開荒牛捱7年頂唔順裸辭 老細寧願請三個人頂都唔留

八爪魚身兼多職一腳踢

日前，有網民在FB專頁「奴工處」發文，指自己「做咗7年，幫公司開荒做開荒牛，好似隻八爪魚咁身兼多職一腳踢。」

樓主續指，「對住一班心理變態同事，重要成日畀人話做得唔好唔夠多，終於做到情緒崩潰頂唔順裸辭。」然而，老細卻只是口頭叫他留低，並沒有出動任何「實質嘅嘢」。

「最後公司決定請三個人返嚟頂我個位。重要新請返嚟其中一個人職位高grade過我。寧願請多幾個同請個高grade嘅都唔願意拎嘢出嚟留我。發現自己一直都係被上司壓榨，真係痴線公司。」

網民：頂咗七年 你自己都有責任

帖文一出，隨即引來網民熱烈討論，大部分都不同情樓主的遭遇，甚至揶揄樓主自己都有責任：

• 「咁都做左7年，其實你都好有問題，可憐之人必有可恨之處，其實當事人都有本身的責任。」
• 「做咗7年都睇唔通個老細乜料！」
• 「做左7年先發現佢唔係好人，咁真係你都有問題。」
• 「一個頂三個，頂咗七年，你自己都有責任啦。」

另外，亦有網民指老闆立心不良，一早等樓主自己辭職，有網民更叫樓主自己做老細：

• 「其實無實質野黎留你，即係都唔係好想留你。」
• 「老闆角度：等咁耐終於等到你自己話唔撈喇。」
• 「打工講金唔講心，感情核突銀紙現實！早日抽離向好出發。」
• 「唔識計數既老闆，好極有限，早走早著啦。」
• 「有能力一個人做n個位，不如自己做老細。」

敵國破謀臣亡

亦有為數不少的網民引述歷史及其他經驗，指出開國功臣都是沒有好下場的：

「老闆唔志在請三個人的錢，他根本有能力多付薪金給樓主，但堅決不肯，原因可能是樓主在不滿現狀之時，多少有流露公司當初草創時自己有很大貢獻的心態甚至言語，老闆早欲除之，以後就可以名正言順說江山是自己一人打回來。」

• 「你睇吓，歷史上皇帝點對幫佢打完江山嘅人？已請三個人嚟代替你，仲唔明？口頭叫你唔好走，戲已做足。」
• 「敵國破跟住梗係謀臣亡！開國功臣就幾多個有好收場？」
• 「開荒唔代表做得野，只代表出現得早……如果唔只老闆，連班同事都話你做得唔好，有無可能你真係越幫越忙啲fd？」

有冇同公司一齊升level？

亦有網民指出7年時間一間公司的規模可以爆炸性增長，關鍵是開荒牛有沒有跟上公司步伐：

「7 年時間，一間startup 可以由一個月10萬turnover 變 100萬甚至1000萬。公司升左level, 作為old seafood 有冇喺專業同能力上一齊升level ？係周身刀冇張利，還是可以獨當一面華麗轉身成為高層，老細其實心裏有數。」

延伸閱讀：銀行職員如何決定物業估價高低？造轉按前，記得搵人幫手「捽」高估價！

延伸閱讀：港男揭「私樓窮人」真相！直擊全家捱平民餐慘過住公屋：香港買樓得返低潮！