王賢誌搞真人騷出事 考驗自己老豆伴侶有幾愛︳凍鏈茶專欄

王賢誌2013年出櫃，直至2016年同交往7年嘅同性伴侶周思聰喺加拿大註冊成合法配偶，當時佢父母亦有出席，王賢誌坦言多謝父母支持。佢老豆王忠桐有兩個女一個仔，亦曾公開表示自己係一個開放爸爸，尊重王賢誌嘅決定。甚至最近製作嘅男男配真人騷《Boyscation Too》第二季，王賢誌老公同老豆都一樣有出席撐場。

王忠桐係王氏港建(0532.HK)主席，更曾任東華三院主席同埋馬主，據知佢老豆雖然唔反對佢出櫃，但對於製作節目去宣揚就非常有保留，喺呢件事上面受到外間多方壓力，所以唔願意出錢支持。

事實上，佢老豆盤生意都愈來愈難做。王氏港建主力為客戶代工生產包括電子教育、電腦、工業電子、醫療及工業設備等產品，大部份全屬OEM業務，即係生產完嘅商品或者組件會賣比另外一個牌子進行銷售，客戶包括國際著名品牌客戶，例如西門子、佳能等大型企業，喺本港上市已經幾十年。今年營業額$37 億港元，較舊年減少約21%，集團年內錄得股東應佔虧損$1.3280億港元，而上年就仲係賺緊錢，股東應佔溢利$7,180萬港元。不過生意向下行都唔係一朝一夕，王氏港建分別於2017同2021年提出私有化失敗，股價更加一落千丈，現時市值得返兩億，已經連續三季無派息。

坊間盛傳佢哋家族資產達$30億港元，起碼有錢做私化有先啦。何解王賢誌欠債只係區區300萬就要申請破產呢？照理賣樓押股，點都撲得到啦﹗王賢誌自己都持有一個市值$2,329萬港嘅大角咀帝峯 · 皇殿單位，咁都要破產，又有少許講唔過去嘅。

不過呢啲嘢話唔埋，可能老豆要教仔，等佢跌一交上一課，日後謹慎理財，唔好輸埋老豆剩落份身家。今次真係考驗王賢誌同埋佢嘅伴侶嘅真愛，可唔可以共渡呢個財困難關。