【經一專欄】月儲3,000主要考慮ETF 除盈富外 5隻股票適合長線投資｜龔成信箱

撰文：龔成 ｜圖片：新傳媒資料庫、unsplash

1.手續費

你好，我打算每月用2,500-3,000投資，主要考慮ETF。 想問下如果2800/2833/3140，3選1 應該點揀好？

如月供2800，會唔會因月供金額太少，賺完都係比左手續費？ 除呢3隻外，有咩推薦？

龔成老師：

盈富（2800）及恒指ＥＴＦ（2833）目標都是相同，都是追蹤恆生指數之表現。由於盈富的成交較大，投資這基金會較好。

至於領航標普五百（3140），則是追蹤美股。無論恆指定美股，我長遠都睇好，視乎你自己睇好邊個市場。

如投資盈富，每月供$3,800，都唔算太少，長遠都能賺到錢的，當然，如你日後每月可儲的金額增加，可加大投入金額。

除此之外，你可考慮金沙（1928）、港鐵（0066）、長建（1038）、領展（0823）、中銀（2388））等。都適合長線投資的。

（對照龔成信箱：Q8090）

2.投資回報

龔老師，投資係唔係應該有足夠資金先做，如果知道三，五年後會負債50萬至80萬，係唔係先儲好錢做好資金的準備，等到負債不是太重才考慮投資？

我怕市場的波動，三，五年的投資，息又收唔多，價差，行政費，令到投資回報比放著銀行不動還要少。你有什麼建議？謝謝

龔成老師：

有資金先投資，這是最穩健的做法。但的確，利用負債去投資，都是一個創富方法，但風險就較高，所以，我地要小心管理風險。

首先要控制負債的比例，另外，要明白當中的風險。同時，負債去投資，在一般的情況都不會做，只會在在「明顯機會」才會做。

如果你知道3年後會有負債，你這刻都可投資，但就不能太進取。目的是在3年內有基本的增值，同時3年後有負債時，風險又不會太高。所以，這刻投資收息股這類，穩健，流動性強的項目是較好的。

（對照龔成信箱：Q8076）

3.現金流量表

老師你好，我係股票班學生，我睇1211份中期年報 睇到佢經營現金流出減少 主要話係因為賣多左商品 但睇佢既現金流報表，睇到存貨同2017年同期比較相差好大 姐係話佢今年d貨大部分都滯銷？

好多項都見到現金流報表同2017同期有好多分別，例如存貨增加，應收貿易賬款，可唔可以每個都講下咩意思？

龔成老師：

現金流量表要理解不易的，同埋，我地唔會太執著一年的現金流量情況，只要佢幾年都保持基本的正數，這已經不差。

由於收錢的快慢，以及應收賬等問題，有時現金流量間中出現負數，都可以是正常的，你不用太擔心。

佢2018年上半年的情況，的確比2017年上羊年差，這的確令佢有存貨增加的問題，這就會令現金流減弱，但有時中短期問題，不用太緊張，因為佢這刻已好轉。

（對照龔成信箱：Q8077）

4.生物科技股

龔成老師，我想請教下 1548 金斯瑞生物科技。2014 年上市，市盈率現在去到 123.73，非常高。我嘗試了解為何這麼高，但掌握不到。

是不是因為生物科技還未成熟，所以 1548 會經常大波幅。但我初步見它盈利每年有增長。

那麼這一隻還應該深入去了解，睇年報及招股書？定那麼高的市盈率，根據選股策略，不易沾手？謝謝你！

龔成老師：

金斯瑞生物科技（1548）這類生物科技股，並不易分析的，要較高階的投資者才能掌握。行業及企業變化大，股價變化好大。

佢是高增長企業，生意處快速增長階段，而市場預期佢之後能有更大的增長，生意將會有更明顯上升。如果你要了解這企業，年報是重要的地方，由於佢上市年期距離而家唔算太耐，所以你睇佢招股書，都有d參考價值。

