90後月儲2萬 目標3年內儲100萬作首期 靠股票增值資產要點做 ｜龔成信箱 ｜盈富｜比亞迪｜中國信達｜建行｜平安｜和美醫療｜雷蛇
撰文：龔成 ｜圖片：新傳媒資料庫、unsplash、istock
1.首期
龔成你好, 小弟有一啲問題希望老師你可以解答。
小弟今年27歲, 有穩定職業, 月入大概$25000, 另外星期六日再返另外一份兼職, 大概有2000-3000, 扣除家用洗費後每月可以儲蓄大概2萬
加上自己係大學時期都有投資股票, 暫時手頭上有6手港交所, 買入價250左右, 另外仲有一手1398, 買入價大概係6蚊左右, 後有備用資金5萬左右
目標打算係2-3年後30歲可以累積到80-100萬, 作為買樓首期之用。希望你可以比下意見我, 謝謝你
龔成老師：
你現時每月能儲$20000，3年單計本金都有$72萬，加上你原有的股票，以及基本的增值，要有$100萬並不困難，你只要投資平穩增值類的股票就可以。
現時你有上持有的，都是有質素的股票，繼續持有就得，作長線投資。
至於每月儲$20000，則可以好好利用，投資平穩增值類的股票，可以月供股票$10000，例如盈富（2800）、金沙（1928）、長建（1038）、港鐵（0066）、中銀（2388）等，以及小注比亞迪（1211）。
至於餘下的$10000，就先儲現金，作大市出現大跌時買平貨之用。
你只要保持儲蓄及投資，要30歲$100萬是無問題的。
（對照龔成信箱：Q6938）
2.美股etf
想問問3140，追蹤美股etf又值唔值得落？可以分散資金落美市，領航又係巴神推介可以既一間公司？如果買又應該點買？都係分注月供模式？
龔成老師：
領航標普五百（3140），這基金的投資目標為追蹤標普500指數之表現，雖然指數已升了不少，但而長線計，仍然會向上，只是你不能預佢升得好勁，因此都有投資的價值，這類指數基金，與盈富（2800）一樣，適合長期月供，慢慢儲貨，長線持有。（對照龔成信箱：Q6920）
3.小注
hello，雷蛇現時呢個價位值得買入嗎？你通常講小額注入，何謂小額？
同埋希瑪眼科現時股價可以入手嗎？
你認為它是否潛力股？
龔成老師：
雷蛇（1337）其實好難估，行業好似有前景，但又存在左相當的不確定性，佢其實仍然蝕緊錢，企業的實質價值在這刻不高，但現時市值都有成過百億，只是由於「概念價值」去支持。
但這個「概念價值」，值多少錢，根本無人知，所以佢的股價不定會好波動，所以，要睇下你博唔博，同埋只可小注投資。
小注的意思，一般是止你蝕左都唔會肉痛果隻。又或是佔總股票組合的5%以下。
希瑪眼科（3309）唔敢話佢無潛力，但我有點怕這股。因為市場存有不少對這股的想象，股價波動大，同時現時雖回左唔少，但仍然偏貴。最多只可小注投資。（對照龔成信箱：Q6922）
4.和美醫療（1509）
龔成，有兩隻股想問問你意見1509 同 8379
龔成老師：
和美醫療（1509）質素不太好，多年來的生意都無增長，同時盈利持續下跌，股價雖然比幾年前跌左好多，但如果佢無法改變生意情況，股價只會再跌。
匯安智能（8379）上市不久，上市前的財務數據，然強都可以，但一上市，最近公佈的2018年度數據，盈利就大跌7成，對這類企業有保留。企業上市，往往會整翻好盤數先，但上左市就慢慢見真章，所以，暫時都唔好掂這股住，因為仍未知真實情況。（對照龔成信箱：Q6923）
5.平安（2318）
如果我每月月供5000 想供2隻 其中一隻比亞迪 另外一隻有什麼建議 本人27歲
供比亞迪 和中國平安 好嗎
龔成老師：
你27歲，可投資較有增長力的股票，比亞迪（1211）及平安（2318）都適合。前者是潛力股，後者是平穩增值股。
雖然兩者都有一定的投資價值，但股價都比較波動，所以以月供股票模式進行是較好的，中短期股價不用理會，只要長期不斷去供就得。（對照龔成信箱：Q6924）
