6年內雙重置業 加按投資的利與弊 ｜龔成信箱
撰文：龔成 ｜圖片：新傳媒資料庫、unsplash
1.雙重置業
老師你好:我兩公婆年約35, 總月入9萬，有層上車盤2011年買落，現價約值600萬，按揭尚欠1.4M左右，每月正收租1.3萬。手上有藍籌股票約20萬, 另現金約1.5M。
家庭開支, 小朋友讀書, 個人洗費,家用,供樓等全部每個月總共4.5-5萬。現住在公務員宿舍, 屋租已計算在總開支內。宿舍尚可多住6年半。
想用手上現金做些穩健投資, 想做盈富及恆生月供股票。老師建議每月可用多少錢放在月供股票上?! ( 因為太太職業福利惠及我們家庭暫時並沒投放太多金錢在夫妻兒子的醫療保險)
其實另一想法係用現金及加按收租樓去買第2層細單位收租樓(做足5成按) 收幾年租再希望樓價有進賬, 到時住完宿舍前就放售該第2層收租樓加錢轉間3房自住。
老師對此請問有咩建議? 股票策略或現金分配應如何部署，利用仲有6年半平住宿舍的優勢去做到將來有層3房自住, 一層2房做收租的目標?
謝謝指教!
龔成老師：
這6年時間的確是你的黃金時期，可以好好累積財富。
當中有2個方法：
1）用你原在的計劃，加按收租樓去買另一層樓，然後到時再換3房自住，是其中一個方法，可行的。
但這會提高了你這刻的負債情況，你一定要計好負債比率，以及供款的情況，自己是否承擔到，租金是否足夠供樓，所—有野都有一個大原則，就是「供得起」，這是一切的大前提。
而這個方法由於涉及兩次買賣物業，因此這方面的成本難勉會較高。
而你在這段時間，就並行不斷儲錢，以及投資股票，令財富都能得以增值，但所投資的股票，不能進取。
2）不加按物業，不投資另一物業，只在這段時間，利用儲蓄及投資，平衡增值，你可投資增值力較強的股票，「潛力股」+「平穩增值股」，6年時間，加上你本身的儲蓄力不差，都會有一定的財富。
然後到時再將這部分的資金，去購買另一物業，如果唔夠資金就加按。
兩個方法其實都有利有弊，方法一會令你的負債風險增加，但就較易達標。但方法二則要投資較有增長力的股票，表現都要視乎這段時間的投資市場。
（對照龔成信箱：Q7500）
2.收息ETF
龔Sir你好 我24歲出黎做左一年野 現時手上有資金約20萬 每個月大概可以儲到$10000
打算$5000投資 唔月供但儲夠錢就買入一手股票 $5000儲現金
以下係我預想中的股票投資組合 會先以買盈富為目標
00002 中電控股 (5%)
00027 銀河娛樂 (10%)
00388 香港交易所 (5%)
01177 中國生物制藥 (5%)
01211 比亞迪股份 (5%)
02800 盈富基金 (40%)
02828 恒生中國企業 (10%)
03086 BMO納斯達克 (5%)
03110 未來恒生高股息率 (10%)
03140 領航標普500 (5%)
想問下咁樣可唔可行？
龔成老師：
上述都是有質素，可投資的股票或基金，適合你投資的，你以分注買入的模式無問題。當中的分配亦算適合，中港及美國都有，你用月供或分注買入的模式都可以，最緊要不理中短期股價，長線投資就得。
但同時投資10隻，其實有少少散，但都可以。
因為一般這金額的資金，約5-10隻股票都是適合的，因此你都可以。但每一隻的佔比可能會較少，可能要好長期進行，先會儲到一定的數目。
另外，未來恒生高股息率（3110）是不錯的收息ETF，但以你24歲年齡，應該以進攻行先，收息不是最著重，不過，你只投資10%，比佔上可以，只要之後不用增加這比例就得。
（對照龔成信箱：Q7492）
3.盈富（2800）
龔老師 現時20幾歲 月入萬4左右 洗費唔大 一個月都草到9千至1萬到 有7萬蚊到既盈富基金
現金有6萬到打算用黎買股票 現時月供股票只係盈富 想請問金錢既分怖應該點？
幾多成用黎做月供股票或草一筆黎入優質股？
謝謝解答
龔成老師：
現金$6萬，不應太心急入貨，反而可以這刻先持有現金，等到大市有較多的回落時，先把握機會平宜價買入優質股。
