黃竹坑學校債券爆煲 漢鼎書院其實來頭唔細︳凍鏈茶專欄

家長要先買一百二十萬元債券

呢間一睇個名就知係來自內地嘅彷「國際學校」，大概八年前開始喺香港吸客﹐當時對唔少內地家長來講，仔女嚟香港讀書，滿七年後就可以拎永久居港權，變身「新香港人」，所以就算學生入讀前，家長要先購買價值達一百二十萬元一份嘅個人債券，日後每年學費十四至十八萬元不等，都在所不計。

背後牽涉大人物

出來回應嘅校監徐莉以前只係一位老師，何得何能辦到一間國際國校呢？據知，呢間漢鼎書院背後仲牽涉世茂房地產主席許榮茂。
先由漢鼎書院其中一名創校董事唐曉姣講起，漢鼎辦學團體「益利樂生教育基金」，與致力協助「新香港人」融入本地生活嘅「新家園協會」關係密切。唐曉姣亦多次以新家園協會署理總幹事身份出席活動。唐曉姣係共產黨員，2008年來港喺中大社會工作學系做研究生，畢業後於新家園做社工，佢同時係「國際創客聯盟」董事、去年舉辦嘅「香港國際創客節」籌委會主席團成員。呢個籌委會主席團成員來頭唔細，亦包括新家園協會永遠榮譽會長恒基大少李家傑、租場俾漢鼎嘅協成行方文雄及霍英東第三代霍啟文。

目標把愛國陣線壯大起來

「新家園協會」喺早幾年不斷擴張廣納會員。呢個協會由世茂房地產主席許榮茂及恒基副主席李家傑創辦，兩人亦同時係團結香港基金理事。對於新家園協會，佢地嘅政治任務之一，就係喺香港吸納更多新移民，「把愛國陣線壯大起來」。事實上，呢間名不見經傳嘅漢鼎書院開辦時星光熠熠，當日出席開幕禮嘉賓包括愛國商人霍英東孫兒、霍震寰之子霍啟文，亦有學校業主協成行第二代方文雄，以及任多間小學、幼稚園校監嘅名媛趙曾學韞。

呢間「國際書院」，個business model早就有啲問題，但都捱到八年。不過講到底，而家爆煲好大機會係背後條資金鏈斷咗。今時今日嘅經濟環境，金主都係泥菩薩過江，自身難保，估唔到內房債爆煲之後，竟然輪到學校債券。