【經一專欄】26歲投資新手揀平穩增值股 可考慮買滙豐＋盈富 ｜龔成信箱

撰文：龔成｜圖片：新傳媒資料庫、unsplash

1.平穩增值股

老師想問下我仲未買第一隻股
今年26歲唔需要咁進取
只望有息收係咪可以買匯豐
有冇其他選擇

龔成老師：

以你的年齡，其實可以進取少少。

不過，你未有投資經驗，加上可能你本身低風險，所以，我會建議你投資「平穩增值類」的股票。

匯豐（0005）都算是這類的，但你預佢增長力不強，收下息就算。

另外，如何可以的話，不要只集中曬一隻股票，可以分配部分資金去其他股，盈富（2800）都是平穩增值類，如你未有選股能力，可以投資這股的。

（對照龔成信箱：Q8287）

2.負債比率

老師，我想請教以下幾個問題：

1.關於負債比率計算方法，我見到有人講係=總負債/總資產，但亦有人講=總負債/股東權益。請問邊個計法對評估企業風險較好？

2.最近有大行同世銀調低中國及東亞地區經濟增長，請問閣下點睇？長遠來說投資中港企業還值得嗎？

3.關於騰訊，企業近來不斷回購股份，似乎對自己好有信心，雖然佢近半年跌唔少，但預測市盈率仍高於30，依家又好似睇唔到佢未來盈利增長可以支撐到咁高既市盈率（內地對手遊諸多管制、部分遊戲未能變現），咁係味代表佢現時已唔值得投資？

4.我聽過一個講法話預測市盈率高於30既企業唔好沾手，因為安全邊際唔夠，原因係企業根本好難長期維持盈利增長超過30%，但亦有講法係高PE既企業先值得投資，因為代表市場睇好佢未來既增長（例如亞馬遜或netflix估值超高)，請問您同意邊個講法？

龔成老師：

1）其實兩個都是負債比率，只不過是總稱，如果要細分去講，以「負債對總資產」，以及「負債對股東權益」較好，而較多人稱「負債比率」，是形容「負債對股東權益」，而這個都是較多人用的。

2）一個地方的中短期經濟，總會有上落，這是好正常，只要長期無問題就得。而中國及香港的長期因素仍好。

3）回購是其中一個分析點，但一定不是核心，這只是反映企業對自己公司有信心（但好多企業都會對自己有信心的）。所以，所有野都要從核心去分析。這企業有獨特性的，同時仍有一定的增長力，因此有投資價值。

