【經一專欄】揸$20萬學初投資 年輕人可考慮3隻潛力股｜龔成信箱

撰文：龔成｜圖片：新傳媒資料庫、unsplash

1.潛力股

你好，龔成老師，近期一連睇了你的數本書，覺得獲益不少。

如果想以20萬買一些潛力股，又或收息股。我應以這筆錢買，還是用來月供好呢？

我有d想買以下幾種，盈富（2800）、越秀房產（0405）、比亞迪（1211）。謝謝老師

龔成老師：

月供股票是一個很好的累積財富方法，我會建議你每月供$8000，將你$20萬慢慢分注去轉成有質素的股票，但去到咁上下，都要睇翻現金情況，因為點都要有些現金餘下。

如果你是年輕人，可以投資一些增長力較強的股票，部分平穩增值，部分潛力，這就得。你上述選的3隻，都是這些類別的。

（對照龔成信箱： Q8317）

2.收息股

龔成你好呀！

你時常講收息股通常都有5，6%，想問下係點樣計算？
投資新手，小學生問題

龔成老師：

以上年度的全年股息除以現時股價。例如上年的中期息$2、未期息$3，合共股息就是$5，如果現價為$100，股息率就是5%。

一般的財經網站，都會顯示各股息的股息率。

（對照龔成信箱：Q8314）

3.領展（0823）

另外，75.4買了領展，前景可觀嗎？什麼時候可以放？還是長線？

龔成老師：

領展（0823），是優質股，前景正面。不過，你的買入價不平，雖然這股有少少「貴得有道理」的情況，但在略貴的價位投資時，就只能小注分注入。

這股可以長線持有，但就不要太心急增持。

（對照龔成信箱：Q8315）

4.盈富基金（2800）

老師，之前睇你的片，講投資盈富基金，20年後能有3萬現金流，點樣？唔太明？

龔成老師：

我之前所講的叫盈富基金（2800），這是一個基金組合，持有50隻恆生指數，這些都是香港最有代表性及質素的股票，雖然未必能爆升，但長期來說，有平穩增長的能力，加上這是一個組合，風險就能分散。

投資這基金，你只需要有證券戶口，除投資股票般投資就得。而我建議可以做月供，即是每月投資固定的金額，這個你有證券戶口後，去銀行登記「月供股票」就得。

至於我所講，每月投資$6000，20年後，能創造$3萬現金流的方法，簡單來說，就是運用「先增值，後現金流」作方法。

年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

如果你未有選潛力股的能力，未有掌握投資時機的能力，就可以簡單地投資盈富基金（2800），利用月供模式都得。跟據過往恆指40年的數據，連股息的複息回報有15%。

假設你每月投資$6000，月供盈富，假設15%複息回報，20年後，就可以滾存到$730萬。當然，盈富往後的增長力可能會減少，令你最終的現金流有影響，但如果假設有10%，都合理的。

然後再進行資產配置，因為「先增後，後現金流」，尾段時期著重保本，追求現金流，這是可投資收息股，目標是5%以上的股息，以$730萬計，一年收息$365000，每月以息約$30000。

