騰訊被點相 港股冇運行｜凍鏈茶專欄

南非大股東Naspers旗下投資旗艦Prosus出售36.7萬股騰訊(0700.HK)，套現約1.5億元，持股比例由24.01%降至23.99%。不過，此舉尚算碎料一則，震散騰訊股價嘅係騰訊俾美國國防部「點相」列入「中國軍工企業名單」，消息傳出之後第一日，騰訊美股、港股股價分別下挫逾7%。因為一旦俾美國呢類型嘅部門列入「黑名單」，就好難有運行。

就好似之前曾經俾美國商務部以新疆穆斯林人權問題為理由，列入美國《出口管制條例》實體清單嘅人工智能公司 – 曠視科技，最終曠視科技未能喺香港成功上市，集資失敗。

今次「黑名單」除咗有騰訊、電池製造商寧德時代CATL (300750.SZ)，商湯（0020.HK）等等，「上榜」公司增至134間，其中包括按市值計中國20大企業中嘅4間，單單係呢四間公司總市值已經接近1萬億美元。

不過，芸芸公司當中，騰訊被點相，受影響當然唔止一小撮人，除咗騰訊市值大幅蒸發之外，大部份基金都唔敢再重倉騰訊，尤其係港股中流砥柱嘅強積金基金，幾乎一定要降低持貨量以分散風險。由於騰訊佔恒指10％，騰訊被沽嘅話，恒指亦一樣好難有運行。

騰訊表示被列入清單「顯然是一個錯誤」，強調並非軍工企業或供應商，表明將啟動複議程序糾正錯誤。

騰訊要除名，都唔係無機會。美國國防部今年從名單中，移除咗6間不再符合指定標準嘅公司，包括人工智能公司北京曠視科技有限公司、中國鐵路建設有限公司、中國建築集團公司，同埋中國電信公司。換句話講，Donald Trump只要出出口術，就可以舞高弄低港股，以至全球股市。

騰訊嘅前景？就要睇佢上場後點樣玩啦！