反而你現時每月可儲到$1萬，可以放多少少在月供股票，例如月供$8000都得，如果你無心水股想供，就集中供盈富（2800）。
當然，這$8000的供股方法，大部分可供平穩增值股，例如盈富、金沙（1928）、港鐵（0066）之類，而另外的$2000，則月供潛力股如比亞迪（1211）。
不用理中短期的股價波動，長期進行月供就得。
（對照龔成信箱：Q7493）
4.收息股
你好，我係投資新手，有問題想指教一下，謝謝你！
我現有10萬可以拎來投資，想投資穩定收息股，想問買領展，盈富定越秀好？
另領展同盈富應該咩價位入？
定其實我應該將10萬分散月供其中兩隻股票？如每月2800同823各2500，供年半到？
龔成老師：
對投資新手來說，盈富（2800）是最好的，因為這是一個50隻股票的組合，可以幫到你分散風險，比起買單一股票，會更好。
領展（0823）同越秀房產（0405）都是有質素的，都可投資，前者質素較高，增長力較強，但就略貴。
你可以月供$6000，其中$4000供盈富，$2000供領展（現價已可以進行），這樣會較為平衡。不要理現價，長線保持月供就得，這都可助你財富平穩增值。
（對照龔成信箱：Q7494）
5.港鐵（0066）
老師你好！現在月供了2800、2388、1299、1038每月各5000。想再供多一點約10000有何選擇？
386可取嗎？
港鐵之前爆出好多大問題是否已不宜拈手？
龔成老師：
上述4隻原本供開的股票，都是有質素的，都可以保持月供，長期進行就得。如果想加多$1萬去做月供，但希唔知供乜，最簡單可以選擇加多啲在盈富（2800）。
中國石油化工（0386）質素都不差，但不算最好，佢好受國際油價的波動影響，因此較為被動，同埋佢近年的生意都無太大增長。雖然你見佢股息率好高，但這只是因為佢上年的派息特別多，之前都無咁多的，所以能否持續都有未知數。
金沙（1928）、領展（0823）、恆基（0012）其實都可考慮。
至於港鐵（0066），其實都值得月供的，佢之前雖然有不利事件，雖然會扣分，但最核心的本質不變。
港鐵上年賺$160億，就算扣除物業重估，都有過百億，當中包括了鐵路經營部分，以及物業的發展、物業的租金收入。基本上，每年都過百億的。
你再細心分析佢業務模式及收入來源，鐵路部分，無論佢有咩事故，高層點變，你會唔會唔搭港鐵？問心，絕大部分人都會搭。
另外就是物業發展部分，完全見唔到有影響。
再睇物業收租部分，會唔會因為不利事件，而收少左租？唔會。
所以，唔會對港鐵有核心影響。不過，就有機會對成本等略有影響，因為將來可能要提高安全及監管方面的工作，成本會略增加，另外，如果影響通車日期，收入亦會影響。
所以，這些負面事只會對港鐵有好少影響。
（對照龔成信箱：Q7495）
6.短炒
你好呀 請問月供股票有那些是比較推薦 因為係新手 之前玩短炒比較多 現在見個市比較差 想開始月供股票
同埋想請問下月供，其實可以依加就開始供？定還是等個市再跌下先開始供比較好？謝謝
龔成老師：
無論任何時間，短炒都不是好的賺錢方法，這是我過往多年做銀行及證券行，見證大量客戶得出的結論。
月供股票是很好的累積財富方法，對初階者來說，供盈富（2800）是最好的，因為當中的股票質素不差，同埋有50隻股，有一定的分散風險能力，你可先利用這方法，進行財富累積。
當然，都希望你同時學習選股、企業估值、投資時機的技巧，這會提升你的投資回報率，對將來財富有好大的影響。
現時的市況處合理水平，已經可以開始做月供。
（對照龔成信箱：Q7496）
7.投資策略
龔老師。我現時25歲 月入約$28k 現持有兩手0005 一手0003 另月供$5000 $2800
扣除家用同開支 每月大概可儲$10k
如果想五年內儲到200萬 有冇可能？
應該如何改善投資策略？謝謝
龔成老師：
5年內累積$200萬，雖然說都有可能，但的確有點難度，可能要配合時機及當時的表現先做到。
