90後情侶月儲16K 想6年內儲160萬 靠盈富港鐵長建比亞迪增值｜龔成信箱
撰文：龔成 ｜圖片：新傳媒資料庫
1.增值
龔sir您好：最近我終於睇晒你寫既其中幾本著作和你推介既書（有幾本書仲未有貨）。我是一個多月前無意從FB發現你既專頁。現在諗返，如果我能夠早多2年認識到你（但依家都唔遲），我諗我會儲得更多資產。
早幾年我讀大學，一共16萬幾嘅學費全部都係用我辛辛苦苦在讀書期間做兼職既人工去交的，但當初都有掙扎過要唔要問政府借無利息既貸學金，畢業後一年才分期慢慢還比政府。
因為我當時既心態係唔想畢左業後仲要揹住筆債要還，雖然免息，但最後都無借到。依家諗返起我如果有借，咁我做兼職?到既錢就可以做其他投資，咁就唔會損失左咁多機會成本。
我同男友依家有一個共同目標，就係希望6年後大家一齊合共草到150-160萬。我地好大決心相信自己一定做得到。我同男友現有現金20萬左右，另外有額外5萬5千我借左比個朋友，筆數要3年後才可以整筆收回，沒有持有任何股票。依家每個月都keep住同男友一齊草到1萬6左右。我和男友都是90後，可接受少少風險。
現在有以下問題想龔Sir您幫幫我：
（1）手上既20萬現金，想動用其中10-12萬分注買入平穩增值股或者少少潛力股（我心水1038，0066，2800 ，潛力股1211或0285）。因為依家呢幾隻股都唔算平，想問下你如果分配才好？
（2）每個月會動用8000蚊做月供股票：計劃3500盈富，1500港鐵，1000長建，2000比亞迪，想問下月供呢幾隻股票會否同我問題（1）分注入有衝突？我地手上現金唔多，不知道分注和月股呢幾隻如何分配是好。
（3）另外，我唔係好明白收息股既股息計算方法，例如我用7.3蚊買入6000股港燈（即$43800），周息率為5.492%，咁一年會收到幾多錢既利息左右？所收的利息現金會因為我買入價而有所不同呢？非常謝謝您。
龔成老師：
如果你當初問政府借錢，有可能無咁大動力去做兼職，情況有可能不一樣。同時，就算你將錢用於投資，若新手不懂投資方法，有可能得不償失，所以，你當初無借可能是正確的，但如果你早點認識我，能早點開始提升理財知識，這會對你有利，但現在都不遲，你急起直追就得。
1）你可以動用$10萬去投資穩健股，平穩增值，盈富（2800）、金沙（1928）、港鐵（0066）、領展（0823）、長建（1038）等都可以，雖然而家唔平，但你手上無貨，所以點都要有少少貨打底，你分注入就得。
2）月供$8000可以，這不會令你$10萬資金有衝突的，月供是長期累積的過程。你所選的股可以的。但由於你仍後生，這部分可以多少少潛力都得，例如$5000月供在穩健類別，$3000月供潛力股，例如比亞迪（1211）$2000、中生製藥（1177）$1000，不過，一定要長期。
3）股息率就是反映現時股價買入，以上年股息計，你收多少股息。例如用$7.3買入港燈（2638）6000股，你要用$43800，而佢上年派息（佢每年都會宣佈），一年合共$0.4，你持有6000股，收息$2400，你將$2400除以$43800，就是股息率。
但這只是用上年度的股息計算，下年是多少，就要等宣佈，你睇一般的財經網站都有的。（對照龔成信箱：Q6111）
2.長線投資
呀sir我想問，港鐵、長和、領展都是優質股。我應該三隻裡面點選股？
另外，我$17、$14買入比亞迪電子，值得長線嗎？
我$6 買入北控水務，值得長線嗎？
龔成老師：
這3隻都是有質素的股票，如果要選最優質，長遠較有增長力的，就算是港鐵（0066）了，這企業有相當的獨特性，運輸+地產係佢最大的優勢，同時政府表明香港長遠會更依靠鐵路，因此長遠正面。