（對照龔成信箱：Q8318）

5.置業

成老師：想請教置業問題。本人與丈夫共同擁有一市區物業，現在自住，已完成供款。

正構思賣出套現，再買入兩個單位，一自住，一放租，增加”收入”。或用已儲蓄現金購買另一物業，但要補印花稅約五十萬。請問哪個方法更好？謝謝你

龔成老師：

你賣出後再買入物業，這動作會有較大的買賣成本，因為政府而家收稅好勁，愈少動作愈好。

你上述會有3次動作，比起這個，你可以加按現有的物業，然後再投資另一物業收租，這只有1個買賣動作，你的買賣成本會大減。

如果你地現時的是聯名物業，可以先拆名，然後再以另一人的名去買收租樓，咁樣可以避開重稅。你加按後仍可住在現時的物業中。

具體情況，你可以問下地產經紀同銀行職員，這動作唔洗急著做，多蒐集資料先。

（對照龔成信箱：Q8319）

6.網股

Hi,龔成老師
我有問題請教你，我唔知道繼續等落去定放手，

0698 @20000入手價2.4
799@2000入手價11.98
1415@10000入手價4.3

1672@9000入手價14
1786@5000入手價3.48

我知道自己太?請教你，見到個市，自己渣住啲死股，唔知點做，想請你指教一下小妹，感激！

我知已經蝕左10幾萬，這教訓~~~~

龔成老師：

我地繼續持有一隻股票與否，關鍵位是企業的質素與前景，買入價、賺蝕數，只是一個心理因素。

通達集團（698）本質不太差，但之前這類股炒得太勁，現時先至係佢的合理價，這股都可守住先。

IGG（0799）這類網股，本質一定好波動，要睇你承唔承受到這類風險。這類股只可小注投資。

高偉電子（1415）同通達都有類似情況。

歌禮製藥（1672）風險十分高，因為佢仍然無錢賺，根本是博一博，這是風險投資，最好在反彈後先減持。

鐵建裝備（1786）雖然不是無質素，但估值偏高，就算這刻仍然有少少貴，你最好在有較大的反彈時賣出。

上述多隻股都同科網有關，有行業集中風險，最好在反彈時，減持部分，減低你的風險，餘下先再守。

（對照龔成信箱：Q8320）

7.領展（0823）

龔成先生你好。我想向你請教一隻基金，首X香港增長基金。

網上所見，Morningstar分析指呢隻基金係一隻大基金，投資股票(98.6%)，現金約1.4%。評級為4-5星。

呢隻基金集係10隻中港股(46.4%)、民企(19.1%)、紅籌(14%)，其他只有H股(9.8%)同新加坡(9.4%)加流動資金(1.4%)。

10隻中港股：騰訊控股(5.6%)、友邦保險(5.5%)、港華燃氣(5.1%)、牛奶國際(4.8%)、維他奶國(4.8%)、怡和集團(4.5% )、新奧能源(4.5%)、石藥集團(4.4%)、招商銀行(4.0%)及中國蒙牛(3.2%)。

現時中美貿易摩擦升溫，香港股市走勢反覆向下。如果以中長期(5年至10年)的增值潛力、投資風險考慮，首X香港增長基金，會否比領展、盈富基金更值得投資?謝謝

龔成老師：

初步睇，這基金都有投資價值。

比起領展（0823），佢是一隻基金，持有多隻股票，有分散風險的作用，所以投資價值可理解比領展高。

至於與盈富（2800）相比，則要睇佢過往的回報率，這基金能否跑贏大市。因為佢同盈富都是基金，都有投資類似的股票類別，但盈富是ETF，有手續低，買賣方便，所以本身已有優勢。

如果該基金比起大市不是好強，但又要比一定的手續費，咁點解要買這基金，而唔簡單投資盈富呢？所以，你要先比較過往多年的回報，衡量這基金是否值得投資。

（對照龔成信箱：Q8322）

8.優質股

老師，你成日叫人買入優質股長期持有，即是買入後一個字，就是「等」，對嗎？

龔成老師：

買入優質股後，基本上就是「等升」，唔好以為好容易，有好多好多散戶都做唔到。我以前做銀行，見好好多客$1X買入港交所（0388），但係$20賣曬，呢D客大把。

有時，耐心持有對好多人來講，是好困難的。

當然，我地都會檢視企業的質素，但分析重點是「企業」，而不是股價。

（對照龔成信箱：Q8323）

9.騰訊（0700）

龔成老師，有問題想請教下。我422入了4手700，現是跌破300，該如何步處？

止蝕還是再看情況等待？
謝老師指教

龔成老師：

騰訊（0700）本身有質素的，但你在貴的價位買入，相信要守一段較長時間先返到上去。因為佢在$300以下，先開始進入合理區（但都未到平）。

這股有質素，有得守的，如果4手對你來說，不是佔財富的好大部分，其實可以守住先。

（對照龔成信箱：Q8313）

10.月供股票

想請問老師，我同先生現時每月收入共七萬左右。

已經買左樓，我地月供16000。買樓及裝修已經用左我地好大部分存款。現時合共只有十萬左右。

唔計層樓，想係3年內有150萬資產，請問可以點做？同時想建立一個股票組合，應該選邊d先岩？麻煩老師了

龔成老師：

如果你地合共能每月儲到$3萬，那要滾存到$150萬就比較合理。

假設你可以儲$3萬，你可以做月供股票，每月$2萬，投資一些平穩增長股，加少少潛力股，前者如盈富（2800）、金沙（1928）、港鐵（0066）、後者如比亞迪（1211）、中生製藥（1177）等，都是可投資的，但潛力股的比例要較。

至於餘下的$1萬，就儲現金先，要等有明顯的機會先投資。

只要以上述方法，憑儲儲及投資，要滾存到$150萬是合理的。

如果你每月儲唔到咁多，只能儲到$2萬，就可能要進取少少，投資潛力股的比例多D。同時，要加強選股、企業估值、投資時機等這些技巧，先可以令你財富有更明顯的增值。

（對照龔成信箱：Q8324）