羅富記高位出貨 告老歸田返加拿大｜凍鏈茶專欄

據知今次已經係羅富記老闆第二度移民。80年代香港前途談判，東主一家已經移民過加拿大多倫多，仲於當地開過一間羅富記，不過就唔算好受歡迎，始終唔係老外口味﹐當地華人亦都唔係成日食，認為呢啲「粥水」唔值得花錢喺外面食，最終老闆坐完移民監就回流返嚟香港返中環睇檔。

中環出名租貴，羅富記一碗粥賣四、五十蚊、一碟蜆蚧鯪魚球都係二十五蚊，一人平均消費都唔洗100蚊，有人讚佢皮蛋瘦肉粥用真嘅咸瘦肉，而唔似其他粥舖咁用湯渣肉，同埋廚師經常主動加料。依家嘅時勢，偷功減料都未必圍到本，老闆又點樣喺中環生存咁多年？因為個鋪係佢地自家嘅，不過係曾經。

羅富記老闆於1991年以450萬元購入中環位鋪，地舖面積約1,000平方呎，閣樓約800平方呎，合共約1,800平方呎。持貨一直到2017年，老闆開價6,500萬元放售。一鋪賺六千萬，究竟要賣幾多年粥先可以賺到？由八十年代睇到2025年，見盡香港地產之高山低谷，有人肯接貨，老闆於是再售後租回，捱到依家頂唔順，就攞住嚿錢再返去加拿大退休。

做人，最緊要好似羅富記老闆咁，有得揀。