螞蟻五年縮水75% 阿里兩個月爆升五成｜凍鏈茶專欄
廣告
近日恒指重返二萬三水平，主要是由阿里巴巴 （9988.HK） 爆升帶挈。阿里單單自今年1月已由低位累升近五成。唔少外資行更改口風，看好阿里雲前景，更調高阿里巴巴目標價至145蚊。不過，呢口價，距離當日癲峰仲有好遠，唔少股民喺250蚊附近價位買，要返家鄉，仲有好遠路程。
當日搞到阿里巴巴股價上天堂，主要因為旗下螞蟻集團上市，不過最後令佢股價一沉不起嘅亦係螞蟻集團，可謂「成也螞蟻，敗也螞蟻」。
2020年計劃上市時，螞蟻估值高達3,150億美元，而最終未能成功上市嘅原因，有傳係中央親自叫停，除咗要打擊馬雲之外，更要打擊一班背後由中國權貴組成嘅小圈子。上星期，習近平同一班民營商界領袖舉行會議，更與馬雲握手，引發各種揣測，呢個大團圓結局，更加刺激阿里巴巴股價大升。不過，咁樣係唔係代表阿里可以返家鄉？
咁就要睇返螞蟻嘅去向。去年底有傳「螞蟻集團即將借殼上市」，事關螞蟻持股35%嘅錢塘徵信有限公司獲人民銀行批准個人徵信牌照申請，成為內地第三家市場化個人徵信機構。不過，螞蟻集團表示，目前無上市計劃，更不存在所謂嘅「借殼上市」。
螞蟻2023年底曾提出回購股份，比一啲外資可以出售部分股票，但當時估值已降至785億美元，就算螞蟻捲土重來再搞上市，隻螞蟻已經大縮水。另外值得一提係，阿里佔恒指嘅比重已經由10％降至8％。聽到呢度，坐緊貨嘅小股民會唔會仲諗住等到返家鄉先賣呢？
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
撰文：凍鏈茶
