月儲$1萬 想1.5年內有$25萬 可揀呢4隻股做月供 ｜龔成信箱 ｜月供股票
撰文：龔成 ｜圖片：新傳媒資料庫、unsplash
1.月供股票
你好老師。如果我每月有8000-10000,想1.5年後有大約25萬，邊隻月供股票回報高？
另外，有無邊間銀行有月供股票買2800盈富基金係比較平手續費？
龔成老師：
你可以月供「平穩增值股」+「潛力股」，平穩類有盈富（2800）、金沙（1928）等，而潛力有比亞迪（1211）、中生製藥（1177）等，但潛力股的風險會較高，當然，潛在回報會較高，你要取平衡。
你可以去南X商業銀行問問。
（對照龔成信箱：Q7435）
2.投資方法
龔成師傅你好，我都係一個80後，睇完覺得你對財務真的好聰明，好想請教你一下
我想知道市面上有無咩投資方法可以有「每月5%息」左右既回報？
龔成老師：
如果每月可以得到5%，即是一年有超過60%的回報，而全球憑投資賺了最多錢的人巴菲特，佢的回報只是20%。
好簡單已明白，60%背後一定一定有高風險。是一個高得不合理，跟本無人可以做到的回報。
（對照龔成信箱：Q7432）
3.供樓
想問下家庭月入13萬，但儲得4萬，有層樓供緊，要供300幾萬，供20年，可以點樣投資？
龔成老師：
你可以用「先增值，後現金流」作為人生的財富累積，我相信你的年紀不會太大，即是仍有財富增值的能力。因此應投資較多增值類資產。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
如果你未有選潛力股的能力，未有掌握投資時機的能力，就可以簡單地投資盈富基金（2800），利用月供模式都得。
你保持每月供樓，同時在每月儲得的$40000中，投資$20000，月供盈富或其他平穩增值股，假設15%複息回報，20年後，就可以滾存到$2000萬。假設回報沒有15%，相信要滾存到$1000萬以上不難。
至於餘下的$2萬現金，就先儲現金先，等大跌市時才出手，由於你每月都算儲到錢，你最好學習選股、企業估值、投資時機的能力，之後滾出的回報可以相差好大。
（對照龔成信箱：Q7433）
4.中國動向（3818）
龔成…我想問點解中國動向（3818）咁高息既？
龔成老師：
中國動向（3818）主要在中國、澳門及日本從事品牌開發、設計以及銷售體育相關服裝、鞋類及配件。佢為Ｋａｐｐａ品牌在中國及澳門的全部權益持有人。
佢的生意好穩定，盈利亦穩定，但就多年來都無增長，佢之前持有一定的現金，但佢覺得發展有限，於是將現金派出，上年以特別股息的模式派出，所以好多息。要留意，佢不是年年都有咁高息的。
（對照龔成信箱：Q7434）
5.月派息保險
龔成老師你好，我26歲，月入13000， 現金儲蓄(港幣及歐羅)約有八萬。以前一直想要增值自己財富可惜無從入手。前一陣看過你的文章大受啟發， 希望你可以給予我少少的建議。
現時有一份透過保險公司購買的月供基金1,800，另有一份涉及人壽及投資的月派息保險。
於兩個月前剛開始月供股票:
700，823，2800 各1000
1. 想問如果我再加入兩隻月供股票，2388同1211 會唔會太多？還是集中供以上3隻？
2. 月供基金和月供股票有何分別和差距？
3. 另外內地銀行有提供可以做活期/定期(短期)的存款i.e. 30/60/90日，大約4.3-5%年化率，又是否好選擇呢？
我持有外幣，但見你講過現金並不具增值作用，所以想要等機會換回港元最作打算。因為最近中美關係不穩影響，想問你覺得歐元區有冇機會升回以往水平，還是直接現時換回港元就好？謝謝你!