至於比亞迪電子（0285），這股正面的，但股價太波動，同時之前估值有少少貴，長線無問題，你不用擔心。
北控水務集團（371）長線同樣無問題，但由於佢業績有少少增長慢左，所以市場對佢重新估值，令股價下跌，但這股有質素，長線無問題。
（對照龔成信箱：Q6117）
3.雷蛇（1337）
龔sir 請問一下你睇唔睇好雷蛇
濠亮及新意網既前景
龔成老師：
雷蛇（1337）好難分析，因為這是好新興的行業，當中有好大的未知數，可以好勁，可以好差，只能話現時的市場估值，大部分來自概念價值，要小心。
濠亮環球（8118）見唔好企業有獨特性，同時規模不算大，投資價值不高。
新意網集團（1686）本質不差，大股東係新地，同時業務有前景，因此長遠正面，因經常估值過高，就算最近下跌了，仍然不平。（對照龔成信箱：Q6107）
4.恆生指數
老師，我見你成日別人而家市況，一邊入貨一邊儲現金，那現金係咪等大跌市動用？但點為止大跌市？恆生指數市盈率去到幾多左右？
龔成老師：
對，現金等大市跌先會入，我地唔會知大市幾時跌，但現時大市在合理區較上部位置，我地就唔應該用盡資金，一定要留有現金。
這些現金，就是等大市跌至平宜區才買入，以現時恆指的市盈率來說，要跌2成才算開始平，如果跌3、4成就好平（一般來說，恆指在10倍市盈率以下，會開始平，但這只是好初步的分析，無絕對標準）。
我地唔會知大市會唔會跌，會跌幾多，又或上升，我地只能用一套被動式的策略進行。所以，這刻一邊入貨，一邊儲現金是最好的。（對照龔成信箱：Q6108）
5.股息增長
成兄：
想問2個小問題，麻煩；
1. 1038(長江基建), 應否於52 週低$60 左右，大概3.9里息，先買入1手先，可處於不敗之地，享長期股息增長及公司發展成長
但我本身有月供1038, 每月$1500 由上年尾開始,不多股份
2. 1211 (比亞迪), 已跌至幾$50 邊， 已經月供幾個月，應否加大月供金額$，還是減少月供金額$，還是不變應萬變？？
龔成老師：
1）長建（1038）是優質股，只要不佔組合過量，分注買入無問題，你買一手可以，這股長遠正面，同時月供都得。但中短期因歐洲業務不利影響，相信仍會較一般，所以要長線。
2）如果你之前每月的月供金額好少，則可以加大，但如果已合適，則不用變。月供股票，要長期進行，中短期的變化，可以完全不理，所以你不變都得。（對照龔成信箱：Q6109）
6.收息股
龔老師你好，小弟也是一名80後，剛踏入20尾，早一年多前由一名打工仔正式轉型成為自僱人士，於街市開菜檔賣菜，每天由早上5點工作至晚上9點多，雖然競爭大，賺錢不多，但勝在穩定
但街市工作真的很困身，因此我目標是透過建立穩建的組合盡快達到半退休的生活，由於在財務增值方面的概念及知識較貧乏，可能會令老師你有點費解，希望你能提供意見
在過去十年我已供斷2份終身保障的儲蓄人壽，2年後有2份保險的月供基金亦將到期，大概有25萬左右可以回到現金流
由於本人有公屋單位，雖然家人想我先置業，但計過條數，即使以綠表換居二在未補地價情況下，亦要供近2萬一個月25年期，感覺上過份困身，因此我先希望先用現金慢慢建立穩健財務狀況，一邊等待更好的入市時機
目前本人有50萬可動用現金流財政儲備，每月有3萬至3萬5可做穩定投資
目前打算每月買一手收息股及一中短線股份希望你能給點意建
在收息股方面我正考慮中銀（2388）或港鐵（0066）
而中短線方面想未來一年想投資新意網集團（1686）/中國電信（0728）/洛陽鉬業（3993）