市場不斷對佢將來有好大期望，但這其實有相當的風險，這企業現價不平，股價波動又大，若真的投資只能小注。

（對照龔成信箱：Q8078）

5.樓市

老師，係加息還境下，老師覺得樓市升還是有所回落？

龔成老師：

會有回落，因為能借到的錢會減少，假設之前用盡借貸，某人可以買$500萬樓，加息後，佢可以買的樓變到$490萬，當不斷加息，佢能買得起的樓價會減，這是自然的事。當整個市場不少人都是這情況的話，在其他因素不變的情況下，加息會令樓價下跌。

同埋，香港10年無加過息，而家上翻，當中的力量未知，所以預期對樓市心理上有影響。

當然，上述只是加息因素，未考慮其他因素，而香港樓的供應仍不夠，所以長遠仍會向上。只是中短期可能會有調整。

（對照龔成信箱：Q8080）

6.潛力股 

龔老師你好, 本人32歲 已婚 有一子。

我正職月入25,000左右 現在每月月供股$9,000 初步定了供3-5年期
$3,000盈富 $2,000比亞迪 $2,000港鐵 $2,000領展

手持 66 $39.1 1500股
1928 $35.54 3600股
2800 $28.56 1110股
1113 $57.15 1000股
1038 $56.75 1000股

1448 $5.43 3000股
285 $7.84 1500股
1211 $44.4 45股
ibond 兩手 明年到期.

人民幣40,000(因工作需要 放在內地) 13萬 Saving.，20,000澳幣。

之前見金沙股價跌到$32想再掃貨，但對比整個組合來說 比例好像過多 有集中風險。因我的組合建立沒多久 還未成型，三至五年後應該平均得多。想問此情況是否不應再掃金沙 而且應該減持如800股？

若按此組合進行， 股市下挫時 是否應該把資金集中在潛力股，因按五年後推算 潛力股占只我整個投資成本比例大概20%左右。以我年齡會否太少？欠缺增長力

我是否應該賣出1113 換1038? 買1113時有點衝動，我清楚投資不應出出入入，要換手的話現時要補不用太多 已收了1113股息. 1038 對比的話好像較有潛力。

若要加潛力股 應該1177 或 868嗎？1177市盈偏貴, 因決定長供1211 所以應該285不會再加注。但怕組合分得太散，請俾些意見。

問題較多 麻煩了。多謝！很想報股票班 學估企業價值 但因要照顧小孩，暫時只能看你的書以表支持！

龔成老師：

1）如果單一股票，佔整個組合15%以下，都可以接受的，有時中短期資金問題，佔比多少少都無問題的。金沙（1928）是優質股，有時中短期佔多都無問題，久唔久調整翻組合的比例就得。

2）潛力股、平穩增值股、收息股的比例，會因為年齡同你個人的風險程度決定。當然，當時市況處平貴都是一個因素。

當股市下跌時，我地會比例不同股票，睇下邊個較優質又處於較平位置。

對年輕人來說，20%潛力股都可以的，但如果較有實力的投資者，這比例可以增加。

3）長實地產（1113）及長建（1038）都是有質素的，都可以投資。當然，我會較喜歡長建，長線增長力高少少。

4）這4隻都是潛力股，你可以建立較平衡的組合，當中以比亞迪（1211）質素較高，你可以加多少少都得。中生製藥（1177）近期股價回翻d，無以前咁貴。

明白，你暫時睇多d書先，希望有日係股票班見到你。

（對照龔成信箱：Q8081）

7.合理區

龔sir,中國生物製藥因政策而下跌而是買入的機會呢！

另外，想請問你係書中提到要評估股市的氣氛是悲觀定狂熱有一些準則如多唔多人參與股市，專家，新聞的消息等，但係這些都比較難的清楚判定或量化，有沒有一d方法可以清晰客觀咁去判定股市氣氛呢？
謝謝！

龔成老師：

中生製藥（1177）是有質素的股，但過往股價處於貴的水平。之前因政策因素而回落，其實只是返回合理區。行業會略受政策影響，但這些政策是遲早會發生的事，中國政府一定唔比一個行業毛利過高，會同方法令佢變翻合理的。

