90後月儲7000求穩定回報 買滙豐電能舜宇騰訊 是否合適 ｜龔成信箱
撰文：龔成 ｜圖片：新傳媒資料庫
1.穩定回報
龔老師您好，現時27歲，平均每月收入$21000，我持有以下的股票，想請教一下是否可以長期持有或要換投資組合
-滙豐(005)：1手，購買價$77
-騰訊(700)：1手，購買價$458
-電能實業(006)：1手，購買價$70.65
-舜宇光學(2382)：1手，購買價$159.8
現時股票和現金的比例大概1:1， 每月可用來儲蓄/投資的金額大概為$5000-$7000. 希望可以定期有穩定的回報.
龔成老師：
你持有的都是有質素的股票，只是近期股價下跌，比你的買入價低，但這些都是有前景，有質素的股票，你有得守。只要你以長線投資的模式持有，這些股不用轉換。
你持有的現金，暫時可繼續持有，等優質股出現更大的下跌才動用。
至於每月儲蓄部分，則可以將其中的$5000去做月供股票，你27歲，仍有一定的增值力，可以投資平穩增值股，加上小注潛力股。例如集中盈富（2800），加小小比亞迪（1211），這樣已建立一個不錯的組合，重點是長線投資。（對照龔成信箱：Q6091）
2.莎莎（0178）
龔sir 178如何?
零售數據幾好, 見佢日日上升, 之前果幾手已經放左, 好唔好入番
龔成老師：
莎莎（0178）當然正面啦，這企業有品牌，有一定的銷售網絡，長期能食正自由行條水，長線一定正面，這股不止係《50優質潛力股》的潛力股，推介時$2、$3，同時亦是股票班每次都會用作年報分析例子的優質股。
這股長期仍然正面，可以一直持有，但如果你之前已經放左，就不要再入，等佢回落翻啲先考慮，因為近期的股價，已經有少少升多左，過了合理價水平，但又不算好貴。不過，你最好還是等回先。（對照龔成信箱：Q6088）
3.優質股
成哥，我係你兩本書的讀者。我有個問題想請教
你經常話優質股一直持有，但呢個政策係咪牛市買入係熊市都照樣執入呢？即使佢跌穿左買入價？
龔成老師：
首先，我地選股一定只會選優質股，然後就係幾時買入，我地會盡量在平宜價時（即熊市）時買入，牛市時的價位無咁平，反而會減少買入。
即係話，我地著重的是企業，例如在熊市時，股市日日跌，但優質股處平宜價，你買入後，股價可能會再跌，但用長期角度，這是好難得的平宜價。
我地唔知股市之後的升跌，唔知幾時最低，幾時由熊轉牛，但我地能分析佢地所處的平貴，從而推斷到該價位的投資值博率。
如果你以買企業，以「買入後不賣出」的思維去理解上述我所講的，你會較較明白。（對照龔成信箱：Q6089）
4.月供股票
龔老師 你好 我係投資新手 想請問一下有關月供股票的問題:
如固定金額月供股票數量如下:
1st month – 1.5手
2nd month – 1.4手
3rd month – 1.3手
總數: 4.2手
到我要全數賣出時 碎股的意思是總數餘下的0.2手 還是3個月分別是0.5, 0.4 & 0.3手呢? 謝謝
龔成老師：
你月供股票，每月會買入不同的股數（因為金額固定，但買入價不同）。所以，碎股時必然的。
我當每手係1000股，你上述例子，3個月共入了4200股，4000股是原整手數，200股是碎股。當你要賣出時，200股就要比正股價低少少先賣到。
不過，大部分銀行提供的月供股票，都會比你碎股可以正股價賣出。即是你不用擔心碎股的問題。（對照龔成信箱：Q6090）
5.碎股
你好 龔成老師
有幾個問題想問一問你：
1. 分注既意思即係分時段一手手股票咁買？定係碎股？
2. 月供應幾時決定減少╱停供？
3. 係而家股價唔平既狀態，見你建議一邊月供╱分注買入優質股，一邊儲現金。如果心儀有幾隻股票，點樣決定應該分注定月供好？足夠現金就分注？唔夠就月供？有冇其他因素？
4. 本人26, 現金大約40萬，股票大約25萬如下：
（I） 匯豐 （5）2手
（II）騰訊（700）1手
（III）金斯瑞（1548）1手
（IV）中國平安（2318）2手
（V）港鐵（66）1手
本人月入3萬，打算月供＄10000，以每隻＄2000各供以下5隻股票
（I） 領展 （823）
（II）建行（939）
（III）中華媒氣 （3）
（IV）盈富 （2800）
（V）長江基建 （1038）
請問咁既組合可唔可以呢? 定係有其他更好既組合，以達到定期派息且有增長能力?
