王維基打返師奶市場好似穩陣啲 小股東冇咁擔心｜凍鏈茶專欄

明明2017年時，王維基接訪問時講過：「兩年前，他剛轉型去經營網購平台，曾買下港鐵月台上3,328塊廣告板，加上附有創意盞鬼字句去Sell產品，不少人都覺得新奇又有趣，但他回想起只是一個傻佬行為，嗰一次我哋洗咗1,500萬，好多人都意外，但對我哋生意……我覺得完全係一個錯誤，只係一個傻佬叫王維基好大喜功，用返過往20年做IDD、做寬頻嘅經驗，以為自己好叻咁做廣告，所以一敗塗地。」自此之後，每月主打電子廣告，例如Facebook、Google，budget完全跌咗幾個grade。

幾年前，因為疫情出唔到街買餸，加上HKTVmall 因為賣口罩，嗰時股價係炒到飛天，咁梗係唔洗賣廣告啦。疫情之後，王維基即高價配股，仲雄心壯志表示未來7年逐漸淡出網購平台營運者角色，轉而為網購平台賦能。公司早前亦新設立電商平台技術方案業務Shoalter，以協助購物商場進行數碼化轉型，而Shoalter第一個客戶就係時裝連鎖店I.T營運嘅EESE。王生仲將公司改埋名叫「香港科技探索公司」(1137.HK)，佢嘅目標似乎唔再係做師奶仔生意。