌 想問一下，依家4.6元呢個位 如果我睇長遠係咪已經有投資價值？還是要更低？

龔成：百麗係內地製造同零售鞋類、運動服飾產品之類。其實近期不斷創多年新低，主要由於佢公布上季的銷售數據差。鞋類業務同店銷售下降16.5%，運動、服飾業務同店銷售增長6.2%，被多間大行唱淡。

網上銷售平台的競爭大，生意比之前難做。睇返近年盈利無乜增長，而家銷售下跌，相信會影響盈利唔少。

市盈率7倍，以一隻處下跌市場週期的企業來說，其實仍不算平，即再跌是有可能的事。建議你等佢出多啲壞消息先，因為一個下跌週期只係剛開始，而呢類週期往往可長達一年，所以就算入都要分段。

———————————————–

問：你好，龔成，我想問中國交通建設(01800)股價8元處於略平的水平嗎？

龔成：中交建有質素，有規模有賺錢能力，雖然近年賺錢能力略差，但仍有質素的。現時大約處7、8倍市盈率，以一隻不錯的股票來說，算是處略便宜的水平。

———————————————–

問：見你成日話港燈(02638)優質，其實現時有沒有其他股可取代佢？

龔成：公用類來說，中電控股（00002）、中華煤氣（00003）都不差，但息率不及港燈，合和公路（00737）算是高息，但留意剛有特別股息，下年相信不會有那麼多，所以以穩定來說，港燈是首選。

其實內銀都高息，可留意，當然壞帳風險存在，穩定程度不及港燈，但我不認為內銀如坊間般看得那麼差。至於房託，都可以考慮，但租金正回落，要小心選擇。

———————————————-

多謝各位提問，若然你有問題想向本人發問，可在本人的facebook專頁中（www.facebook.com/80shing）inbox我，但要注意如無特別聲明，我有可能將問答放上網的，當然，我會將發問者的身份，以及有關個人的部分刪去。

另外，由於提問人數眾多，見諒我無法即日回覆，如果是普通的提問，預我起碼要三天以上才能回覆，若然是較複雜的提問，起碼要一星期才能回覆，希望各位能諒解。