龔成問答信箱
———
問：好想知你點睇中國銀行(03988)現價? 始終覺得4元 以上已經算貴
答： 算合理啦，單以收息都有5厘，唔會太差
———-
問：今日隻比亞迪(01211)收30.4元，跌1,400點你都有得執，真係要叫你成哥
答 ：長線的，所以唔太重視短期股價，捉到低位只是好彩
———–
問：你覺得中國財險(02328)優嗎？
答 ：財險呢類保險，始終缺乏品牌價值，顧客的忠誠度有限。現價市盈率約10倍，不過不失
———–
問：威利國際(00273)點睇？我見而家0.242元好吸引….想入兩手試下….
答 ：273我無分析，唔敢亂講，雖然佢今日跌左兩成半，但跌得多唔一定就係平，要自行分析下間公司先好入
———–
問：深圳國際(00152)，算優質公司嗎？
答 ：算是中等，不算太差，過往幾年盈利都能保持，但盈利沒有明顯增長，市盈率7倍不算貴
———-
問：中國平安(02318) 呢？
答 ：2318其實係優質公司，但之前升得太多，同埋佢做保險會收大量保費，成為浮存金，然後就會有部分投資係股市，所以大陸股市跌都會對佢有影響
———-
問：南方A50(02822)、北控水務(00371)、中國中鐵(00390)呢？
答： 2822太波動，一定要分注入，之前太貴，現價才算合理。371其實唔差，但我無仔細分析過，之前炒得太勁，雖然現時跌好多，但市盈率仍去到廿幾倍，自行決定。390雖然有一定質素，但呢類有概念股，我個人唔會掂，所以中國中車(01766)同另外的證券股我都唔會掂
———
問：想問下福記食品服務(01175)，高位渣了，還在跌。
答 ：1175無睇過，但睇翻佢有10合1及1供1的記錄，個人對這類玩財技的公司有保留，加上市值細，一定大上大落，不合符我選股及優質股的原則。當然，用炒賣的角度是另一回事，市值好低，現6億、7億元市值，而現時上市地位的殼價都值4、5億，下跌有限，但這方面不是我的強項，請自行研究。
———-
問：「一帶一路」等概念股死哂，成哥教學真work。
另一網友：好彩龔成係之前大時代期間都只係話入隻金沙中國(01928)，我跟左，跌左，但跌幅遠比大市少。
答 ：當我見到熱炒某概念、好多散戶玩，就會避開，雖然短期回報會輸比人，但可避風險。
———-
問：成哥，聯想控股(03396)你點睇?
答：聯控其實唔差，但我對呢d新上市的公司無興趣，因為帳目一定經過修飾，令到上市價提高。就算好野都要貴買。
———-
問：騰訊控股(00700) ok 嗎?
答：700我自己唔會掂，科網市場變化好大，可以好賺錢，又可以蝕大錢，所以估值可以有好大分歧，造成股價的大上大落，你見阿里影業(01060)的股跌過半就明。
———-
問：中國石油化工(00386) 點睇？ 同中國石油天然氣(00857) 比，比較少貪污問題，油價只要唔再大波動，每季賺150 億元唔係難事。仲有佢呢排股價算硬，我6.27元，買 一年睇7至7.5元。
答：從業續來看，386比857上年的業績有較大的下跌，另外，如果比較股東權益回報率（ROE），386近幾年的下跌都較快。我會偏向857
———-
問：請問上海石油化工(00338)，算好股嗎?點睇？入唔入?
答：一般，五年有兩年蝕錢，現價未見吸引
———
請問興業太陽能(00750)點睇，13元入，現在應否分段入手？
答： 係呀，分注啦，但唔好急，每次分起碼要相距2成價位。我自己都有貨，長線有價值的，但呢期點都要捱下價
———
問：咁請問保利協鑫能源(03800)又如何？
答：炒味太勁，太多散戶玩，呢d我個人唔會掂。雖然上年有錢賺，但睇翻業績，五年有兩年蝕錢，價值投資者唔會選。你短炒則另計，但我不懂。
