長和系︳當年誠哥揸旗一樣大把金句 短期收拾跌勢要睇呢個新盤︳凍鏈茶

長和系︳李澤鉅「千祈、千祈要保住國際金融中心地位」

以前長和系仲係誠哥揸旗時，大把精警金句聽。以為佢退下來之後，再冇金句聽，點知佢大仔都承傳誠哥嘅優良基因。李澤鉅唔單止嘆氣形容其實香港人近年過得「真係幾辛苦」，如何應對要「睇香港政府」，佢指全世界得幾個地方能稱得上國際金融中心，香港「千祈、千祈要保住國際金融中心地位」。又話香港人近年經歷過一浪接一浪嘅風浪，先有2019年「社會事件」、繼而係疫情，而家就經歷經濟放緩。

長和系︳長實派息越派越奀

不過，今時今日講咩都無意思。小股東最關心都係派息。不過，長實 (1113.HK)末期息減少12.4%至1.62元，全年股息減少一成，震驚基金佬同埋股民，唔少券商就下調長實投資評級兼目標價。長實股價上星期單日大跌超過一成，市值蒸發港幣140億。長實股價大跌嘅原因，仲有另外一個可能，就係佢有可能5月會被剔出富時EPRA Nareit全球房地產指數。呢啲指數要保持公信力，耐唔耐就會進行檢討，基於長實上年房地產業務佔經營溢利約54.6%，唔符合75%呢個要求，所以啲大行分析就覺得佢有啲危危乎。