這股有前景，但股價波動，現價合理翻，分注長線投資可以。

至於你話大市氣氛，其實我股票班有詳細講述，會列出好多因素（具體的），因素愈多及愈明顯，就顯平當市的大市是「冷或熱」，而我地相反應用就得。

例如好多人買股票，傳媒等一政向好，這都是利好的消息，反映市場處熱，我地要小心。

（對照龔成信箱：Q8082）

8.騰訊（0700）

你好，我想問一下一般大企業做大手回購既時候，除了防止股價急瀉外還有沒有其他因素？謝

龔成老師：

有時佢見到股價處於平的水平，而企業的現金充足，所以進行回購計劃，你見過往匯豐（0005）同騰訊（0700）都試過。

在市場買翻自己的股票，然後會進行註銷，這會減少股票的總數量，而每一股的價值就會自然提升。好多時，當企業見到自己股價處平，就會用這方法去回饋股東。

（對照龔成信箱：Q8083）

9.市盈率

本人對電動車行業都幾樂觀..但想了解下比亞迪1211前景..30幾蚊市盈率會否高？現價入會否合適？

龔成老師：

市盈率只是評估企業平貴的初步指標，不能單睇表面數字就定為平貴，我股票班都會講，這數字要有調整先有當中的代表性。

特別是潛力股，之後的盈利增長可以好快，而市盈率只是用過往一年的數據，因此要作變化會有應用價值。比亞迪（1211）雖然市盈率少少高，但考慮增長因素，其實處合理水平的。

不過這股好波動，分注或月供投資較適合。

（對照龔成信箱：Q8084）

10.累積財富

Hello 龔sir，

我想試下去做網站制作、SEO相關既公司到做，不過我之前創業兩年，無工作經驗、無相關學歷背景。

想試新野並不是因為創業失敗。在創業既過程中我需要為公司做網站，我發覺我好中意做呢樣野，可以全程投入，不眠不休，而且覺得好開心，想學更多啲相關嘅野，所以好相去搵呢方面既野做。至於我點解識做，都係偶然見到網上教學，邊學邊做。

公司可以交比拍檔搞，我亦唔介意由低做起、唔介意低人工。

雖然屋企唔係有錢，但不缺錢，屋企人也從來都好支持我做任何決定。

只是我已經快27歲了，而且我無相關學歷，有的只是造了兩個網站的經驗。

我的考慮是如果我專注於目前既生意，我好有信心好快可以搵好多錢，但係我同拍檔之間有少許矛盾，而且做目前既生意純粹係因為我見到前景可以賺到錢。

但我發覺純粹為賺錢而投入去無熱情既事上會感到無聊和無成功感，我好想做我喜歡既事，而目前我知道既就係整網站。

另一個考慮是整網站既前景。目前呢個行業可以話十分飽和，競爭激烈。以我一個無相關學歷、只有熱情的遲起步者，客觀來講，我睇唔到我將來會有任何優勢。

你話會唔會太遲？我應唔應該去試？還是應該專注目前既生意？

龔成老師：

比較穩陣的做法，是你繼續做原有的生意，因為這可以幫你賺到唔少錢，你可以憑這生意累積財富，但不是要你永遠做，你要定出兩個目標。

第一，現時的生意賺到錢，你要憑這不斷儲蓄及投資，等自己的財富增長到某一指定目標。

第二，將現有的生意建立系統化模式。你要想方法，建立制度，同時思考請人等方法，慢慢令你可以退下來，直至整個生意可以「自動運作」為止。

當你做到上述的目標，你就可以好安心，再搞另一門事業，同時又唔洗放棄原有事業。

上述只是一個穩陣的做法，就算你唔跟，呢一刻跳出去都無問題。你的人生，要你自己去玩的，好好享受就得。

網站現時雖然已好多，但唔會飽和的，你只要想一些全新的範疇，做無人做，但消費者需要的事，咁就得。

（對照龔成信箱：Q8085）