但估值是最大的問題，你見佢市盈率咁高就知，$300以上已經超過了合理區，因此在$300以下，才可以分注買入，但仍不要太大注，因為未算平。

4）以市盈率去估值，是一個好初步的指標，就算我在課堂所教的市盈率估值法，都要將當中的數據作調整，然後才可估值，最後先知是平是貴。

所以，高過30倍是一個指標，但只是好初步。

當你有左整個估值概念，你就明白，我地唔會單單話市盈率高定低，就認為是平貴，當中亦要考慮你所講的高增值概念。

（對照龔成信箱：Q8284）

3.熊市

老師，最緊香港股市十分波動，整體下跌比較多，會是熊市的來臨嗎?
老師對

700 175 1211

有什麼看法 可以長期持有嗎？

龔成老師：

過份分析牛市熊市不一定有用，我地只要翻去最基本的層面，買股票就是買企業，你就會明白，所謂的牛熊，以及股市十分波動，都不會影響我地投資企業的策略。

而你上述所講的3隻股，本身都有質素，只是股市波動令佢的股價上落較大，只要用企業層面睇，就不用理股價波動，睇翻佢地的基本面無太大變動，仍然不差，可以長線持有。

（對照龔成信箱：Q8285）

4.中國投資基金公司（0612）

龔成老師，最近有留意到一隻股票（612）中國投資基金公司，見這隻股票升幅很大，如早前買入，現時獲利已不少。

但研究過這隻股票，不見有什麼業務，年報仍顯示有負債，而且它只是一間投資公司，現時價位咁高，是否不值得投資？

龔成老師：

中國投資基金公司（0612）主要是做投資的，投資上市與非上市公司之證券、可換股票據、優先股、購股權、認股權證或債務證券等，以取得中期資本增值、股息及利息。

這類股好難好難分析的，因為外人好難知佢具體的操作情況，加上佢過往幾年都有虧損，我對這企業有保留。

千萬不要睇翻過往股價，事後孔明認為投資這股好易賺，這是極危險的概念。非常多散戶咁樣輸錢。

另外，這公司的賬目，在2015年層出現問題，獨立核數師對其賬目「不表示意見」，反映當中的賬目有古怪。要小心這公司。

（對照龔成信箱：Q8286）

5.恆生（0011）

hi sir,我想問下一隻股票怎樣看應持有多少？盈富同恆生應該持有多少才算合理？月供又點分配？

龔成老師：

首先，我地只會持有優質股，盈富（2800）、恆生（0011）都有質素，可以長線持有。另外，我地會考慮每個人年齡情況，例如後生仔就進取D，年長人士就偏向收息類。

而上述兩股都是平穩增值類，適合大部分人的。

由於恆生是單一股票，而盈富是組合，所以比例上，盈富可持有較多。例如你想月供$10000，就可以其中$7000供盈富，$3000恆生，咁樣分配就得。

（對照龔成信箱：Q8288）

6.騰訊（0700）

成哥，救命啊！我現年23歲，投資新手。在$307.6時買入騰訊，只是一手，但已佔我大部分儲蓄，現跌左唔少,我應該放手嗎？

還是繼續持有？另還有約3萬元可用資金，該做怎樣的投資？謝謝你

龔成老師：

騰訊（0700）本身有質素的，不用太擔心，初步估值計，$300以上開始貴，你的買入價只是少少貴，唔算太貴。

這股始終有質素，你可以持有住先，這股有得守的。

至於餘下的$3萬，就持有現金先，不要心急入貨，除非股市出現好大的調整。同埋之後入貨，最好入科技以外其他類別的股，咁樣可以有效分散風險。

你23歲，初期資金不多是正常，努力儲多D錢同學多D投資知識，因為你年輕，將來可以滾存到好大的財富。

（對照龔成信箱：Q8289）

7.盈富（2800）

龔成老師你好，本身對投資完全無概念，到近幾個月開始留意你的專頁，都好想為自己的資產做增值。

我今年29歲，月入約18k，儲蓄約30萬，如果唔去旅行每個月大概可儲1萬。

本身有買基金，最近考慮將月供$500提升至$1500，而家基金有5萬多。如我另外再投資月供$2000盈富，$2000比亞迪，請問如此分配可快速令資產增值嗎？謝謝

龔成老師：

你29歲，是財富增值的一個黃金時間，要盡快啟動投資計劃，但記住不是胡亂炒賣，是合理地累積真資產。

你每月可以儲$1萬，其實可以將其中的$6000去做月供，選3隻股，例如盈富（2800）、港鐵（0066）、比亞迪（1211），每隻$2000，長期月供儲資產。餘下的$4000就儲現金。

基金方面，如果該基金是有質素的，可提升至$1500。

至於$30萬，如果都是可以動用的資金，其實已可]以將部分，慢慢入翻D優質，平穩增值類的股票，長線投資。總之分注，慢慢入，同埋唔好用盡現金，因為現時的市況只是合理，未到平宜，要留有現金。

（對照龔成信箱：Q8290）

8.騰訊（0700）

你好呀龔先生。係我d朋友介紹我參考你的投資股票心得，我有留意左一陣，你會教我們在那個時機入市，我在好多年前我媽叫我投資賭業股票。

$52買了金沙中國我用左十五萬到了現在還未到位
近排又聽朋友講在$420買左騰訊控股

我買了八萬
現在到了這個時刻究竟我幾時可以入市

因為我覺得自己非常黑仔買親都未賺過
我只求停手或者輸少少離場因為我唔想眼白白睇住d錢浪費

又唔知道幾多年都未有機會上返這個位置
希望龔先生可以幫幫我

龔成老師：

其實你並不是黑仔，而是同好多散戶一樣，犯了相同的錯，同埋投資知識不足。

你持有的金沙（1928）同騰訊（0700），本身都有質素，但你就有兩大問題，第一是在不適當時間買入，第二是不懂分平貴。

你每次買入時，都是市場看好，最多人推介這股，最多人談論這股的時間，這往往是較貴的時候，簡單來說，當好多好消息在這股身上發生時，我地反而要小心，因為股價已被炒起。

第二，你不懂分析平貴，如果你對企業估值有基本的認識，就算以最入門的市盈率去睇，你會見到騰訊在$400時，市盈率高達60倍，這是一個高得好少見的水平，反映佢當時都幾貴。如果比較合理的價格，要$300以下才是。同埋，如果有上過我的股票班，都有計過金沙的估值，合理區大約是$30-$45左右，所以當時你買入的區域是貴。

另外，你過份集中在這兩股，都會有風險，就算再好的股票，我地都要適當分散。

比較好彩的是，這兩股都有質素，你可以守住先，但就唔好再入兩股。同時到佢地翻上去後，就要減持翻個比例。

由於你不懂把握買入時機，建議你用月供股票模式去進行投資，而買入盈富（2800）是最好的。

（對照龔成信箱：Q8291）

9.止蝕

老師你好，有個問題想問：
以乜野黎set止蝕位？

例如：我在$60買入，咁佢而家跌到30。我應唔應該先止蝕？

龔成老師：

如果這企業的本質無變過，都是優質股的話，基本上是唔洗止蝕的。

我地最重要是分析企業的業務本質，以及長遠的前景，中短期的價格可以波動，因此不要被買入價、現價影響了我地的投資策略。

如果該企業的本質無變，過往$60，現時$30，這反映企業平宜左，我地如果做賣出的動作，根本不合邏輯，反而應該適當地買入（當然，仍要分析這刻是否平宜，同埋自己的貨會否過多）。

（對照龔成信箱：Q8292）

10.收息股

龔老師你好！我今年43，想月供3號6000蚊作為退休之用，請問供20年的話，是否可行，謝謝你的解答

可應付日常開支嗎？

龔成老師：

你的大方向正確，不過當中要作出調整。

第一，你可以長期月供股票，不斷儲資產，煤氣（0003）是可以的，但不要只投資煤氣，這會令你過度集中在單一股票，風險不少。因此，最好加上盈富（2800）在組合裡月供，長期進行，咁會好D。

如果你堅持20年，基本上到時會滾存到$400萬-$700萬財富，（假設回報率每年增長10%-15%）。

但到時要進行資產配置，因為煤氣、盈富的現金股息不多，如果你單靠這些股息，不足以生活，最好是到時，再轉到一些現金流類別的資產，例如收息股，只要有5%、6%股息，你就每月能收到現金流$20000-$30000，相信都足夠到時的生活。

（對照龔成信箱：Q8293）