連登仔買科網股一個月輸93% 大輸45萬 就快「鬱到癲」 網民：已成病態賭仔
撰文：經一編輯部｜圖片：Lihkg, unsplash
該名網民昨晚在網上討論區「連登」以「一個月輸左四十幾萬」為題發帖，分享自己今年的炒股經歷；從其炒股過程可見，即使買了今年的爆升的科網股，也可以輸九成！
原文
上年年尾開始玩股，買阿里，美團，中芯，半年賺咗成 10萬，次次買都升，未輸過，當時個人好興奮，覺得買乜都賺
之後今年年中，中芯 4x蚊跌到 2x蚊，倒輸 15萬，跟住個人就痴咗線，日日買
呢個時候開始接觸美股，用 9:30至 12:00呢段時間短炒期權，差唔多打返個和，變成無賺無蝕
時間點岩岩好 11月就開始出事，我好記得，拼多多出業績，我買call，點知果晚大跌，幾分鐘無咗 8萬蚊，但係第二晚坐火箭咁升，呢兩晚我都瞓唔到，心情差到一個點
同時我重課京東，阿里，騰訊call，果陣真係升到爆，隻隻都破 52週，隻隻都賺幾萬，但係我無賣，之後咩事大家都知，就係螞蟻上唔到市，所有科網股大跌，但係我無止蝕，再繼續追，結果就係咁
我諗咗好多日到底出唔出post，因為我唔敢同老婆、朋友、同事傾，但係唔講出嚟我驚會鬱到癲
如果你係股壇新手，希望睇完呢段嘢之後你唔會變成下一個我。
網民回應
不少網民認為樓主跟賭錢無異，指樓主已成為病態賭仔，建議立即收手並找社工輔導，否則只會愈踩愈深。
有人認為樓主因沒有把輸錢之事告訴家人，令自己壓力更大，勸樓主「同老婆坦白，如果唔坦白，你就會有追數壓力，會急住回本，繼續賭仔心態，越賭越衰。」
有人直指自己跟樓主情況差不多：「我同你差唔多，9月頭賺到笑，e家輸到得返5成本，要賺100%先回到本，我勸你唔好急住回本，越想跑數越輸得勁，唔好妄想短期回本，慢慢黎啦。」
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
