香港投資 衣食住行（中）｜林伯專欄

在開始新話題之前，又要寫多段趣事。話說筆者上期文章「出街」後，友人即打電話來與筆者「吹水」。
友人經營一間樓上舖，主要是做夜市的。他指筆者還未道出他們行業最慘情況，以下是一段友人原原本本與筆者的談話，以供讀者參考。
友人：「你寫得可以，但就未講得出我們行業最痛苦之處。」
筆者當然願聞其詳，友人再道：「我就唔講以前某些行家做旅客生意有幾風光，又或者某某行家要從地舖轉樓上舖有幾可憐，我只講我自己。無謂話人嘛！」

近代餐飲業史的悲歌

筆者說：「咁又係，人家有幾好，有幾差，也是人家的事，無謂多管閒事吖。」
友人繼續大聲講：「我自己間舖，做得話長唔長，不過都經歷過新冠肺炎疫情、社會運動、疫後復甦、北上熱潮及香港人生活習慣改變等，所以都應該有多少代表性。」

筆者說：「咁就當然啦，簡直係『近代餐飲業史』一部分啦！」
友人聽到『近代餐飲業史』後，自然眉飛色舞，再加多一把勁盡訴心中情：「新冠疫情，最多係變陣求生，例如做多少外賣及罐頭單；社會運動期間，我舖在旺角，都無辦法，又要交租但無客，都捱了一排；疫後復甦就最正，但生意都唔能夠回氣到之前一半；但到今期香港人北上熱潮及生活習慣改變等，就真係無晒心機，而且係見唔到曙光。」
筆者當然再問他：「何解無曙光？」
「現在不是產品及服務問題，而是根本就無客，我指的是無願意消費的客。你睇，街上係有人，但就不是以前消費那班人。

「以前肯消費的人去了哪裏，相信你都知啦！所以，現時唔係我間舖的食物質素或服務有問題，而係『魚缸無魚』！
「然後，業主有理無理都話要加租，佢話『無客係你既事，我只係知出面租金繼續升，你唔租就過主。』咁你話灰唔灰？」友人歎氣說。
筆者一時無言，只是聽了他的一番話後，除深有同感外，也認為除飲食業外，其實各行各業也不是有同一問題嗎？（魚缸無魚）。

行街買衫非時尚

「食」就寫到這裏，再淺談「衣」方面，其實當中又包含了服裝和紡織業。
說起這些，回看香港過去有許多服裝品牌和紡織公司，涵蓋了時尚設計、製造和零售，以前香港這類行業在全球市場中具有相當潛力。

不過隨著時間流轉，如今無論上中下游已不再以香港為基地，例如衣物製造業早已北上。
設計方面，因為要配合製造工廠流程；加上外資客亦愈來愈願意北上共同商討有關事項，令部份香港設計部門亦同樣要北移。
零售及批發部分就更不用說，自疫後當所有人都懂得上網購物後，「行街買衫」已不是一件常見的事，這從最早期的思捷環球（00330），以至後期的迅捷環球控股（00540）股價表現可見一斑（資金最老實）（見圖表一）。
然後又簡簡單單，讀者不妨問問身邊人，老中青三輩，後兩輩人還有多少衣服是行街買的？又有多少是網上買的？便明白如今賣衫這行有幾難做了。

又隨便講講「行」這方面。表面上行代表運輸，包括客運及貨運，而又橫向包括了海陸空三方面。
要仔細全面分析的話，相信要寫到論文咁大篇。為節省讀者時間，今期就先選擇最貼地的「陸」來講。
的士受網約車影響，生意大受影響，牌價反映一切；小巴及巴士就因地鐵網絡愈趨完善而難以重振昔日光輝。上述三者前景及投資價值，自然不言而喻。
反之，相信讀者最有興趣的，應該就是港鐵（00066）這個政府力推的運輸系統。
不過，話要說回頭，以往資金買港鐵，並不是單純押注其鐵路系統收入前景，還有更多人是押注落其物業部份，即港鐵上蓋物業發展及管理部分。

但又是那句：成也蕭何，敗也蕭何。如今香港物業市場狀況如何讀者心裏有數。
最簡單看看最近有發展商賣樓時承諾，若日後買家撻訂，將不會向其追收差價，希望增加買家置業信心這一小舉動，已反映就連發展商也開始有「人性」。
唔信？看看港鐵近幾年股價表現（見圖表二），應該最有說服力。