現時的股票，繼續持有，現時月供$5000盈富（2800），繼續供，關鍵在於如果運用餘下的每月$1萬，如果要達標，一定不能心急運用，要睇得好準的投資時機，而投資的，一定是潛力股，當然，這會有風險有回報，因此你要自己衡量。
你要努力學習選股、企業估值、投資時機的技巧，然後不斷分析股票，在股市上找到估值較低的潛力股，同時要好好把握投資時機。
我相信$200萬是有可能的，但就真的要付出，除要有知識外，更要比市場早一步發掘到低估的潛力股先得。
（對照龔成信箱：Q7497）
8.領展（0823）
老師，我6000蚊月供股票，3000盈富，1000蚊比亞迪，2000蚊 呢個我諗左好耐，唔知邊以下邊隻會比較合適，（煤氣、港鐵、領展）呢3隻令我苦惱左好耐，唔識揀，求老師比意見，我2000蚊放係邊隻股票好
龔成老師：
至於月供股票果度，現時供股的不錯，一直供就得，至於餘下的$2000，可以選領展（0823）及港鐵（0066），各供$1000，這都是有獨特性，有相當質素的股票，你保持長期月供就得。
（對照龔成信箱：Q7498）
9.月供股票
龔老師。你好。我每月月入約3萬其中,11000~12000是家用,每月扣減雜費每月有約11000剩
想拎6000月供2800,66同823各2000,請問可行嗎?另外留5000當現金儲備
龔成老師：
可以呀。
月供股票是一個很好的財富累積方法，最緊要是保持月供，長期進行就得。上述你所選的都是有質素的股票，都可以長期進行。
另外，分配的比例亦適合，每月留$5000做備用，先儲現金，同時當大市大跌時，就有更多資金可以把握機會買平貨。
（對照龔成信箱：Q7499）
10.潛力股
龔成老師你好，我今年30歲，中學時已有睇窮爸爸富爸爸，已有現金流既概念。
一出黎做野已經月供2000 基金，供左6年左右，可惜睇黎揀錯左一個錯既投資工具，無令資產增值。 17年尾已經斷供，拎番12萬左右。 現在將12萬轉成以下股收息。
0005 x 400, 823 x 500, 6823 x 3000, 288 x 1000, 1810 x 1200. 想問288,1810 你認為有潛力嗎？
而家每月月供2000蚊 0003, 1000 蚊0005, 每年收到息會再投入供， 想問5年呢個方向5年後可以有50萬嗎，還是太保守了？
想補充，本人早2年抽到居屋，2020年頭開始供，因為要準備上會，所以月供3000 已經係max,.
咁有無需要降低一下月供數，以準備更多現金跌市時用呢
最後想問埋，27 同1928 月供比較，而家27 係咪會比較好？ 但1928 我見派息好似較好，但派息比率都over 100% , 是否有問題？
龔成老師：
其實你很早已有財富的基本概念，只不過是選擇「資產」方面的技巧不足，令你的財富增長不明顯，這點我覺得有點可惜，因為如果你努力增加知識，在選股、企業估值、投資時機上多下功夫，你的財富會更可觀，因為你很早已懂得方向。
現時持有的股票，大多不錯，但仍可以再強化。匯豐（0005）有質素，但已經比過往年代弱左，持400股可以，但暫時不用增持。領展（0823）有質素，可持有。
香港電訊（6823）有質素，但這是收息股，對30歲的你來說，持有足夠就得，不用太多。萬洲國際（0288）不過不失，有投資價值的，增長力中等，不算好強。小米（1810）則有增長力，但同時有風險，因為佢仍處燒銀紙狀態，無人知之後的發展，雖然不算差，但估值的變化可以好大，未必適合持有太多。
每月方面，煤氣（0003）可以，至於匯豐則一般。
單靠月供，要累積到$50萬有難度，要同時把握餘下資金的運用先得，試下強化知識後，努力尋找潛力股，才有機會做到。
銀娛（0027）及金沙（1928）都有質素的，前者增長力較強，後者較穩健。派息比率高，沒有問題的，這點要花時間先解釋到，課堂都有講的。
（對照龔成信箱：Q7601）
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
延伸閱讀：
月儲$8,000 5年內結婚 想達標可選以下組合