定係應動用多d現金，甚或賣出部分現有股票（例如金斯瑞），以分注形式買入以上收息股?
多謝！
龔成老師：
1）分注即都是一手手買，只是要大家將一筆資金，分成多注，例如你想用$10萬入某股，就分成3次，每次用$33000。
2）月供可以一直持繼。當然，如果股市處於過貴水平，就會減少供款金額，又或你到了某年紀，月供類別不同，可將之前供增值類股停止，轉供收息股。
3）你可以一半做月供，一半儲現金，月供可以一直進行，現金要等大市明顯下跌時才動用。
4）由於你現時現金的數目，比股票多，你可以動用少少現金，例如$10萬，分注買入優質股，例如盈富（2800）已可以。至於原有的股票，都有質素，長期持有就得。
至於月供股票部分，所選的都是優質股，但以你的年紀，可以加多一點增值力，建行（0939）合收息，潛力不強，你可以將佢轉成月供比亞迪（1211），只要長期進行，對你整體財富較好。（對照龔成信箱：Q6092）
6.比亞迪電子（0285）
成哥，你新書《股票勝經》已經入手，繼續努力出新書
想問285 比亞迪電子前景，其實已有貨，但仍捱價，14蚊左右， 應否再加？
手機股呢排受壓，2382 可低買嗎？
已經小注123 買入呢
龔成老師：
《股票勝經》係一本好全面的股票書，你要用心學習當中知識，對你長遠財富增長好有用的。
比亞迪電子（0285）正面的，但股價太波動，之前估值亦有少少過高，現時估值合理，如你不多貨，可分注入多少少，但不要心急。
舜宇光學科技（2382）係有質素的股票，前景正面，只是估值經常不平，就算近期都是，但分注買入可以。你已小注入，餘下資金可等等先再入。（對照龔成信箱：Q6093）
7.年利率
老師，我而家有負債，利率好高，相信高過10%。而恆指回報率一般有10%以上，係咪等於實際年利率高過10%以上就要盡快還款？
不過就住呢條數，我都計到年利率係好高，應該要盡快清左條數先得
龔成老師：
如果你的負債利率高過10%，基本上要盡快清還。
因為恆指過往的長期回報連股息，是15%，我地以10%保守計是合理的（你可以理解為實際回報率10%，而你負債的實際年利率是10%以上，比較下，你負債利率較高）。
即是說，若果你的利率高過10%，你負債的部分，根本無法為你帶來財富，因此盡快清還。例如你有一節錢，還錢比投資恆指更好。（對照龔成信箱：Q6094）
8.車位
老師，如果我想購入車位自用
你有何看法？
龔成老師：
我有少少保留。你想想同一筆資金，你可以選擇買車位，以及投資其他工具+租車位。
由於現時的車位租金回報率只有約3%，而過往有成8%，反映車位近年升了不少，但租金卻無法跟隨。假設你租車位，就要每月比租金，如果你買了，就不用比租金，但就要用一筆資金去投資。
你的確節省了租金，但同時用了一筆資金，若然這筆資金，可取得高於3%的回報率，那租車位就更有著數。（對照龔成信箱：Q6095）
9.領展（0823）
老師 想問一下 有那隻股增長力想比較好又隱陣的 會唔會係823領展
我每個月大約有1萬可以買股 哪些會比較穩陣
龔成老師：
盈富（2800）、領展（0823）、港鐵（0066）、中銀（2388）、長建（1038）、金沙（1928）等都合符這個要求，你可以用分注買入，又或月供的模式買入，因為現時價位不算平，同這方法最好，只要長期進行就得。
你最好建立一個組合，平衡分配，同時長線持有。（對照龔成信箱：Q6096）
10.優質股
成哥你好，我打算下月開始月供一隻股票先。可能會選港交所或友邦，請問有一下呢兩隻月供如何
龔成老師：
這兩隻都是優質股，都可月供，港交所（0388）的質素較好，潛力較大，但現價不平，不過月供是適合的。
你可以同時供這兩隻，只要你長期進行，以不斷累積貨的模式，長期就有效果，原理就是儲優質股。最好供3年以上，並持有多年。（對照龔成信箱：Q6106）
延伸閱讀：
香港唯一LEGO認證大師 80後靠砌積木養家活兒