龔成老師：
1）唔算多，不過每隻$1000金額就有點少，可能要供較長時間先見到效果，不過，如果以超長線投資進行，可以的。
2）都是利用平均買入法，去儲資產項。只是所買的項目不同，基金有好多種，要睇清楚當中所持有的項目、投資策略，過往回報等。
3）將小部分資金做定期可以，但現金始終不是真財富，不用持有太多。
至於持有的歐元，如果太多，就要將部分先換做港元先，但如果不算多，暫時持有都無問題。
（對照龔成信箱：Q7436）
6.華誼騰訊娛樂（0419）
你好。我想問419短期內有冇機會反彈？
龔成老師：
雖然短期走勢無人知，但華誼騰訊娛樂（0419）長期的股價偏向下，令短期升的機會亦會較低。
因為這股的本質差，當本質差時，向下的力度一定大過向上，這企業年年虧損，基本上投資價值無乜，企業價值只會長期向下。
（對照龔成信箱：Q7437）
7.盈富（2800）
老師你好，看過你很多短片和書籍，知道你很喜歡盈富基金，因為可以平衡風險。
之前看過你一段短片有關於一個讀者想每一個月有三萬元的現金流，引發起我有以下的問題。
本人已經50歲，是家庭主婦，若果用100萬買2800，會分段買入，這樣做有沒有風險？想在10年之後每一個月有三萬元的現金流，要不要加大買盈富基金的金額呢？
我應該怎樣做才可以在10年之後每一個月有三萬元利息呢？
謝謝你
龔成老師：
以你的年齡情況，風險承受能力開始減少，投資盈富（2800）可以，但未必適合全數。
我不知你的具體財務情況，如果你只有$100萬，就只可投資$50萬去盈富，另外$20萬可投資收息股，另外$30萬則持有現金。要建立一個平衡的組合。
$50萬投資盈富，一定要分注，慢慢入，例如每隔2個月入一次，分數次去入。
雖然上述策略的較為保守，未必做到你日後創造到$3萬股息。但有時我地都要諗風險行先。
如果你想10年後有$3萬股息，要用比較進取的策略，以你的年齡情況，我並不建議。
（對照龔成信箱：Q7438）
8.阿里健康（0241）
龔生你好，我想請問241阿里健康前景如何，可keep住持有嗎？我$7.5入。佢有無機會上$10或以上，謝謝你
龔成老師：
阿里健康（0241）雖然有潛力，但同樣有相當的不確定性，因為佢現時仍處於燒銀紙狀態，幾時先有真正的盈利，根本無人知，所以大家都只有估估下。
長遠來講，有可能去到$10以上，但當中亦有好多變數，以投資的角度，這股不建議太大注，小注可長線持有。
（對照龔成信箱：Q7439）
9.保本
老師，如果現在有100萬現金，想穩定增值資產要保本，可以如何做？
我見你提供了很多方法但我不知道我現在應該那個方法最好？大前提是我想一定保本
龔成老師：
如果你想保本的話，就只能投資一些回報較低的項目。
$100萬可分成幾部分，有部分是持有現金，當然，這些現金可以去銀行做定期，因為現時定期的息高翻少少。
另外，你可以去銀行或保險公司，買一些低風險，保本的投資，佢地有這些投資的，但回報不高，但如果你前提是想要保本，都只有這樣。
另外，可以小小投資收息股，但這部分並不部分的，不過，如果只投資$20萬以下，我認為可以的。你投資港燈（2638）、置富（0778）、工行（1398）、香港電訊（6823），雖然中短期股價會有上落，但長期都能平穩向上，加上有不錯的股息，視為整個$100萬分配的其中一部分，可以的。
（對照龔成信箱：Q7440）
10.平安好醫生（1833）
老師你好，本人持有平安好醫生1手56元買，igg(799)1手13元買。係咪應該止蝕？
龔成老師：
平安好醫生（1833）並不是無質素，佢業務有增長力的，但企業虧損中，加上以高估值上市，這是最大的問題。
因為佢在上市時以一個好高的估值賣比投資者，其後回落至合理水平，所以股價跌了不少。所以我對新股半新股，一向都有相當的保留。
因為新股只需3年財務數據就可上市，同時一定會「整靚盤數」，根本就無法估值，加上新股一定利用該版塊熱炒時上市，所以散戶無可能買到平貨。
佢主要於中國運營互聯網醫療健康平台，潛力的確有，但這刻仍在燒銀紙，將來有好多未知數。
就算跌了不少，市值卻仍有$500億，市場只基於「概念價值」去比這個定價佢，而這個價值可以變得好大，所以風險不少。
佢有潛力的，但研究最終值幾多錢，根本無人知，所以你要明白，這股之後的變化可以好大，如果注碼唔算多，你可以守住當博佢日後好勁。暫時持有先。
至於IGG（0799），業務波動，這類網股本質會咁樣的，但不排除都有增長力，如果持貨不多，可持有住先。
（對照龔成信箱：Q7441）
