信和家族睇中維他奶大廈 隨時商廈變豪宅｜凍鏈茶專欄

維他大廈位於黃竹坑道29號，以前係廠房，不過維他奶生產線同包裝嘅主要重心早就搬咗去屯門同埋北移，黃竹坑維他大廈呢幢廠厦，以前都仲有租出去俾人做廠房同辦公室，但近年已經空置好一段時間。

自從港鐵線港島南開通後，黃竹坑一帶工厦都轉型為港島商廈區，唔少財團對附近工厦虎視眈眈，或自行將物業發展為商廈。正正係同一條街，信和幾年前同帝國集團合作發展甲級商廈LANDMARK SOUTH。除咗商廈，信和喺黃竹坑站，亦有同港鐵、嘉里合作發展新盤揚海，所以非常之熟地頭。如果可以拎到維他大廈，改做住宅或者商廈，對信和嚟講，直頭係一箭雙鵰！

其實呢招已經熟口熟面﹐因為信和可謂食過返尋味。當年信和因為吼住星加坡楊協成嘅資產，包括工業地皮，於是加入了楊協成爭奪戰。事源當年楊協成侄仔 Charles Yeo同家族成員內訌，向星加坡法院申請將楊協成控股公司清盤，黃志祥父親黃廷芳﹐以及馬拉嘅郭令燦、印尼富商林紹良、以及星加坡黃祖耀等等各自係市場收集楊協成股份， 最終由黃廷芳成功控制87%楊協成股份，立即踢走楊協成廠房改建為豪宅。

不過，香港現時地產市道低迷，估計黃志祥家族先插定支針，未急於出手嘅。