雖然我知道目前大市不穩用月供方法教安全，但由於本人只有渣打一間銀行戶口，而我工作方面比較困身，無法在銀行營業期間到銀行慢慢做手續，要專特請替工頂我半日時間去搞，由於目前我仍處於毫無概念的階段，所以不敢輕舉妄動
以上是本人目前想法，希望老師能指點我應該用直接買股票方式還是月供股票比較好，感謝
龔成老師：
你工作時間長，我唔知你會唔會全日都忙，但如果可以的話，利用在檔裡空閒時間，多睇書增值自己，特別是理財、投資、致富、創業類的書。
你作為年輕人，仍然有突破的機會，明白你想進求穩定，但你可善用這些時間增值自己，令自己有得突破。
人壽及保險類是理財中防守的部分，我地理財要攻守兼備，防守部分足夠已得，不用太多，你之後要多想進攻部分。
如果你不打算這刻買樓，可以集中在投資增值方面。而我地進行人生財富累積，可以用「先增值，後現金流」的方法進行，因此，這刻不用投資太多在收息股，可以集中在增值類別就得。
以你現時的情況，又這麼困身，做月供股票是最適合，因為你設定好供那些股，供款金額後，之後就只要不斷供，長期進行就得，完全不用理會。因此是最適合你的。
你可以供盈富（2800）、港鐵（0066）、中銀（2388）、長建（1038）、領展（0823）、煤氣（0003）、比亞迪（1211），這已經是一個適合你的組合，你長期供就得，大市波動都不用理會。
你最好打一打電話比銀行，問清楚開股票戶口、月供事宜，所需交件等，手續費，以及那些股有得供，咁會幫你節省時間。（對照龔成信箱：Q6112）
7.長線投資
龔sir! 你有冇咩書介紹番, 我想學多啲基本分析去長線投資, 例如點樣睇莎莎合理價水平 / 同行比較, 謝謝~~
龔成老師：
《股票勝經》、《證券分析》、《巴菲特寫給股東的信》。
估值係重要的概念，你可睇下書先。我的股票班都有講述相關內容，但都要講成5小時學生先明，可以都有少少難度。（對照龔成信箱：Q6113）
8.香港電視（1137）
龔sir 請問1137香港電視，是否轉營，疑似變身科網股，可作潛力倍升股看待嗎？疑似獨角獸概念……
龔成老師：
香港電視（1137）的確變了網購企業，王生這個人的確很強，這企業最初做電訊，好成功，之後轉到電視，如果不是不能發牌，相信都成功，但佢又再一次轉營，做網購，暫時見到做得唔錯。
這股長遠正面，有潛力，但有兩個風險，第一，企業太著重王生，對於這類太集中一個人的企業，我比較一般，始終單一人是有風險的。
第二，網購初步睇發展得唔錯，但這刻仍未有盈利，而股價已升了不少，企業有潛力，但同時有風險，要注意，這刻的值博率只屬一般。如真的要投資這股，不要太大注（對照龔成信箱：Q6114）
9.按揭
你好，我係自僱人士，收入不穩，做到按揭嗎？
龔成老師：
銀行睇自由職業的收入，一般都要有商業證記，有收入證明，先同你做到，否則可能唔批。所以，你最好準備好商業證記，收入證明，例如銀行的流水賬比銀行睇。
（對照龔成信箱：Q6115）
10.財富增值
Hello 成哥 我有兩萬積蓄 每月有2000剩 可以有咩財富增值可以做？
月供股定保險公司既儲蓄計劃？兩者既回報同風險有咩分別？謝謝
龔成老師：
我地進行理財，用以「先增值，後現金流」進行，如果你是年輕入，可以集中在增值部分。年輕時集中累積財富，年長時集中收息及低風險。
保險公司的儲蓄計劃，原理就是幫你儲錢，然後比一個回報你，雖然較穩陣，但回報率低。因此若是年輕人，應該月供股票，因為月供股票是投資有增長力的項目，只要時間夠長，回報率較佳，當然，風險會比前者高。
如果做月供股，一定要選優質股，如不懂選股，就供盈富（2800），最重要是長期進行。（對照龔成信箱：Q6116）
