「谷子經濟」突發炒起 布魯可新股上市山雞變鳳凰｜凍鏈茶專欄

其中包括泡泡瑪特 （9992.HK），即係成日都見到門市嘅Pop Mart，股價由上年年初去到年尾原來已經飆升3.5倍。另一隻曾被指抄襲無印良品嘅名創優品(9896.HK)，亦有「谷子經濟」概念，上年年年初至今都有超過兩成升幅，因為名創優品上年開始同紅透半邊天嘅Chiikawa合作，喺中港多地開設期間限定店，發售多款聯名商品，食正二次元消費熱。

至於靜咗好耐嘅新股市場，亦有一隻食正「谷子經濟」嘅內地玩具公司－布魯可 (0325.HK)，逆市孖展超購逾4,440倍，成香港新股史上超購額第四名。布魯可超購倍數已經超越2021年上市嘅輝諾健康（6606.HK）嘅4,132倍；凍資額亦打破2021年上市嘅時代天使（6699.HK）6,053億元紀錄，進佔凍資額嘅第五位。市場人士認為布魯可首日股價有望抽升80%。

「谷子經濟」主要對象係二次元愛好者，針對年輕人情感消費。呢隻持有鹹蛋超人IP（知識產權）授權嘅布魯可持有三十幾個IP ，除咗咸蛋超人、仲有變形金剛、火影忍者、Minion、Pokemon、名偵探柯南、初音未來、聖鬥士星矢、新世紀福音戰士、Sanrio 同埋芝麻街等。

其實講到尾，唔好因為個名有「經濟」兩個字，就覺得係咩新經濟，「谷子經濟」改個難明嘅名啫，事實咪又係舊酒新瓶。知識產權喺內地究竟值唔值錢，大家都心照。不過，金融世界入面，個故事有人信，自然就炒得起。

布魯可上市之後，市值將由70多億升至130多億。持股54.95%、來自內地嘅老闆朱松偉亦將會水鬼升城隍。據聞現時身家達40億嘅他，將會晉身百億富豪系列。