王維基最識sell 自己 魔童能否戰勝巨人？︳凍鏈茶專欄

王維基喺業績會回應京東抄襲，兜個彎讚自己說：「當年我抄功課，我一定搵至好成績嗰個嚟抄功課，所以冇問題㗎。正如噚日我出個 post 咁講，多謝佢哋賞面啦。」被王維基指控抄襲嘅京東香港未有正面回應，反而乘勢宣布公司優惠，呢場硬仗似乎一觸即發。

唔少人都想撐王維基，始終係香港仔，但唔少人都覺得王維基呢仗，係大衛大戰歌利亞﹐面對內地巨人銀彈攻擊，贏面唔高。不過講返清楚遊戲規則先，點先叫做贏呢？

叫得做「魔童」，王維基都唔係省油的燈。咁多年嚟，佢條上位之路都係打巨人﹐所以有晒經驗。當年本來已經移民加拿大嘅王維基﹐92年同表哥創業搞城市電訊，食住移民個勢，大搞加拿大撥回香港嘅廉價長途電話服務，抗衡當時壟斷電訊市場嘅香港電訊。後來，長途電話市場開放後遇上科網熱，王維基要再贏一仗，於是帶頭大打廣告戰。

王維基又喺2008年入主過亞視12日，後來佢知曾蔭權打算多發幾個免費電視牌照，2009年就嗱嗱聲去申請，點知到2013年梁振英上場，港府先決定唔發牌俾香港電視網絡（HKTV 前身）。雖然表面上場仗係輸咗，但依家睇返，當日做唔成電視大亨，今日先唔使燒銀紙吊命，最後王維基轉型做網上超市，仲食正疫情條水有運行。

今次呢場仗，論銀彈，就一定唔夠京東，但HKTVMall有晒物流隊同埋交收點，有網絡上優勢，仲有唔少香港人支持，輸唔晒。

說穿了，如果王維基獲京東垂青，才是真正贏家。生意佬始終都係計數，幾好嘅人設都係向錢看，今次HKTV Mall母公司香港科技探索（1137.HK）業績見紅都宣佈派特別股息，王維基都係先袋一筆，少留現金喺公司，生意最終善價而沽亦唔出奇。不過，就正如美團（3690.HK）旗下Keeta打敗Deliveroo後做獨市就加價，如果京東打敗／收購HKTV MALL，喊三聲都只係一眾香港消費者。