6.收息股
939
可入10手做收息嗎？
龔成老師：
建行（0939）是有質素的股票，可以長線投資，但你唔好預佢高增長，這只是一隻收息股，定位上只是收息。
至於是否買10手，要視乎你本身的投資組合情況，因為同一隻股票不能過多，否則會有集中風險，同時，同一行業都不能過多，如果你之前已持有不少銀行股，再投資就不適合。（對照龔成信箱：Q6925）
7.中國信達（1359）
想問下，你對1359的見解
同這行業的前景 謝謝
龔成老師：
中國信達（1359）這股及這個行業都比較獨特，可說是有危有機。佢做不良資產經營，例如收購及受託管理、投資及處置金融及非金融機構的不良資產經營、債轉股資產經營、破產管理、發行金融債券、同業拆借及為其他金融機構進行商業融資、關閉及清算業務、財務、投資、法律及風險管理諮詢及顧問服務。
睇翻佢過往的財務數據情況，生意有一定的增長，同時盈利不差，反映佢這類業務，的確能賺到錢，但這都只是建基於一個正常的金融市場，只要出現一些較大的金融風暴，基本上會對佢有相當的影響。
由於市場都明白這點，所以對佢的估值較低。
這行業，這股票，可說是無事就無事，有事大件事。當然，佢有一定的規模，相信在風險管理上已有準備，但股價的大幅波動則必定出現。
投資價值不是沒有，但你要明白佢的本質，同時要小心控制注碼。（對照龔成信箱：Q6926）
8.比亞迪（1211）
Hi 1211有貨，近期跌左啲，點做好？
加注？
龔成老師：
比亞迪（1211）完全唔洗擔心，但長遠的質素，同潛力不變，但你要預佢中短期仍會較弱，所以要有耐心，慢慢等企業成長，佢而家仲投資在好多錢在發展方面，例如建立緊一個全球最大的電池生產基地，以供電動車發展之用，這不是一兩年就見到收成，而是多年後的，所以，你要有耐心等佢成長。
如果你之前所入的注碼不多，現價可分注，慢慢儲貨。（對照龔成信箱：Q6927）
9.潛力股
內地新能源汽車補貼更嚴謹，這樣雖對企業係不利因素，令其盈利減少，但有助汰弱留強，使到有競爭力的企業留低，增加市佔率，投資股票會選比亞迪，吉利，廣汽，選這三間好唔好？
來有冇需要調低比亞迪，吉利，廣汽合理價，因為中短期盈利受壓！
謝謝！
你常提及投資潛力股要有技巧，經驗，咁呢d技巧即係咩技巧？可否舉例子說明？
謝謝！
龔成老師：
你的分析正確，汽車補貼減，對行業短期不利，但對有實力的企業長遠有利。當中你可以選擇比亞迪（1211）同吉利（0175），除了本質不錯外，潛力仍很強，前者電動車的潛力強，後者海外市場是增長亮點，長遠都不錯。
投資潛力股，要有一定的技巧。我地買股票就是買企業，而潛力股就是有潛力的企業，當我地分析一間企業時，會睇佢過往的經營情況，以及財務數據，但潛力企業的變化大，單分析過往數據根本不夠，因此，你要對行業的預測，企業本身的特質有較多的分析，這亦是較高階的技巧。
例如企業有某些獨特性，正如課堂以宜家傢俬做例子，就是佢有當中的特質，令佢有細公司，變成一間超級巨企，這不單是財務數據的分析，同時要對某些特質作了解先得。（對照龔成信箱：Q6928）
10.盈富（2800）
成哥，我本人26歲，月入一萬六，有看過你寫的書後獲益良多。由於少不更事，以前都是月光族，沒現金能儲下來…
現扣除開支可以儲5000，想問一下，月供股票2000 到（2800），1000到（1211）如何？
剩下2000現金是不是儲下來，等優質股到了合理水平再入手？謝謝！
龔成老師：
你仍年輕，現在開始仍不遲，只要你堅持每月起碼儲$5000，同時在加人工後盡力儲錢，長遠仍能累積一定的財富。
你將$3000做月供，$2000儲現金，是正確的，月供比亞迪（1211）$1000及盈富（2800）$2000亦是否確，只要你不理中短期的股價波動，長期不斷月供就可以。
至於餘下現金，就先留現金，不要心急入貨，等大跌市平價買入優質股就得。（對照龔成信箱：Q6929）
