記住香港人真係好鬼有錢！︳李聲揚專欄
廣告
一年一度瑞銀財富報告出爐，照舊引起香港人嘩然。留意以前另一銀行瑞信也常做此類報告，但瑞信已被瑞銀收購，食花生的機會又少一個。瑞銀報告顯示，每10個香港人，就有一個係百萬富翁（美元！）。香港人均財富呢？達到454萬港元，全球第三位！報告引起網上熱話，但筆者全不意外。皆因筆者經常寫各種文章，提到「香港人真係好鬼有錢」。
不少傻仔KOL和網民，當然「反對」報告內容，但所持的理由極之薄弱，醜態盡露。
首先，是最簡單的Denial，拒絕接受現實，聲稱報告「唔準」，點可以調整到每一個香港人（所以驗血要抽乾全身血液？），只是私人銀行sell客的工具，認真你便輸。
不錯，報告當然是銀行銷售工具；否則，為何免費幫你做研究？報告亦不可能完全準，畢竟即使極權國度，也不可能掌握所有人的財富資料。
但，以前其他類似報告，顯示香港人財富下跌，網民卻一面倒讚好，不會質疑是「唔準」。此反差，充分顯示輸打贏要的精神：啱聽就準，唔啱聽就唔準。
